Rehabilitasyon, indi reklamasyon: Mga pagbato
Sa State of the Nation Address ni Ferdinand Marcos Jr sang Hulyo 25, ginsambit niya nga wala siya sang isuspendir sa mga proyektong imprastruktura nga nasuguran na sa idalom ni Rodrigo Duterte. Lakip diri ang indi magnubo sa 30 proyektong reklamasyon nga ara sa nagkalainlain nga lebel sang implementasyon, disenyo kag paghanda.
Tanan nga mga proyekto nga ini ginpakamalaut sang mga syentista kag mga organisasyon nga maka-palibutan. Halin sa mga promisa nga isla sa Manila Bay, pakadto sa “smart city” sa Cebu kag nagkalainlain nga mga prubinsya, mabaskog ang pagpamatuk sang mga mamumugon, mangingisda, gamay nga mga negosyante kag mangunguma nga mapalayas kag madulaan sang pangabuhian bangud sa mga ini.
Mapanghalit sa naturalisa
Madamo kag masangkad na ang syentipiko nga pagtuon angut sa halit nga dulot sang mga proyektong reklamasyon lunsay sa mga baybayon kag kaiping nga kadutaan. Ginasamad sini ang puluy-an sang linibo nga klase nga mga hayop kag tanum sa kadagatan, amo man sa madamo nga klase sang pispis. Ginaguba sini ang mga bakawan nga nagaserbi nga duna nga panagang sa pagbaha, pagtaas sang tubig sang kadagatan, mabaskog nga bagyo, tsunami kag mga storm surge o gulpe nga pagdaku sang tubig pareho sa natabo sa Tacloban City sa panahon sang bagyo nga Yolanda.
Dugang sa mga ini, pagapalalaon sang mga artipisyal nga isla ang duna nga peligro sa mga look, pareho sa madasig nga pagbaha sang tubig kag liquefaction (paglum-ok sang duta dulot sang permi nga paghulag sini). Ang mga coral reef (mga look sa kadagatan manggaran sa tanum kag hayop) mahalitan man sang sobra nga lay-on dulot sang katuwang nga dredging. Apektado sang reklamasyon pati ang mga baybay kon sa diin pagakuhaon ang igatambak nga duta para sa mga artipisyal nga isla.
Suno sa mga syentista nga grupong Agham, sayup ang mga argumento nga ginagamit para hatagan-rason ang mga proyekto. Halimbawa diri ang pagsiling nga “patay na” ang Manila Bay labi na sa bahin sang Metro Manila bangud wala na diri sang nagakabuhi nga isda, coral reef, seagrass kag mga bakawan. Indi man mapangisdaan ang amo nga erya, kabahin ini sang katubigan nga nagasakup sa mga prubinsya sang Bulacan, Cavite kag Bataan. Anuman nga aktibidad diin man nga bahin sini may epekto sa bilog nga look. Sa kabilugan, ginakabig ini nga isa sa pinakaproduktibong pangisdaan sa pungsod.
Labing matingkad ang halit sang reklamasyon sa mga baybayon sang Cebu, Dumaguete kag iban pang look nga may mauswag nga kabuhi-marino kag nagasugpon sa mas malapad pang ekosistema.
Kontra-pumuluyo
Linibo ang madulaan sang balay kag pangabuhian dulot sang mga proyektong reklamasyon. Mayorya sa ila malaproletaryo nga may manubo nga kita kag mga gamay nga mangingisda. Sa tantya sang mga syentista, nagalab-ot sa 1.24 milyon ang signipikante nga maapektuhan sang mga proyektong reklamasyon nga nagasakup sang halos 40,000 ektarya sa bilog nga pungsod. Sa pangkabilugan, apektado ang suplay sang pagkaon dulot sang paggamay sang makuhaan sang isda kag iban pang pagkaon-dagat.
Sa Metro Manila, indi magnubo sa 100, 000 residente sang Baseco, Parola, Tondo Foreshoreland kag Malate ang mapalayas sa apat pa lang nga proyektong reklamasyon. Sa Bulacan, ginpalayas na sang San Miguel Corporation ang 700 pamilya sang mangingisda gamit ang pagpanuhol, pagpaniplang kag hayag nga kalakasan. Nagnubo na ang ginakuha nga isda sa malapit nga mga barangay bangud sa iligal nga pagpangpukan sang kumpanya sa mga bakawan.
Sa Cebu, 500 mangingisda sa Liloan kag Consolacion ang madulaan sang pangabuhian bangud pagawaskon sang 235.8 ektaryang proyektong reklamasyon ang mga pangisdaan kag bakawanan. Dugang sa ila ang 2,000 mamumugon sang mga ginatrabahuan sang barko nga ipasara sang reklamasyon. Amo man ang matabo sa mga mangingisda sa tatlo ka barangay sa Minglanilla.
Sa Dumaguete, 1,000 mangingisda ang madulaan sang pangabuhian kag 38,000 residente pa sa walo ka barangay ang mameligro ang pangabuhian kag puluy-an.
Sa tanan nga mga kaso nga ini, mga daku nga negosyo kag dumuluong nga kumpanya ang makabenepisyo sa mga bilding, puluy-an, tindahan, kasino kag iban pang kalingawan pangturista nga pagatukuron sa mga reklamadong duta. (Basahon ang una nga bahin sa nagligad nga isyu: Mapanghalit nga mga proyektong reklamasyon: Pinanubli ni Marcos kay Duterte.)