Ginpatay sang 2nd IB si Carlito Ahina sa Sityo Mabuhay, Barangay Mabini, Palanas, Masbate sang Oktubre 8. Ginpalibutan sang mga suldado kag pulis ang iya balay antes luthangon. Upod ni Ahina sa sulod sang ila nga balay ang iya mga anak sang matabo ang insidente. Napilasan sa batiis ang iya anak nga babaye.

Daan nga katapo sang BHB si Ahina nga isa ka tuig na nga indi aktibo. Ginpatay siya pagkatapos nga magbalibad nga magpagamit sa mga suldado para halitan ang BHB kag masa.

Napatay man sa sobra nga pagpaantus si Norvil Generoso Pepito, residente sang Barangay Mambog, Dimasalang, sa kamot sang 2nd IB sa kampo sini sa Barangay Paguihaman, Uson, Masbate sang Oktubre 12.

Ginpatawag sang 2nd IB si Pepito sa ila kampo para interogahon sa akusasyon nga nadalahig siya sa isa ka armadong aksyon sang BHB. Ginkulong, ginpaantus kag gin-abuso si Pepito umpisa Oktubre 10 tubtob 12. Naabutan pa sang iya nga asawa kag kapitan sang ila nga barangay nga nagahimumugto si Pepito apang wala na makaabot nga buhi sang dalhon sa ospital.

Iligal nga pag-aresto. Patraidor nga gin-aresto sang PNP sanday Kara Taggaoa sang Kilusang Mayo Uno kag Larry Valbuena, presidente sang PASODA-PISTON, sang Oktubre 10. Ara sa Quezon City Regional Trial Court ang duha para atubangon ang himu-himo nga kaso nga ginpasaka sa ila nga pagpangawat sang patraidor sila nga arestuhon sa separadong kaso nga direct assault.

Pagpang-ipit. Gindala sang mga pulis sa presinto sa Tiaong, Quezon si Felizardo Repaso, lider-mangunguma sa Quezon kag 10 pa nga indibidwal sang Oktubre 20. Gin-abangan sila sa dalan sa Tiaong samtang nagabyahe pakadto sa Quezon City para magtambong sa isa ka dayalogo sa Department of Agriculture.