Gireyd sa mga operatiba sa National Investigation Agency (NIA) sa reaksyunaryong gubyerno sa India ang mga upisina sa lain-laing demokratiko ug maki-katawhan nga organisasyon sa Andhra Pradesh ug Telangana niadtong Oktubre 2. Sa taho sa Forum Against Corporatization And Militarization (FACAM), dili moubos sa 12 ka organisasyon ang giatake sa mga pwersa sa estado. Ang mga pag-atake adunay kalabutan sa ginaingong kaso sa “pakiglambigit sa mga Maoista” sa mga organisasyon niadtong 2021.

Giaresto sa reyd si Chandra Narasimhulu, usa ka upisyal sa Pragatisheela Karmika Samakya (PKS) sa Andhra Pradesh. Matud sa FACAM, ginapagawas sa gubyerno sa India nga nakuha kaniya ang 1.3 milyong rupee ug usa ka pistola nga adunay mga bala.

“Kini nga mga organisasyon dugay nang mibarog batok sa mga paglapas sa tawhanong katungod ug pagpanumpo sa demokratikong pagduso batok sa pagpangawkaw sa mga korporasyon sa abunda sa natural nga bahandi sa sentrong rehiyon sa India,” matud sa FACAM.

Saysay pa sa grupo, ang maong mga reyd kabahin sa padron sa pagsumpo sa mga progresibo ug demokratikong organisasyon sa tibuok India sa alegasyon sa “pakiglambigit sa mga Maoista.” Nakasinati usab sa pagpamig-ot ug reyd ang uban pang mga organisasyon sa laing estado sa India sa mga gama-gamang alegasyon. Taktika kuno kini aron sumpuon ug pahilumon ang tanang tingog sa oposisyon ug kritisismo sa gubyerno sa India.

Ang serye sa koordinadong mga reyd gipatuman sa 64 ka lokasyon sa mga estado sa Jharkhand, Bihar, Uttar Pradesh, Andhra Pradesh ug Telangana.