PINAAY MANEN DAGITI residente ti Sityo Balubad, Barangay Anunas, Angeles City ti maysa manen a gandat ti pulis, kakumplot ti Clarkhills Properties Corporation, nga idemolis ti komunidad da agsipud idi Pebrero 7. Saan a bumaba iti 100 pulis ken dagiti miembro ti SWAT, nayon iti 50 katao, ti impatulod iti sityo tapno aramaten iti inkapilitan a panangpatakyas kadagiti residente.

Apektado ti plano a demolisyon ti nasurok 500 kabalbalayan iti 72-ektarya a daga a gamgamruden ti makuna a kompanya. Makalkalkular a 2,000 residente ti biktima ti panagagum ti daga. Laksid ditoy, pakadanagan met a maapektaran iti panaggamrud ken demolisyon dagiti kaabay a barangay ti Cuayan ken Sapangbato.

Iti bangir ti kinaawan ti memorandum order ket inkapilitan manen a sinerrek dagiti pulis, SWAT ken tim para iti demolisyon ti barikada ti umili idiay Sityo Balubad. Tinakáwanen, binugbog pay dagiti berdugo ken sinugatan iti saka ti makinkua ti balay a ginandat da a rebbaen. Sigida a nagresponde dagiti dadduma pay a residente ken nagdepensa iti komunidad da.

Awanan bibiang dagiti pulis iti panangkigtot kadagiti residente. Kinasáan na ti paltog dagiti sibilyan. Binarsak ti tim ti demolisyon dagiti residente nu sadinno 20 ti nasugatan. Nagsubli pay kabigatan na dagiti pwersa ti estado ken tim iti demolisyon ken inkapilitan a sinerrek ti barikada.

Gapu iti panagkaykaysa ken panagsalaknib dagiti residente, napatakyas da manen dagiti pulis ken nalapdan ti demolisyon. Kastoy met ti napasamak idi Oktubre 2023 idi gandat a rebbaen ti barikada da tapno ipalidpid ti demolisyon.

Rupir dagiti pamilya iti sityo, kukua da ti daga ken addaan da kadagiti dokumento (Certificate of Land Ownership Award) ken resibo ti sibubukel a bayad na iti Landbank of the Philippines.