Inrussuat iti nadumaduma a paset ti pagilian dagiti panagrambak, panagtatabuno ken miting-panagadal dagiti sangay ken komite ti Partido Komunista ng Pilipinas (PKP), dagiti yunit ti New People’s Army (NPA), ti National Democratic Front of the Philippines (NDFP) ken dagiti alyado nga organisasyon na, iti maudi a dua lawas ti Disyembre 2023. Daytoy ket kas pananglagip iti maika-55 anibersaryo ti Partido idi Disyembre 26.

Kangrunaan a tinalakay kadagiti panagtatabuno ti pahayag ti Komite Sentral (KS) ti Partido iti okasyon ti anibersaryo. Nalatak kadagiti talakayan ti tignayan a panagilinteg nga itantandudo ti Partido iti panangiyuna ti KS.

Inwaragawag ti Partido a “mapangngeddeng ken naregget nga itandudo ti maysa a kumprehensibo a tignayan panagilinteg para iti napateg a pannakidangadang tapno ilaksid ti mapangdadael nga epekto ken impluwensya ti nadumaduma a tendensya ti burges ken petiburges a suhetibismo.”

Iti sumagmamano a larangan, nagiyaramid ti simple a panangtatabuno ken programa kakuyog ti masa. Adda met dagiti pangkultura a panagpabuya. Inrussuat dagitoy nga aktibidad iti sango ti focused military operations iti sumagmamano a larangan, ken limed iti kaammoan ti kabusor iti sikreto a nagummungan iti syudad.

Sakbay ken iti aldaw ti anibersaryo, nagiyaramid met kadagiti panagsapata dagiti kadre ken kameng ti Partido, karaman dagiti adda iti uneg ti hukbo ti umili, tapno patibkeren ti takder da iti konstitusyon ken programa na.

KM iti Southern Tagalog

Karaman kadagiti nagrambak ti ginasut nga agtutubo iti agduduma a paset ti Southern Tagalog iti panangiyuna ti Kabataang Makabayan (KM) iti rehiyon. Tinalakay dagiti balangay na ti pahayag ti KS ken Komiteng Rehiyon ti Partido. Ti sumagmamano kadakuada ket nagrambak iti uneg ti larangan gerilya, kakuyog ti NPA.

Segun kenni Karina Mabini, tagapagsarita ti pangrehiyon a balangay ti KM, nasken laeng a sublian-panagadal agpada dagiti balligi ken kakapuyan tapno agtultuloy nga agdalluyon kakuyog ti umili. Nabara kano ti nagbalin a panangawat dagiti kameng da iti panawagan para iti tignayan panagilinteg.

Panangibingay ti KM-Southern Tagalog, iti panagtatabuno dagiti balangay na iti syudad, karaman iti nagbalin a programa ti panagplano iti panagirussuat ti panagtapog kadagiti yunit ti NPA. Nagibingay met ti kapadasan iti makuna nga aktibidad dagiti kameng ti KM-Southern Tagalog a siguden a simrek iti yunit ti hukbo ti umili.

Kabayatan na, nagbalin a naragsak ken natalged kano ti nakem dagiti miyembro ti KM iti nagbalin a panagrambak iti uneg ti yunit ti hukbo ti umili. Panagistorya ti sumagmamano a dimmar-ay, “makapangato ti pakinakem iti panangituloy ti kampanya a masa ken panag-abante ti rebolusyon.” Iti maysa a panagkakape sakbay a nagsubli iti syudad, imbingay dagiti bimmisita a sigida a limmag-an ti barukong da ken napukawan ti kibbayu idi makadanon iti larangan gerilya ken nakita nga adda idiay dagiti kadua a Nalabaga a mannakigubat. Ti sumagmamano kadagiti miyembro ti KM-Southern Tagalog ket nagpa-ibatin iti yunit tapno agserbi kas pultaym a mannakigubat.

Internasyunal a panangkablaaw

Nangipadanon met ti pannakikaykaysa ken panangkablaaw dagiti nadumaduma nga internasyunal a partido ken organisasyon iti okasyon ti anibersaryo ti Partido. Nagiruar ti pahayag ti pannakikaykaysa dagiti organisasyon manipud idiay India, Turkey, United States, ken Ireland, ken ti Friends of the Filipino People in Struggle (FFPS).

Iti bidyo-pahayag ti Komite Sentral ti Communist Party of India (Maoist), rinaem na ti PKP iti surok lima dekada a panangidaulo iti nailian-demokratiko a pannakidangadang ti umili a Pilipino. “Agsipud surok lima dekadan ti napalabas, umab-abante ti nailian-demokratiko a pannakidangadang ti Pilipinas iti tarabay ti Komite Sentral ti PKP iti sango dagiti saan a mabilang a pannubok ken panagrimbaw kadagiti nagbiddutan ken kakapuyan ken dagiti panaglikko’t tayyek,” segun iti CPI (Maoist).

Binigbig met ti Anti-Imperialist Action-Ireland ti “natured a baro nga addang” ti Partido iti panagirussuat ti tignayan panagilinteg. Kuna ti grupo, ” agibunga daytoy ti baro nga henerasyon dagiti mangibandera ti rebolusyon ken rebolusyonaryo manipud iti intar ti umili a Pilipino.” Nayon da pay, sibubukel ti talek da iti Partido ken maipagpannakkel a maimatmatangan da ti maysa a barbaro a napateg a tukad iti rebolusyon a Pilipino.