Nagtipon sadtong Pebrero 15 ang masobra 100 ka mga organisasyon kag indibidwal sa idalom sang No to Chacha Network para pamatukan ang padihot sang rehimen Marcos nga bag-uhon ang Konstitusyon 1987 (charter change ukon chacha), paagi sa anuman nga porma. Ginpadayag man nila ang pagdumdom sa ika-38 nga tuig sang Pag-alsa nga EDSA, nga sa ila basehan kung ngaa nadihon ang nasambit nga konstitusyon.

Supak ang mga grupo sa mga hana nga amyendahan ang konstitusyon paagi man sang peke nga people’s initiative ukon constituent assembly. Sa ila, ang mga tuyo nga ini ang “indi kinahanglanon, mapanunga, gastuso, kag nakati-on nagapanguna sa pagpabilin sa pwesto sang mga yara sa poder.”

Sa baylo nga hatagan-duot ang chacha, nanawagan ang mga grupo kag indibidwal nga hatagan atensyon sang mga yara sa pwesto ang pagpataas sang sweldo kag kita, pagpanubo sang presyo sang mga balaklon kag sandigan nga yutiliti, pagkay-o sang mga serbisyo pangkatilingban, pagtapos sa korapsyon kag red tape (malawig nga proseso kag pila sa burukrasya), pagtib-ong sa mga tawhanon nga kinamatarung, hustisya kag kalinong, pagpangapin sa soberanya sa West Philippine Sea, pagpangapin sa kinaiyahan kag pagpasiguro sang limpyo kag mapatihan nga eleksyon.

Nagtambong sa pagtililipon ang mga pungsodnon-demokatiko nga organisasyon, mga kongresista sang bloke nga Makabayan, myembro sang 1Sambayan, anay upisyal sang gubyerno, tawong-simbahan, grupo sang estudyante, manunudlo, iban pa nga grupo sa pamugon kag madamo pa nga iban. Yara man sila Justice Antonio Carpio, Commissioner Rene Sarmiento, Atty. Neri Colmenares, Sr. Mary John Mananzan, anay DSWD Sec. Judy Taguiwalo, Bishop Gerardo Alminaza, tigpangulo sang One Negros Ecumenical Council (ONE-C) kag Obispo sang San Carlos City kag madamo pa nga iban.

Nagpirma naman sa gin-isa nga deklarasyon ang anay senador nga si Kiko Pangilinan, Atty. Lutgardo Barbo sang PDP Laban kag sang upisina ni Sen. Koko Pimentel, Fr. Daniel Franklin Pilario, presidente sang Adamson University, Dr. Noel Leyco, anay presidente sang Pamantasan ng Lungsod ng Maynila, kag si Diwa Guinigundo, anay deputy governor sang Bangko Sentral ng Pilipinas.

Samtang, pihak kag pihak nga aktibidad ang ginlunsar sang nagkalin-lain nga grupo para pamatukan ang chacha sini nga bulan.

Sa Bacolod City, nagtililipon ang mga tawong-simbahan kag mga demokratiko nga organisasyon sa pagpanguna sang ONE-C sadtong Pebrero 10 para ilunsar ang isa ka lapnagon nga kampanya batuk sa chacha. Sadtong Pebrero 8, nag-ugyon sa alyansa nga Way Chacha (Walang Chacha) ang nagkalain-lain nga indibidwal sa Davao City batuk diri. Gintukod man sang nagkalain-lain nga demokratikong mga organisasyon ang No To Charter Change Coalition-Panay sa Iloilo City sadtong Pebrero 20.

Sa adlaw sang mga tagipusuon, nagmartsa padulong Mendiola ang mga grupo nga mangunguma kag kababainhan batuk sa Rice Liberalization law. Panawagan nila: pagkaon sa lamesa, indi chacha!

Sadtong Pebrero 16, nagmartsa ang mga pamatan-on kag estudyante sang University Belt sa Manila para ipahayag ang pagpamatuk sa komersyalisasyon sang edukasyon kag pagbato sa makidumuluong nga chacha sang rehimen Marcos. Sa ila, ginatugutan sang chacha ang tingob-tingob nga pagpanag-iya sang dumuluong sa pagpadalagan sang edukasyon nga ilabi magapaantus sa mga pamatan-on.

Sa pareho nga adlaw, nagtililipon ang mga mamumugon sa EDSA Shrine sa idalom sang panawagan nga “dugang sweldo, di chacha.” Bag-o sini, sadtong Pebrero 14, naglunsar sila sang hublag sa atubang sang Senado, kadungan sang paghukom sa panugyan nga ₱100 nga dugang-sweldo nga ginpasaka sa kapulungan.