SA SULOD LANG sang isa ka semana, tatlo ka sibilyan ang ginpatay sang Armed Forces of the Philippines (AFP) sa Sorsogon kag Masbate sa Bicol. Duha sa mga biktima ang ginapagwa nga katapo sang Bagong Hukbong Bayan (BHB) nga napatay sa mga engkwentro.

Sa Sorsogon, gintiro sang mga soldado sang 31st IB si Niño Henera samtang nagapungko sa tupad sang karsada sa Barangay Trese Martires, Casiguran sadtong Hunyo 26 sang alas 10 sang gab-i. Suno sa mga residente, nakabati sila sang tubtob sa 10 ka lupok sang pusil bag-o nakita nga nagahamyangon ang bangkay sang biktima.

Sa banwa sang Donsol, gintiro kag napatay sang pareho nga yunit sang militar ang 39-anyos nga si Arnel Esperitu sadtong Hunyo 20, alas-4 sang kaagahon. Nagalakat lang siya malapit sa ginapondohan sang mga soldado sa sentro sang Barangay Gogon sang siya ang gintiro.

Para palagyuhan ang salabton, gilayon nga ginkadtuan sang mga suldado ang himata sang biktima para pahugon kag paandaman para nga indi magpasaka sang reklamo. Pagkatapos sini, nagkampo ang 31st IB sa evacuation center sang Barangay Gogon.

Sa Masbate, ginpatay sang mga soldado si Boyet Rodrigo sa Barangay Miabas, Palanas sadtong Hunyo 23. Suno sa mga residente, ginpatawag si Rodrigo sang mga soldado nga nagapakuno-kuno nga mga hangaway sang BHB sa isa ka abandonado nga balay kag didto gintiro. Nakumpirma nila nga mga soldado sang AFP ang mga ini sang ginpaandaman ang mga upisyal sang barangay nga pagapatyon kon indi magpirma sa kasulatan nga nagapamatuod nga may engkwentro nga nahitabo sa lugar.

Pagpamomba. Liwat nga nangbomba kag nang-istraping ang mga suldado sang AFP sa bukiron nga bahin sang Barangay Cambitala, Pantabangan, Nueva Ecija sadtong Hulyo 4. Ginbutang sini sa katalagman ang duha ka sibilyan kag tuman nga naapektuhan ang palangabuhian sang masa sa lugar. Sobra nga troma kag kahadlok ang gintuga sini sa mga komunidad.