Dua a sibilyan ti pinapatay dagiti soldado ti Armed Forces of the Philippines (AFP) idi Disyembre 10 idiay Iloilo ken Disyembre 17 idiay Sorsogon idi napalabas a tawen. Kabayatan na, pinatay met ti militar ti dua a sibilyan a nangsangaili iti kabagyan da a Nalabaga a mannakigubat idiay Batangas idi Disyembre 17, 2023.

Pinatay dagiti mawwaw ti dara a pasista ti 31st Division Reconnaisance Company (DRC) ti addaan diperensya iti panunot a sibilyan a ni Bombik Bajoyo idi Disyembre 10, 2023 idiay Sitio Tagbakan 1, Barangay Jayubo, Lambunao, Iloilo. Parparuaren dagita pasista a miyembro ti New People’s Army (NPA)-Central Panay ni Bajoyo ken napatay isuna iti maysa nga engkwentro.

Pinaneknekan dagiti residente ti Sityo Jagnaya a sibilyan ni Bajoyo ken addaan diperensya iti panunot. Posible kano a pinatay isuna dagiti soldado idi napagbiddutan a Nalabaga a mannakigubat. Innem a tawenen nga agnanaed idiay Sityo Tagbakan ti biktima, segun kadagiti residente.

Idiay Sorsogon, pinapatay ti 31st IB ni Joseph Esperanzate iti balay na idiay Purok Iraya, Barangay Union idiay ili ti Gubat, idi Disyembre 17, 2023 banda ti alas-4 ti bigat. Sigud a kameng ti NPA ni Esperanzate ngem nabayagen a pimmanaw iti hukbo ken nagbiag kas sibilyan.

Manipod 2019, kankanayon isuna a pilpiliten ti militar a pumauneg iti E-CLIP ngem nagkedked isuna ken imbaga a kayat na ti agbiag a naulimek.

Idiay Batangas, napatay ti 59th IB dagiti sibilyan a da Pretty Sheine Anacta, 19, ken ni Rose Jane Agda, 30, iti awan aniaman a panagpalpaltog na idiay Barangay Malalay, Balayan, Batangas idi Disyembre 17, 2023 ti agsapa. Pimmasyar ti dua iti kabagyan da a Nalabaga a mannakigubat ti NPA idi mapapatay.

Segun iti nakalap a report ti NPA, naawanan puot ni Pretty Sheine iti umuna a pugsu ti panagpaputok dagiti pasista a tropa, sakbay isuna a binulunan a patayen ti militar. Makapaalinggaget met ti sitwasyon ni Rose Jane idi makita ti bangkay na iti punerarya nu sadino a nakababa ti pantalon na, pakakitaan a ginundawayan isuna.

Kabayatan na, kinemmeg ken aginggana ita ket saan pay nga inlung-aw ti militar ti nasugatan a mannakigubat a ni Baby Jane Orbe (Ka Binhi). Awanan isuna iti kasasaad a lumaban. Maiparbeng kadagiti pagannurutan ti internasyonal a makatao a linteg, rumbeng a bigbigen dagiti karbengan na ti kasinnupadi nga armado a pwersa. Nagmartir met ti lima a Nalabaga a mannakigubat iti makuna a panagatake.

Panagdukot. Dinukot ti tropa ti 62nd IB ti agtutubo a mannalon a ni Allan Paul Rayna manipud iti balay ti pamilya na idi Disyembre 23, 2023 idiay Sityo Tayubong, Barangay Puso, La Castellana, Negros Occidental. Saan pay isuna a nasarakan aginggana iti agdama. Nalaus ti panagdanag ti pamilya Rayna iti kasasaad ti kabagyan da.

Panangpatakyas. Aginggana Enero 6 laengen ti dedlayn ti Authority of the Freeport Area of Bataan (AFAB) iti 200 pamilya a residente ti Narra Dormitory idiay Barangay Maligaya, Mariveles, Bataan tapno pumanaw. Patpatakyasen dagiti residente gapu ta masaklaw ti panagpalawa ti FAB ti makuna a lugar.