Gipatay sa 2nd IB si Carlito Ahina sa Sityo Mabuhay, Barangay Mabini, Palanas, Masbate niadtong Oktubre 8. Giliyukan sa mga sundalo ug pulis ang iyang balay ayha girakrakan. Kuyog ni Ahina sulod sa ilang balay ang iyang mga anak dihang nahitabo ang insidente. Nasamdan sa bagtak ang iyang anak nga babaye.

Kanhing myembro sa BHB si Ahina nga usa ka tuig nang dili aktibo. Gipatay siya human mibalibad nga magpagamit sa mga sundalo aron ibutang są peligro ang BHB ug masa.

Namatay usab sa grabeng tortyur si Norvil Generoso Pepito, residente sa Barangay Mambog, Dimasalang, sa kamot sa 2nd IB sa kampo niini sa Barangay Paguihaman, Uson, Masbate niadtong Oktubre 12.

Gipatawag sa 2nd IB si Pepito sa ilang kampo aron interogahon sa akusasyon nga lambigit siya sa usa ka armadong aksyon sa BHB. Gipriso, gitortyur ug giabuso si Pepito gikan Oktubre 10 hangtud 12. Naabtan pa sa iyang asawa ug kapitan sa ilang barangay nga nagtinga si Pepito apan wala na nakaabot nga buhi sa ospital.

Iligal nga pag-aresto. Patraydor nga giaresto sa PNP silang Kara Taggaoa sa Kilusang Mayo Uno ug Larry Valbuena, presidente sa PASODA-PISTON, niadtong Oktubre 10. Anaa sa Quezon City Trial Court ang duha aron atubangon ang gama-gamang kasong pagpangawat nga gipasaka batok kanila dihang patraydor silang giaresto sa lahi nga kasong direct assault.

Pagpamig-ot. Gidala sa mga pulis sa presinto sa Tiaong, Quezon si Felizardo Repaso, lider mag-uuma sa Quezon ug 10 pa ka indibidwal niadtong Oktubre 20. Giharang sila sa kalsada sa Tiaong samtang nagabyahe padulong Quezon City aron mosalmot sa usa ka dayalogo sa Department of Agriculture.