Naragsak a sinarabo dagiti kadre ken komite ti Partido iti intero a pagilian ti panawagan ti Komite Sentral idi maika-55 anibersaryo nga itandudo ken anayén ti tignayan a panagilinteg tapno mapapigsa ti Partido iti panangidaulo na iti umili a Pilipino iti panaglaban iti rehimen US-Marcos ken panagabante ti demokratiko a rebolusyon ti umili.

Napnuan ti baro a rebolusyonaryo nga enerhiya ken determinasyon dagiti kadre, aktibista a masa ken dagiti mannakigubat. Nariing da iti panagamiris ti Komite Sentral iti agdama a sitwasyon ken iti kritikal-iti-bukod a panagtasa na iti nagbalin a taray ti rebolusyonaryo a tignayan iti naglabas a tawtawen. Sibubukel ti pangngeddeng da nga ilinteg dagiti nagbalin a panagbiddut, kakapuyan ken kakurangan, ken papigsaen ti Partido ken rebolusyon a Pilipino.

Sinilawan ti Partido ken Komite Sentral ti dalan agturong iti barbaro a panagpapigsa ken panangitandudo ti rebolusyon iti dumteng a panawen. Inlaksid na dagiti burges ken petiburges a kapanunotan ken moda ti panagpanunot iti uneg ti Partido. Gapuanan dagitoy dagiti Kannawan ken “Kannigid” a panagbiddut, kakapuyan ken oportunista a tendensya a nagbalin a lapped iti panagabante ti rebolusyon iti naglabas a tawtawen. Dagitoy a panagbiddut ket nangibuangay kadagiti pannakapaay ken panagsanud iti tay-ak ti armado a pannakidangadang, uray met iti tay-ak ti rebolusyonaryo a tignayan masa iti syudad ken kaaw-awayan.

Ti tignayan a panagilinteg, iti kangrunaan, ket maysa a tignayan a panagadal iti Marxismo-Leninismo-Maoismo ken kadagiti basaran a prinsipyo ti Partido. Panggep na a lalo a patibkeren ti Partido iti ideolohiya kas natibker a tarawidwid para iti panangipatungpal na kadagiti rebbengen iti nadumaduma a tay-ak ti rebolusyonaryo a trabaho.

Determinado dagiti kadre ti Partido nga agbasa ken makitinnalakay kas wagas iti panagsubli-adal kadagiti basaran a rebolusyonaryo a prinsipyo. Sibubukel ti pangngeddeng da nga asaen ti proletaryo a panagpampanunot da tapno natadem nga amirisen dagiti kapadasan da, agdillaw iti bagi ken mangbukel ti usto a plano iti panagabante.

Dagiti sursurat ti pimmusay a daulo a tagapagbangon ti Partido a ni Kadua Jose Maria Sison, kasta met dagiti klasiko nga insurat dagiti natan-ok a mannuro a komunista a da Marx, Engels, Lenin, Stalin ken Mao ken nasudi a subsublianan-adal dagiti kadre ken rebolusyonaryo a pwersa. Panggep da nga ingato ti kaammoan da iti teorya tapno agserbi a tarabay iti panagadal kadagiti praktikal wenno inaldaw-aldaw a problema iti panagitandudo ti armado a pannakidangadang ken rebolusyonaryo a tignayan masa.

Iti balabala ti tignayan a panagilinteg, maysa a tignayan iti pangkagimongan a panagsukisok ken panagamiris iti dasig (SICA) ti inrussuat ti Komite Sentral iti rugi ti tawen ken isaysayangkat iti amin a tukad ti Partido iti kaaw-awayan ken syudad—manipud iti nailian a panangidaulo aginggana kadagiti basaran a sangay. Patpatignayen ti Komite Sentral dagiti kadre ken aktibista tapno ammoen ken ireport ti kongkreto a kasasaad ti masa iti saklaw da tapno mapauneg ti panangawat iti lalo a kumarkaro a pannakalungsot ti malakolonyal ken malapyudal a sistema. Partikular a panggep daytoy a tignayan a tudduen dagiti nalatak a problema ken isyu ti masa kas basaran ti panagbukel ti plano tapno reppeten ken patignayen ida kadagiti pannakidangadang tapno ilaban ti pagbiagan ken demokratiko a karbengan da.

Ti napakumbaba a panagdillaw-iti-bukod ti Partido ken panagirussuat ti tignayan a panagilinteg ket pakakitaan ti diyalektiko ken istoriko materyalista a takder a marka ti partido komunista a napudno iti interes ti proletaryado ken amin a dasig a maidaddadanes ken magunggundawayan. Iti kastoy a pamuspusan, natalek ti Partido a maparegta manen ti panagabante ti rebolusyon, marekober dagiti napukaw ken maiyapan ti rebolusyonaryo a pannakidangadang iti barbaro a tukad ti panagabante.

Iti partikular, makitkita ti Partido a babaen ti tignayan a panagilinteg ket maitandudo ti rebolusyonaryo a tignayan iti amin a tay-ak a wagas. Rumbeng a pagiggeman ken komprehensibo nga itandudo ti Partido ti panangiyabante ti naunday a gubat ti umili babaen iti nasaklaw ken nairteng a gerilya a pannakigubat basar iti a lumawlawa ken umun-uneg a base a masa, wenno iti sabali a sarita, komprehensibo ken agsisinnilpo a panangitandudo ti armado a pannakidangadang, agraryo a rebolusyon ken panangpapigsa ti organisado a base a masa.

Ti panangitandudo ti armado a pannakidangadang ket iyab-abante ti panangitandudo ti rebolusyonaryo a tignayan masa iti syudad ken iti kaaw-awayan, kabayabay ti panangpapigsa ti antipasista, anti-imperyalista ken antipyudal a tignayan laban iti agturturay a parigat, aso-aso ken pasista a rehimen US-Marcos, panangpalawa ti nagkaykaysa a prente, ken panangpa-irut ti pannakikabsat iti internasyonal a tignayan nga anti-imperyalista ken sangalubongan a tignayan ti dasig a proletaryo.

Tantannawagan ti Partido nga iti tarabay ti tignayan a panagilinteg, magun-od ti dadakkel a panagabante kadagiti umay a tawen. Itatta, nagaed nga agtigtignay dagiti yunit ti New People’s Army tapno makapaluspus kadagiti dadakkel a focused military operation ti kabusor. Sibubukel ti pangngeddeng ti NPA a lalo a palawaen ti saklaw dagiti larangan gerilya na ken palawaen ti base a masa, kabayatan a napinget a lablabanan kakuyog dagiti masa a mannalon ti agmauyong ken mawwaw-iti-dara nga armado a panaglapped ti AFP.

Iti sango ti kumarkaro a panagsagaba iti kaaw-awayan, tantannawagan ti Partido ti panangpatignay iti ginasut ribu aginggana milyun-milyon a mannalon ken masa a minorya iti intero a pagilian laban kadagiti kumarkaro a langa ti pyudal ken malapyudal a pananggundaway, ken laban iti panagagum ti daga ken agresibo a panagserrek dagiti operasyon iti panagminas, plantasyon, dagiti proyekto nga imprastruktura, ekoturismo ken dadduma pay a manggamgamrud iti kinabaknang ken aglawlaw.

Iti sango ti kumarkaro a panagsagaba iti syudad, tantannawagan ti Partido ti lalo a panagpigsa dagiti pannakidangadang masa a pang-ekonomya ken pampulitika ti naduma-duma a demokratiko a sektor laban kadagiti patakaran a maka-ganggannaet ken parigat ti rehimen US-Marcos. Ti panagpigsa ti rebolusyonaryo a tignayan iti syudad ket direkta nga agserbi iti panagpalawa ti suporta ken naruay a panagkameng dagiti mangmangged, mala-mangmangged, dagiti agtutubo nga estudyante, mannuro ken dadduma pay nga intelektwal iti NPA.

Ti panagirussuat ti Partido ti umuna ken maikadua a naindaklan a tignayan panagilinteg ket agpada a napateg a tukad iti pakasaritaan ti Partido nga agpada a nangibaw-ing iti rebolusyon a Pilipino agturong iti dalan ti barbaro a panagabante. Ti agdama a tignayan a panagilinteg nga ingga’t-bael ken napinget nga itantandudo dagiti kadre ken mannakigubat—kas iti umuna ken maikadua—ket sigurado a maaddaan ti historikal a pateg na a mangidanon iti demokratiko a rebolusyon ti pagilian iti baro a tukad ti panagabante.