Linibo ang naggwa sa mga kalsada sa United States, Canada, United Kingdom, New Zealand kag iba pang bahin sang kalibutan agud suportahan ang pumuluyong Palestinian kag kundenaron ang pagpamomba sang Israel sa Gaza. Dala sang madamo nga grupo ang panawagan nga “Free Palestine!” o “Hilwayon ang Palestine!”

Sa United Kingdom, gin-okupar sang mga aktibista sang Mayo 19 ang isa ka subsidyaryo nga pabrika sang armas sang Elbit Systems, nga amo ang nagasuplay sang mga drone sa Israel kag ginagamit batuk sa Palestine. Gindeklarar man sang Samidoun Palestinian Prisoner Solidarity Network ang Mayo 15-22 bilang Semana sang Paghimakas sang Palestine.

Sa US, nagpanawagan ang 140 mga organisasyon sa gubyerno nga Biden nga punggan ang pagpalayas sa mga Palestinian sa East Jerusalem, kundenahon ang kalakasan sang Israel sa Gaza kag punggan, gamit ang tanan nga pamaagi, ang mga krimen sini sa gera.