Barikada kontra-demolisyon sa Angeles City. Nagmuntar og barikada niadtong Oktubre 16 ang mga lumulupyo sa Sityo Balubad, Barangay Anunas, Angeles City aron batukan ang planong demolisyon sa Clarkhills Properties Corporation sa ilang mga balay. Maigo sa demolisyon ang kapin 500 ka balay ug 2,000 ka residente sa 72-ektaryang yutang ginailog sa maong kumpanya.

Reklamasyon sa Dumaguete City, gibabagan. Kapin 200 ka tawong-simbahan, mga tigpanalipud sa kinaiyahan, kabatan-onon ug residente sa baybayon sa Dumaguete City ang nagtapok sa Pantawan, Rizal Avenue, Barangay 5 alang sa “Ecumenical Walk for Creation” niadtong Oktubre 15. Gipanawagan nila ang pangkinaiyahang hustisya ug proteksyon batok sa magun-ubong proyektong reklamasyon.

Human chain batok sa reklamasyon. Kapin 600 ka indibidwal, sa pagpanguna sa Kalikasan PNE ug Pamalakaya, ang naghimo og human chain sa Roxas Blvd, atubangan sa Manila Bay, aron iduso ang paghunong sa mga proyektong reklamasyon sa tibuok nasud. Nagpadayon ang dredging o pagkalot og bonbon sa Manila Bay taliwala sa mando ni Marcos Jr nga ipasuspendi kini.