Sunud-sunod ang mga kaso sa paglapas sa AFP sa internasyunal nga makitawhanong balaod sa milabayng mga semana.

Walay kaluoy ug tinuyong gipatay sa mga sundalo sa 94th IB ang duha ka hors de combat nga Pulang manggugubat ug usa ka sibilyang mag-uuma niadtong Pebrero 5 sa Barangay Oringao, Kabankalan City, Negros Occidental. Ginapagawas sa mga sundalo nga napatay ang tulo sa usa ka engkwentro.

Nagpaalim sa usa ka balay sa Sityo Mugni sa maong barangay ang Pulang mangugubat nga si Arjen Mahinay (Ka Nonong) human ma-istrok. Kauban niya ang medik nga si Junjun Callet (Ka Roben). Gidakop sila sa mga sundalo niadtong Pebrero 4 sa alas-4 sa hapon. Gidakop usab sa mga berdugo ang mag-uumang si Jomarie Calumba nga naatol nga anaa sa parehong sityo.

Sa Bukidnon, gidagit sa mga pwersa sa AFP ang konsultant sa National Democratic Front of the Philippines (NDFP) nga si Ariel Badiang sa Manolo Fortich niadtong Pebrero 6. Nangayo og tabang sa publiko ang iyang pamilya aron masuta ang iyang gikahimutangan ug aron maadtuan. Wala pa gihapon siya gilutaw hangtud sa kasamtangan.

Samtang, napriso pa gihapon ang iligal nga giarestong NDFP konsultant nga si Ruben Saluta, iyang asawa nga si Presentacion Saluta ug kauban nilang si Yvonne Losario.

Sa Cagayan, gidakop sa mga pulis ang samaron nga si Orion Yoshida human ang ginaingong engkwentro sa yunit sa 5th ID ug BHB sa Sityo Nangbaggayan, Barangay Santa Margarita, Baggao niadtong Pebrero 13. Gipasakahan siya og gama-gamang mga kasong pakyas nga pagpatay, paglapas sa Anti-Terrorism Law ug illegal possession of firearms and explosives. Wala siya gitugutan nga mabisita sa iyang abugado, mga pamilya ug mga grupo sa tigpanalipud sa tawhanong katungod. Si Yoshida usa ka kanhing estudyante sa De La Salle University (DLSU).