Sunud-sunod nga protesta ang gilunsad sa mga grupong mag-uuma ug ilang mga tigsuporta isip pagdumdum sa Bulan sa Mag-uuma. Nagmartsa ngadto sa Mendiola sa Maynila niadtong Oktubre 20 ang gatusan ka mga mag-uuma gikan sa Cavite, Laguna, Batangas, Rizal, Tarlac, Bulacan, Pampanga, Albay, Sorsogon, Camarines Sur, Masbate ug Negros Occidental sa gitawag nilang Adlaw sa Protesta batok sa Pagpangilog og Yuta, Inhustisya ug Gutom.

Niadtong Oktubre 18, gidumdum sa mga mag-uuma ang World Hunger Day pinaagi sa pagprotesta atubangan sa Department of Agriculture. Gimakmak nila ang bakak ni Marcos nga misaka na ang palit sa humay ngadto sa ₱24 kada kilo. Matud nila, anaa sa ₱18-₱20 lamang ang palit sa mga humay, ug nabalaka silang moubos pa kini ngadto sa ₱12 kada kilo atol sa anihan.

Gidumdum usab sa kababayen-ang mag-uuma ang International Rural Women’s Day niadtong Oktubre 15 sa usa ka protesta batok sa kawad-on sa yuta, gutom ug militarisasyon.