Lima ka aktibista ang sunud-sunod nga gin-aresto sang mga pwersa sang estado sining nagligad nga mga semana.

Gindakup sang gintingub nga pwersa sang militar kag pulis si Marites Pielago, koordineytor sang Makabayan sa Bicol kag anay nominado sang Bayan Muna sang Hulyo 28 sa himu-himo nga kaso nga pagpatay kag napaslawan nga pagpatay. Gindumog sang mga pwersa sang estado ang Dr. Nilo O. Roa Memorial Foundation Hospital sa Barangay San Francisco, Naga City kon sa diin nagapabulong si Pielago.

Mag-utod nga Lumad ang gindakup sa himu-himo nga kaso nga human trafficking sa adlaw sang State of the Nation Address (SONA) ni Ferdinand Marcos Jr sang Hulyo 25. Sanday Mawing kag Ismael Pangadas, mga estudyante sang Bakwit School, gindakup sang mga pulis pagkatapos ang rali kontra-SONA sa Freedom Park, Roxas, Davao City.

Samtang, gin-aresto sang mga pulis sa himu-himo nga kaso nga rebelyon ang mangunguma nga si Gina Montenegro sang Hulyo 22 sa Purok 3, Hinapuyan, Carmen, Surigao del Sur.

Sang Hulyo 15, gin-aresto man sang mga elemento sang estado si Arjay Verdera, katapu sang Anakpawis Partylist, sa Bulusan, Sorsogon. Ginapagwa sang mga pulis nga naagaw halin sa iya ang isa ka kalibre .38 pusil kag mga bala.

Pilit nga pagpasurender. Gintiplang kag pilit nga ginpasurender sang mga elemento sang 15th IB kag NTF-Elcac ang mga katapu sang asosasyon sa Cauayan, Negros Occidental sang Hulyo 7-8. Lakip sa ginpatambong nga grupo ang Caliling Small Agricultural Farm Workers Association, Tuyom Farmers Association, Small Farmers of Manuling, Paghiliusa sang mga Mangingisda sa Lugway kag Paghiliusa sang Mangingisda sa Guiljungan.

Sa pagkighimbon sang militar sa lokal nga gubyerno, ginpagwa nga pagahatagan sila sang programa sa pangabuhian pero sa matuod ginpasurender bilang mga Pulang hangaway.

Pagpalayas. Sa pagpanguna sang 2nd IB, kahimbon ang mga upisyal sang lokal nga barangay, ginpalayas ang masobra 94 pamilya sang mangunguma nga nagatalauma sa may 550 ektaryang duta nga kabahin sang 1,807 ektarya nga “pastuhan” nga gintugyan na sa ila sang gubernador sang Masbate nga si Antonio Kho.

Sakup sang duta nga ila gintalauma ang mga barangay sang Cabungahan, Calapayan kag Villaluna sa Cawayan. Ang mga duta nga ini pang-agrikultura, kag ginpadeklarar lamang nga pastuhan para makalikaw sa repormang agraryo.