Gimasaker sa mga sundalo sa 94th IB ang usa ka pamilya, lakip ang duha ka bata, niadtong Hunyo 14 sa gabii sa Barangay Buenavista, Himamaylan City, Negros Occidental. Girakrakan sa mga sundalo samtang tulog ang mag-inahang Emilda Fausto, 50-anyos, ug iyang duha ka anak nga silang Raben Fausto, 11, ug Ben Fausto, 15. Nakaplagan usab nga patay sa gawas sa ilang balay si Roly Fausto, 52, amahan sa pamilya.

Ang pamilya aktibong mga myembro sa Baklayan, Bito, Cabagal Farmers Association (BABICAFA), organisasyon sa mag-uuma sa maong barangay.

Sa wala pa ang masaker, balik-balik na nga ginapig-ot sa mga sundalo ang pamilya tungod sa akusasyon nga suporter sila sa Bagong Hukbong Bayan (BHB). Gireport nila kini nga mga insidente sa mga organisasyon sa tawhanong katungod.

Walag-too ang pagkundena ug panawagan alang sa hustisya sa pagpatay sa pamilya Fausto. Naglunsad og mga protesta ang lain-laing grupo atubangan sa Commission on Human Rights sa Quezon City ug sa AFP Visayas Command Headquarters sa Cebu City aron ipanawagan ang pagpanubag sa militar. Gibatikos nila ang AFP sa dayag nga pagpamakak ug pagtuis sa panghitabo kalabot sa masaker.

Gawas kanila, upat ka lain pang sibilyan ang walay-kaluoy nga gipatay sa mga sundalo sa Armed Forces of the Philippines (AFP) sa Negros, Masbate ug Albay.

Niadtong Hunyo 13, gipatay sa 62nd IB sa paturagas nga pagpamusil silang Benjie Ebarle ug Roweno Anubong sa Barangay Macagahay, Moises Padilla. Nahitabo ang insidente human maka-engkwentro ang usa ka yunit sa hukbong bayan sa kasikbit nga sityo.

Napatay usab sa paturagas nga pagpamusil sa AFP ang 17-anyos nga si Carling Belan niadtong Hunyo 16 sa Sityo Manaybanay, Barangay Calabad, Dimasalang, Masbate. Nasamdan sa maong pagpamusil si Panoy Pepito. Gidakop ang tulo pa ka sibilyan nga silang Wengweng Hagnaya, Damang Tumangan ug Edlang Tumangan sa parehong insidente.

Samtang, gitaho bag-o lang ang pagpatay sa 9th ID sa mag-uumang si Zaldy Cañaveral, 40 anyos, nga gipusil sa mga sundalo niadtong Mayo 24. Anaa sa iyang maisan si Cañaveral sa Barangay Busac, Ligao City, Albay dihang gipig-ot ug gipusil siya sa mga sundalo.

Pag-aresto. Iligal nga giaresto sa mga pulis si Danilo Acayin, taga-Barangay Puray, Rodriguez, Rizal niadtong Hunyo 5, ala-1 sa hapon sa kasong pagpatay nga walay gipresentang mandamyento de aresto. Kasamtangan siyang gipriso sa Antipolo City.

Niadtong Hunyo 16, giaresto sa 62nd IB ang mamumuno sa konstruksyon nga si Aldren Valbueno sa Sityo Manta-uyan, Barangay Macagahay, Moises Padilla, Negros Occidental. Gipagawas sa mga pulis nga adunay nakumpiskang kalibre .45 pistola ug military bag kaniya. Giakusahan siyang myembro sa hukbong bayan.

Giaresto sa mga pulis niadtong Hunyo 19 ang upat ka mag-uuma sa Sityo Caorasan, Barangay San Agustin, Pili, Camarines Sur sa gama-gamang mga kaso. Ang mga giaresto supak sa proyektong Naga Airport Development sa prubinsya.

Lakip sa mga giaresto si Artemio Sanchez, kanhing lider sa Damayan nin Paraoma sa Camarines Sur (DAMPA) ug myembro sa pangrehiyong konseho sa Kilusang Magbubukid sa Bicol.

Pagpamusil. Nagpaulan og bala ang mga sundalo sa 62nd IB sa Sityo Uyangan, Barangay Budlasan, Canlaon City bandang alas-11:00 sa gabii niadtong Hunyo 15. Nagbunga kini og troma ug kahadlok sa mga residente.

Pagpanakit. Sa Masbate, gikulata ug gikawatan sa mga sundalo si Nono Sayson ug upat pa ka mag-uuma niadtong Hunyo 1-5 sa Barangay Buenasuerte sa Palanas, Barangay Guindawhan sa Pio V. Corpus ug Barangay Mabini sa San Fernando.