Inragpin ni Ferdinand Marcos Jr, kakuyog dagiti kakumplot na iti Kongreso ken Senado, ti ₱6.17 bilyon iti badyet ti Department of National Defense iti impasa ken pinirmaan na a nailian a badyet para iti 2024 idi Disyembre 20, 2023.

Laksid iti DND, ninayunan met ni Marcos ti badyet ti Philippine Coast Guard iti ₱2.8 bilyon ken ti National Intelligence Coordinating Agency (NICA) ti ₱1 bilyon. (Ti nayon a badyet iti NICA ket ngangngani doble iti orihinal a badyet na a ₱1.432 bilyon.)

Iti tukad-Kongreso ken Senado pay laeng, naingaton ti badyet iti depensa iti 21.6% manipud ₱203.4 bilyon idi 2023 agturong ₱282.7 bilyon ita a tawen. Nayon pay ditoy ti ₱1.5 bilyon a confidential ken intelligence fund para kano kadagiti operasyon na idiay West Philippine Sea. Nu buklen, kangatoan ita ti inted a pondo iti DND ken dadduma pay nga ahensya a pangseguridad manipud 2017. Kabatog daytoy ti nasurok 1.25% ti GDP, kangatoan met iti napalabas a 15 tawen.

Ibagbaga da Martin Romualdez ken Juan Miguel Zubiri, dagiti daulo ti Kongreso ken Senado, a ti nayon a pondo ket para iti “panangsango ti pangta” ti China idiay West Philippine Sea. Ibagbaga met ni DND Secretary Gilbert Teodoro a para daytoy iti “nakaro ken seryoso a panangtarimaan” kadagiti pasilidad ken usar ti militar ti AFP. Agserserbi ti agpada a panggep iti turungen ti US a papigsaen ti panangdurdurog na ti gerra idiay South China Sea ken iti panangiyaplag ti network ti bukod na a base ken pasilidad militar iti uneg dagiti kampo ti AFP, amin usar ti kwarta ti umili a Pilipino.

Ninayunan ti pondo militar iti tengnga ti sayanggusing a pangta ti destabilisasyon manipud iti intar ti retirado nga heneral nga iggem ti bunggoy a Duterte. Dakkel a paset pay dagiti opisyal militar ti pumabpabor iti bunggoy, uray payen retirado ti kaaduan kadagiti napaboran nga heneral na. Bumbumsog ti soldado, pati dagiti pulis, iti poder ni Duterte. Nadoble dagiti sweldo da ken aglalaok ti naited kadakuada a benepisyo. Gasut-gasut a milyon a piso ti inggungguna kadagiti heneral, kumander ken soldado iti panagpapatay da, kaaduan dagiti sibilyan. Nangibukbok ti bunggoy a Duterte ti kurakuten a pondo iti langa ti Support to Barangay Development Program ti NTF-Elcac. Iti uneg ti innem a tawen, bilyun-bilyon a piso ti inted ti bunggoy tapno gumatang kadagiti nagalusan a jet fighter, bapor, drone, kanyon ken aglalaok a sarplas nga ramit militar manipud iti US ken dagiti alyado na a pagilian, kas ti Israel.

Iti kaunggan, awan sabali ti “modernisasyon” ti AFP nu saan a panaglako ken panangigabsuon ti US ti sarplas ken kaaduan daan a ramit na tapno armasan ti aso-aso nga hukbo na. Nakaturong ngangngani amin ti ginatang nga armas iti “panangparmek” iti rebolusyonaryo nga armado a tignayan” ken saan nga iti “eksternal a pangta,” kas iti masansan a deklarasyon ti AFP. Agbinnulig nga interes ti US ken AFP a parmeken ti rebolusyonaryo a tignayan gapu ta pangta daytoy iti hegemonya na iti Asia gapu iti naisangsangayan a lokasyon ti Pilipinas iti rehiyon. Iti kagyat, pappapigsaen ti US ti kampanya ti AFP a “rebbeken” ti New People’s Army gapu ta kayat na a sibubukel nga aramaten ti aso-aso nga hukbo iti panangdurog ti gerra iti China.

Kas kenni Duterte, us-usaren ni Marcos ti dakkel a pondo iti “modernisasyon” tapno konsolidaen ti kontrol na iti mersenaryo a militar ken gatangen ti kinapudno ken kinamatalek dagiti paksyon a tengngel ti kalaban na a bunggoy.

Iti linged ti “seguridad” ken confidentiality, mailisi ti “modernisasyon” ti AFP iti adu a proseso nga inkeddeng iti Procurement Law. Makalusot daytoy iti public bidding, tapno igagara nga ilimed iti publiko ti proseso ti pananggatang kadagiti armas. Iti kasdiay, alisto a manipulaen dagiti opisyal militar dagiti kangrunaan a kontrata ken dagiti nakasilpo a kontrata iti serbisyo ken pyesa.

Kadakkelan a naggastaran ti AFP ti panaggatang kadagiti jet fighter, drone, helikopter ken kanyon tapno irussuat ti kampanya ti awan sarday a panagbombomba ken panagkanyon. Immarangkada daytoy a kampanya iti poder ti rehimen Duterte ken gapuanan ti nakaro a didigra kadagiti sibilyan a komunidad ken kabakiran.