Protesta sa mga mamumuo. Gipangunahan sa mga mamumuo sa Gardenia Bakeries Philippines ug Philfoods Fresh Baked Products ang protesta sa Sta. Rosa, Laguna niadtong Hunyo 6 aron batikuson ang nagapadayon nga pagpamig-ot sa NTF-Elcac sa mga mamumuo sa rehiyon. Gikundena nila ang bag-ong serye sa pagpanghasi ug pagsulod sa mga sundalo sa ilang mga pabrika aron mang-red-tag sa mga unyonista sa mga ginalunsad nilang mga seminar. Niadtong Hunyo 15, nagpasaka ang mga mamumuo og reklamo sa Commission on Human Rights aron papanubagon ang kunsabuhay sa tag-iya sa Gardenia ug mga pwersa sa estado sa pagpamig-ot kanila.

Adlaw sa kawalay kagawasan. Naglunsad og koordinadong protesta ang mga progresibong grupo sa Metro Manila, Southern Tagalog ug Davao niadtong Hunyo 12 aron dumdumon ang ika-125 mini nga “Araw ng Kalayaan.” Gikundena nila ang interbensyon sa duha ka nagbang nga imperyalista sa teritoryo ug mga internal nga hisgutanan sa nasud. Matud nila, dili tinuod nga gawasnon ang Pilipinas tungod kay padayon kining gidominahan sa imperyalismong US.

Ilutaw silang Dexter ug Bazoo! Sa ika-40 nga adlaw sa pugos nga pagwala nilang Gene “Bazoo” De Jesus ug Dexter Capuyan niadtong Hunyo 7, gimakmak sa lain-laing grupo ang Camp General Servillano A. Aquino sa Tarlac aron iduso ang pagpalutaw kanila. Miduyog sa protesta ang mga pamilya ug higala sa duha ng gitawag og Taytay 2 nga gituuhang anaa sa kustodiya sa militar. Ang maong kampo-militar ang hedkwarters sa Northern Luzon Command sa Armed Forces of the Philippines.

Adlawng natawhan ni Rizal. Giduyugan og protesta sa kabatan-onang estudyante gikan sa lain-laing unibersidad ang pagdumdum sa ika-162 kasumaran ni Jose Rizal niadtong Hunyo 19 atubangan sa Commission on Higher Education. Nanawagan silang ibasura ang Mandatory ROTC, Tuition and Other School Fees Increase (TOFI) sa mga pribadong unibersidad, ug pagkibhang sa badyet sa mga pangpublikong unibersidad.