Sunud-sunod ang mga kaso sang pataratas ng pagpangluthang sang mga suldado sang Armed Forces of the Philippines (AFP) sining nagligad nga mga semana. Ginapagwa sang mga suldado nga napatay ang mga biktima sa mga engkwentro kag katapu ang mga ini sang Bagong Hukbong Bayan (BHB).

Napatay sa pagpangluthang sang 62nd IB ang 5-bulan nga nagabusong nga si Christina Jacolbe sa Sityo Banderahan, Barangay Trinidad, Guihulngan City, Negros Oriental sang Hulyo 26, alas-5 sang aga. Upod niya sa ginadayunan nga balay ang iya 16-tuig nga anak nga si Everly Kee Jacolbe kag paryente nga si Rodan Montero, nga napatay man sa insidente. Anay titser sa daycare si Christina antes napilitan nga mag-untat pagkatapos i-red tag kag lagson sang militar.

Sa Batangas, napatay sa pagpangluthang sang 59th IB sa Sityo Centro, Barangay Guinhawa, Taysan sang Hulyo 18 ang 9-tuig nga si Kyllene Casao. Nagapauli siya at iya amay halin sa pagpaharab sang ila kanding sang palukpan sila sang mga suldado.

Ginapunggan sang 59th IB ang mga grupo sa tawhanong kinamatarung nga mag-imbestigar sa gintabuan sang insidente kag gintago ang amay ni Kyllene. Sa pagpakignegosasyon sa lokal nga gubyerno, naduso sang mga gruo sa tawhanong kinamatarung ang paglunsar sang isa ka independyante nga imbestigasyon upod ang mga grupo nga nagatib-ong sa tawhanong kinamatarung sang mga bata kag United Nations Children’s Fund.

Sa Batangas gihapon, ginpangluthang sang 59th IB si Maximo Digno, isa ka mangunguma sa Barangay Malapad na Parang, Lobo sang Hulyo 26. Suno sa mga residente, si Digno may problema sa pagpamensar. Isa ka adlaw antes sini, pataratas nga ginpaulanan sang bala ang mga suldado sang 59th IB sa kaiping nga lugar.

Sa Occidental Mindoro, ginpatay sang 76th IB si Dante Yumanaw, tumandok nga Mangyan-Batangan kag residente sang Sityo Tiyabong, Barangay Ligaya, Sablayan sang Hulyo 15. Siya ang kapitan sang Barangay Ligaya.

Ginaipit sang mga suldado sang AFP ang pamilya sang biktima kag ginadumilian nga magbisita sa haya.