Gipatay sa mga pwersa sa Armed Forces of the Philippines (AFP) sa tulo ka magkabulag nga insidente ang usa ka 2 anyos nga bata ug lima ka sibilyan sa Negros Occidental, Abra, ug Western Samar sa milabayng mga semana. Niini nga mga insidente, gipagawas sa AFP nga mga manggugubat sa Bagong Hukbong Bayan (BHB) ang mga biktima aron tabunan ang ilang krimen.

Sa Western Samar, gipaulanan og bala sa mga sundalo sa 63rd IB ang balay sa pamilyang Obiado sa Sityo Salvacion, Barangay San Nicolas, San Jose de Buan niadtong Setyembre 25. Diha-dihang napatay sa pagpamusil ang mag-uumang si Ronie Obiado ug 2-anyos niyang apo nga si Intoy, samtang nakaluwas ang tulo pa, kauban ang ginikanan ug lola sa bata. Ingonman, wala pa nahibaluan ang nahimutangan sa asawa ni Obiado human ang insidente.

Sa Negros Occidental, basta na lamang gipusil-patay sa mga sundalo sa 79th IB ang magtiayong mag-uuma nga silang Christian Job Vargas ug Mailyn Salgado niadtong Oktubre 17 sa Sityo Nabalas 1, Barangay Canlusong, E.B. Magalona.

Nailo sa mag-asawa ang ilang mga anak nga may edad lima, usa ka tuig, ug lima ka bulan.

Sa Abra, gipatay sa 77th IB ang 68-anyos nga mag-uumang si Antonio Diwayan Agliwan nga nag-inusara sa iyang balay sa Sityo Talipugo, Barangay Buneg, Lacub, niadtong Oktubre 13 sa hapon. Giduso sa mga paryente sa biktima nga sibilyan si Agliwan.

Samtang, gitin-aw sa BHB-Abra nga sibilyan ug dili Pulang maggugubat ang napatay sa mga sundalo niadtong Oktubre 3 sa utlanan sa Barangay Gacab, Malibcong ug Barangay Ableg, Daguioman sa Abra. Sukwahi sa ginaingon sa 24th IB, walay nahitabong engkwentro dinhi.

Pag-aresto. Giaresto sa mga pwersa militar ang 70-anyos nga si Dolores Rapsing-Belibit, igsuon sa martir nga si Jose Rapsing, sa Barangay Bolo, Masbate City, Masbate niadtong Setyembre 30. Gipasakahan siya og mga kaso sa pagpatay, sulayng pagpatay, ug uban pang krimen nga matud sa mga paryente pulos tinumo-tumo sa militar.

Iligal usab nga giaresto sa mga pwersa sa estado silang Nilo Mabuti Almoradie, 58 anyos, ug Melanie Tupas Amor sa Barangay Piña, San Jacinto niadtong Oktubre 2 sa mga kasong pagpatay. Walay basihan nga giakusahan si Almoradie nga “3rd most wanted” sa lungsod sa San Jacinto.

Giaresto sa wala pa naklaro nga mga kaso ang organisador sa mga minorya nga si Reymart Moneda niadtong Oktubre 16 sa Barangay Magsaysay, Infanta, Quezon sa mga sundalo sa 1st IB. Nakadetine siya sa istasyon ng pulis sa Infanta.

Pagpanglugos. Duha ka babaye sa Bongabong, Oriental Mindoro ang gilugos sa mga sundalo sa 203rd IBde ug CAFGU niadtong Agosto, matud sa taho sa National Democratic Front-Mindoro niadtong Oktubre 8.

Gilugos si “Rose” sa mga elemento sa CAFGU niadtong Agosto 28 sa Barangay Hagan. Ang ikaduhang biktima nga si “Ana” usa ka katutubong residente sa Barangay Lisap.

Pagpamomba. Walay hunong nga nanganyon sulod sa usa ka semana gikan sa Setyembre 23 hangtud Setyembre 29 ang 87th IB sa barangay San Nicolas ug Aguingayan sa San Jose de Buan, Western Samar. Niadtong Setyembre 23, dili moubos sa 17 ka kanyon ang gipabuto niini gikan alas-8 sa gabii hangtud alas-4 sa kaadlawon pagka-ugma.

Pagpangulata. Niadtong Oktubre 3, gikulata sa mga elemento sa 203rd IBde ang tulo ka Mangyan-Buhid nga mga residente sa Barangay Manoot, Rizal, Occidental Mindoro. Iligal usab nga gidakop sa mga pasista si Nano Dam-in.

Pagpamig-ot. Gituuk, gilampaso ang nawong sa yuta, ug gihulgang patyon sa mga sundalo sa 2nd IB ang kasamtangang barangay tanod ug mikandidatong kagawad sa Barangay Matubinao, Cataingan, Masbate nga si Ariel Urag niadtong Oktubre 12. Giatake sa 15 ka sundalo ang balay arong hadlukon si Urag ug pasundon sa ilang mga mando.

Niadtong Oktubre 12, gipadala sa Department of Justice ang usa ka subpoena o pagpatawag kang Jonila Castro ug Jhed Tamano aron atubangon ang mga kasong perjury ug slander nga gipasaka sa 70th IB. Nagtoo ang mga grupo sa tawhanong katungod nga kini pulos pagpamig-ot ug pagpanimalos human gibutyag sa duha ang gihimong pagdagit, tortyur ug iligal nga detensyon sa militar kanila.

Gipaharan sa kanhing presidente Rodrigo Duterte ang kinabuhi ni Deputy Minority Leader ug ACT Rep. France Castro sa usa ka programa sa telebisyon niadtong Oktubre 11. Matud ni Duterte, mga sama ni Castro ang target sa intelligence fund ug “kinahanglang patyon.”

Sa Camarines Norte, nataho ang unum ka kaso sa intimidasyon ug pagpanghadlok sa mga lungsod sa Labo ug Jose Panganiban sa tunga-tunga sa Agosto 11 ug Oktubre 3. Ang pipila sa mga mag-uumang biktima nakasinati og tortyur.

Pagpamusil. Niadtong Setyembre 27, usa ka grupo sa mga minorya ang gisulayan sa pagmasaker dihang girakrakan sila sa mga sundalo sa 9th IB sa Sityo Mapatong, Barangay Malaya sa lungsod sa Labo. Human niini, usa ka katribu nila ang gidakop ug gipreso.

Gipabuthan usab sa 62nd IB ang komunidad sa Sityo Kapaklan, Barangay Santol, Binalbagan, Negros Occidental niadtong Oktubre 6.