Nagtabuno idi Pebrero 15 dagiti nasurok 100 nga organisasyon ken indibidwal iti uneg ti No to Chacha Network tapno suppiaten ti panggep ti rehimen Marcos a baliwan ti Konstitusyon 1987 (charter change wenno chacha), babaen iti aniaman a porma. Inwaragawag da met ti pananglagip iti maika-38 tawen ti Panagrukkuas EDSA, a kunada ket basaran nu apay nabukel ti makuna a konstitusyon.

Kontra dagiti grupo kadagiti panaggandat a baliwan ti konstitusyon babaen man iti ubbaw a people’s initiative wenno constituent assembly. Kunada, dagitoy a gandat ket “saan a kasapulan, mapanggudua, nagastar, ken nakaturong kangrunaan iti panagtalinaed iti pwesto dagiti adda iti poder”.

Imbes a pakakumikuman ti chacha, kiniddaw dagiti grupo ken indibidwal a pokusan dagiti adda iti pwesto ti panangingato ti sweldo ken pastrek, panangpababa ti presyo dagiti gagatangen ken basaran a utilidad, panangurnos kadagiti serbisyo pangkagimongan, panangpukaw iti korapsyon ken red tape (naggaatiddog a proseso ken pila iti burukrasya), panangitandudo kadagiti karbengan-tao, hustisya ken kappia, panangsalaknib iti soberanya idiay West Philippine Sea, panangsalwad iti aglawlaw ken panangsigurado ti nadalus ken nakapappapati nga eleksyon.

Dimmar-ay iti panagtatabuno dagiti nailian-demokratiko nga organisasyon, dagiti kongresista ti bloke a Makabayan, miembro ti 1Sambayan, sigud nga opisyal ti gobyerno, taong-simbaan, grupo estudyante, mannuro, ken dadduma pay a grupo iti tegged ken adu pay. Adda met idiay da Justice Antonio Carpio, Commissioner Rene Sarmiento, Atty. Neri Colmenares, Sr. Mary John Mananzan, sigud a DSWD Sec. Judy Taguiwalo, Bishop Gerardo Alminaza, daulo ti One Negros Ecumenical Council (ONE-C) ken obispo ti San Carlos City ken dadduma pay.

Pimmirma met iti pinagmaymaysa a deklarasyon ti sigud a senador a ni Kiko Pangilinan, Atty. Lutgardo Pilario, presidente ti Adamson University, Dr. Noel Leyco, sigud a presidente ti Pamantasan ng Lungsod ng Maynila, ken ni Diwa Guinigundo, sigud a deputy governor ti Bangko Sentral ng Pilipinas.

Kabayatan na, agsusumbangir nga aktibidad ti inrussuat ti naduma-duma a grupo tapno suppiaten ti chacha ita a bulan.

Idiay Bacolod City, nagtabuno dagiti taong-simbaan ken dagiti demokratiko nga organisasyon iti panangiyuna ti ONE-C idi Pebrero 10 tapno irussuat ti maysa a nasaknap a kampanya laban iti chacha. Idi Pebrero 8, nareppet iti alyansa a Way Chacha (Awan Chacha) ti naduma-duma nga indibidwal idiay Davao City laban kadaytoy. Imbangon met dagiti naduma-duma a demokratiko nga organisasyon ti No To Charter Change Coalition-Panay idiay Iloilo City Idi Pebrero 20.

Iti aldaw dagiti puso, nagmartsa agturong Mendiola dagiti grupo ti mannalon ken babbai laban iti Rice Liberalization Law. Kiddaw da: taraon iti lamisaan, saan a chacha!

Idi Pebrero 16, nagmartsa dagiti agtutubo ken estudyante ti University Belt idiay Manila tapno iwaragawag ti panagsuppiat iti komersyalisasyon ti edukasyon ken pananglaban iti makaganggannaet a chacha ti rehimen Marcos. Kunada, palpalubusan ti chacha ti sibubukel a panagtagikua ti ganggannaet iti panangpataray ti edukasyon a lalo a mangparigat kadagiti agtutubo.

Iti kapada nga aldaw, nagtabuno dagiti mangmangged iti EDSA Shrine iti uneg ti kiddaw a “nayon sweldo, saan a chacha.” Sakbay na, idi Pebrero 14, nagirussuat da ti panagtignay iti sango ti Senado, kagiddan ti panangdengngeg iti gakat a P100 nayon-sweldo nga indasar iti kapulungan.