Maituloy ti protesta ken sangsangkamaysa a panagtignay dagiti drayber ken opereytor ti dyip kontra iti inkapilitan a konsolidasyon ti prangkisa ken panangipatungpal ti ubbaw a Public Utility Vehicle Modernization Program (PUVMP) iti panaglukat ti tawen 2024. Daytoy ti sungbat da iti saan a panangikankano ni Ferdinand Marcos Jr iti arungaing dagiti drayber ken opereytor. Segun iti Pagkakaisa ng mga Samahan ng Tsuper at Operator Nationwide (Piston), pammaneknek ti kinaawan-aksyon ni Marcos a “palpak, parigat, ken aso-aso” ti rehimen na.

Idi Disyembre 2023, impakita ti Piston ken Samahang Manibela Mananakay at Nagka-Isang Terminal ng Transportasyon (Manibela) ti panagsupiat da iti PUVMP iti nagsasaruno a sardeng-pasada ken nasaknap a protesta iti pagilian, kangrunaan idiay Metro Manila. Mapattapatta a sumurok-kumurang 4,000 ti limmaok iti protesta ti dua a grupo idiay Mendiola idiay Manila idi Disyembre 29, 2023. Surok 330 dyip ti kuyug-kuyug dagiti drayber iti protesta. Limmaok iti protesta idiay Manila dagiti drayber ken opereytor ti Starter-Piston ken Manibela manipud Southern Tagalog.

Iti sabali a paset ti pagilian, nagkaykaysa met kadagiti panagtignay ken kampuan dagiti drayber ken opereytor kontra iti panangmasaker iti pagbiagan da. Idiay Bacolod City, dimmanon iti 2,000 ti limmaok iti martsa-protesta ken sardeng-pasada idiay syudad idi Disyembre 29, 2023. Nagmartsa da agturong iti munisipyo tapno singiren ti lokal a gobyerno iti sungsungbatan na iti panangipatungpal ti PUV phaseout.

Idiay Davao City, nagsardeng-pasada ti Transmission-Piston idi Disyembre 27, 2023. Mapattapatta a naparalisa ti grupo ti 70% ti amin a ruta ti dyip iti syudad. Idiay Cebu City, nagkampuan dagiti kameng ti Piston-Cebu iti opisina ti Land Transportation Franchising and Regulatory Board (LTFRB) Region 7 idi Disyembre 28, 2023 aginggana Disyembre 29, 2023. Idiay Iloilo City, nagsardeng-pasada ken nagkampuan dagiti drayber ken opereytor iti upisina ti LTFRB Region 6 idi Disyembre 27, 2023 aginggana Disyembre 28, 2023.

Mamati ti Piston nga iti laeng pumigpigsa a pwersa da ken agtultuloy a sangsangkamaysa a panagtignay ita a 2024 a malabanan ti panggep a PUVMP ti rehimen a mangmasaker iti pagbiagan da.

Kabayatan na, binaun idi Disyembre 28, 2023 ti Korte Suprema ti Department of Transportation (DOTr) ken ti LTFRB nga agkomento iti petisyon nga indasar ti Piston kontra iti panangipatungpal ti inkapilitan a konsolidasyon ti prangkisa ken PUVMP. Naikkan ti dua nga ahensya iti aginggana 10 aldaw tapno agkomento.