Pormal nga nangayo og awtorisasyon niadtong Hunyo 14 si Fatou Bensouda, nangulong abogado sa International Criminal Court (ICC), sa mga huwes sa maong hukmanan aron ablihan ang imbestigasyon sa “gyera kontra-droga” sa rehimeng Duterte lambigit sa mga reklamong gipasaka sa mga biktima batok dinhi. Nagretiro si Bensouda niadtong Hunyo 15 ug pormal siya nga gipulihan ni Kharim Khan nga magpadayon sa kaso.

Ikaduhang yugto kini sa unum ka lakang nga proseso sa pagtaral sa ICC sa mga kriminal nga kasong gipasaka sa korte. Human na ang pasiunang eksaminasyon (unang yugto) kung asa gipirme ni Bensouda nga adunay “resonableng basihan aron toohang nahitabo ang krimen batok sa katawhan nga pagpatay” tungatunga sa Hulyo 16, 2016 (unang adlaw sa paglingkod ni Rodrigo Duterte) hangtud Marso 16, 2019 (adlaw nga pormal nga miluwat ang Pilipinas sa ICC) sa “gambalay sa gyera kontra-droga” sa rehimeng Duterte.

Matud ni Bensouda, bisan pa og mihawa ang Pilipinas sa ICC niadtong 2019, mamahimo pa gihapong imbestigahan sa korte ang mga krimen sa panahong myembro pa niini ang nasud.

Langkob sa ICC ang pagtaral sa upat ka tipo sa krimen—henosidyo, mga krimen sa gambalay sa gyera, krimen batok sa katawhan ug krimen sa agresyon nga dili ginataral sa mga myembrong nasud. Sunod nga yugto sa imbestigasyon ang pasiunang pagtaral (pre-trial), pagtaral, pag-apela ug ulahi mao ang pagpatuman sa silot.