Liwat nga ginpaslaw sang mga residente sang Sityo Balubad, Barangay Anunas, Angeles City ang isa naman ka tuyo sang pulis, kasabwat ang Clarkhills Properties Corporation, nga idemolis ang ila komunidad sugod sadtong Pebrero 7. Indi magnubo sa 100 ka pulis kag mga miyembro sang SWAT, dugang sa 50 katawo, ang ginpadala sa sityo para gamiton sa pilit nga pagpalayas sa mga residente.

Apektado sang plano nga demolisyon ang masobra 500 ka panimalay sa 72-ektarya nga duta nga gina-angkon sang nasambit nga kumpanya. Ginabulubanta 2,000 ka residente ang biktima sang pagpang-agaw sang duta. Magluwas diri, ginakahangaw-an man nga maapektuhan sang pagpanghugakom kag demolisyon ang kasikbit nga mga barangay sang Cuayan kag Sapangbato.

Sa pihak sang kawad-on sang memorandum order liwat nga pilit nga ginsulod sang mga pulis, SWAT kag tim para sa demolisyon ang barikada sang pumuluyo sa Sityo Balubad. Ginkawatan na, ginkastigo pa sang mga berdugo kag ginpilasan sa tiil ang tag-iya sang balay nga gintuyo nila nga gub-on. Gilayon nga nagresponde ang iban nga mga residente kag nagdepensa sa ila nga komunidad.

Patarasak sa pagpamahog ang mga pulis sa mga residente. Ginkasahan sini sang pusil ang mga sibilyan. Ginapanghampak sang tim sa demolisyon ang mga residente kung sa diin 20 ang napilasan. Nagbalik pa pagkasunod adlaw ang mga pwersa sang estado kag tim sa demolisyon kag pilit nga ginsulod ang barikada.

Tungod sa pag-isa kag pagpangapin sang mga residente, liwat nila nga napalayas ang mga pulis kag napunggan ang demolisyon. Amo man ini ang nahitabo sadtong Oktobre 2023 sang gintuyo nga bungkagon ang ila barikada para ibunggo ang demolisyon.

Duso sang pamilya sa sityo, pagpanag-iya nila ang duta kag may yara sila sang mga dokumento (certificate of land ownership award) kag resibo sang bug-os nga pamalay sini sa Landbank of the Philippines.