Subling nanawagan ang Kapatid, grupo sa mga pamilya sa bilanggong pulitikal, nga buhian si Gerardo dela Peña, 84, ang pinakatigulang sa 824 ka bilanggong pulitikal nga napriso karon sa lain-laing prisohan sa nasud. Matud sa grupo, sugod 2019 pa nilang ginaduso ang pagpagawas kang Peña apan hangtud karon wala pa gihapoy aksyon ang estado.

Si Peña, adunay altapresyon ug uban pang balatian, usa ka mag-uuma nga naggikan sa Vinzons, Camarines Norte nga gihukman og reclusion perpetua sa gama-gamang kasong pagpatay. Napulo na ka tuig siyang napriso. Siya ang kanhing lider sa Samahan ng Ex-Detainees Laban sa Detensyon at Aresto (Selda) ug myembro sa Karapatan.

Unang giapela sa Kapatid ang pagpaguwa kaniya sa makitawhanong mga basihan niadtong 2019 apan gibasura kini sa Korte Suprema ug gipalig-on ang hukum kaniya.

Samtang, gibasura sa korte sa Muntinlupa ang kaso batok sa tulo ka tsuper nga nagpiket sa Alabang, Muntinlupa City atol sa transport strike niadtong Marso 7. Matud sa grupong Piston, gibasura ang kaso human balik-balik nga wala mitunga sa mga pagdungog ang mga nagreklamo.