17-anyos nga minorya, gipatay sa 9th ID

,
Kini nga artikulo adunay hubad sa PilipinoEnglish

Gipusil-patay sa mga tropa sa 9th ID ang 17-anyos nga si Argie Salvador, usa ka sibilyan, sa Sityo Sapang Bato, Barangay Canapawan, Labo, Camarines Norte niadtong Pebrero 11, ala-1:40 sa hapon.

Ginapagawas ni Major General Adonis Bajao sa 9th ID nga napatay si Salvador sa usa ka engkwentro sa tropa niini ug sa Bagong Hukbong Bayan (BHB).

Minoryang Manide nga taga-Tanauan, Capalonga si Salvador. Nangita lamang siya og dugus dihang natyempohan ug pagdiskitahan sa mga sundalo. Rehistrado siya sa programang TUPAD sa Department of Labor and Employment.

Samtang, sa lungsod sa Santa Elena, gisulod sa pito ka gidudahang ahente sa estado ang balay ni Tino Manalo niadtong Pebrero 4 sa Barangay Don Tomas. Giadtuan usab ang balay nilang Jun Barsibal ug Johnny Caig niadtong Pebrero 5. Gipasanginlan silang mga tigsuporta sa hukbong bayan.

Pagdagit. Sa Oriental Mindoro, gidagit sa mga pwersa sa 203rd Brigade si G. Elyong, residente sa Sityo Sinariri, Barangay Panaytayan, Mansalay niadtong Pebrero 6. Paadto siya sa tindahan aron magpalit og kape dihang gidakop siya sa mga sundalo. Gikuha siya sa napulo ka sundalo atubangan sa mga residente nga walay gipakitang papel o pagpasabot sa hinungdan sa pagdakop.

Pekeng engkwentro. Aron magsabwag og kabangis ug kahadlok sa mga komunidad, nagpakana og pekeng engkwentro ang mga yunit sa militar sa Quezon ug Negros Oriental.

Niadtong unang semana sa Pebrero, gipagawas sa 85th IB nga adunay engkwentro sa Barangay Butanguiad, San Francisco, Quezon. Bunga niini, naapektuhan ang panginabuhian ug bisan ang pag-eskwela sa mga kabatan-onan sa mga barangay sa lungsod.

Dili usab tinuod ang ginasuling engkwentro sa 11th IB sa Sityo Tuyopan, Barangay Talalak, Santa Catalina, Negros Oriental niadtong Pebrero 4. Matud sa lokal nga kumand sa BHB, walay yunit sa lugar niadtong panahona. Human niini, gikulata pa sa mga sundalo ang mag-uumang si Randy Iran.

Pag-aresto. Sa Sorsogon, gidakop sa mga pulis sa gama-gamang mga kaso ang managsuon nga silang Ramises ug Willian Hubilla, parehong mga anak sa namartir nga lider-rebolusyonaryo sa Sorsogon nga si Andres Hubilla (Ka Magno). Giaresto si Ramises niadtong Pebrero 8 sa Barangay North Poblacion, Juban samtang si William gidakop sa misunod nga adlaw sa Barangay Central, Casiguran. Gipasakahan sila og daghang kaso sa pagpatay ug pakyas nga pagpatay. Una nang pugos nga gipasurender si Ramises sa militar niadtong 2018 sa pagkalambigit kuno sa rebolusyonaryong kalihukan.

 

17-anyos nga minorya, gipatay sa 9th ID