SULOD LAMANG SA usa ka semana, tulo ka sibilyan ang gipamatay sa Armed Forces of the Philippines (AFP) sa Sorsogon ug Masbate sa Bicol. Duha sa mga biktima gipagawas nga mga myembro sa Bagong Hukbong Bayan (BHB) nga napamatay sa mga engkwentro.

Sa Sorsogon, gipusil sa mga sundalo sa 31st IB si Niño Henera samtang naglingkod sa daplin sa dalan sa Barangay Trese Martires, Casiguran niadtong Hunyo 26, alas-10 sa gabii. Sumala sa mga residente, nadungog nila ang hangtud 10 ka buto sa pusil ayha nakaplagan ang patayng lawas sa biktima.

Sa lungsod sa Donsol, gipusil patay sa samang yunit militar ang 39-anyos nga si Arnel Esperitu niadtong Hunyo 20, alas-4 sa kaadlawon. Naglakaw lang siya duul sa kampo sa mga sundalo sa sentro sa Barangay Gogon dihang siya gipusil.

Aron makaikyas sa tulubagon, dihadiha nga giadtuan sa mga sundalo ang pamilya sa biktima aron hadlukon ug hulgaon aron dili magpasaka og reklamo. Human niini, nagkampo ang 31st IB sa evacuation center sa Barangay Gogon.

Sa Masbate, gipamatay sa mga sundalo si Boyet Rodrigo sa Barangay Miabas, Palanas niadtong Hunyo 23. Sumala sa mga residente, gipatawag si Rodrigo sa mga sundalo nga nagpatoong mga manggugubat sa BHB sa usa ka abandonadong balay ug didto siya gipusil. Nakumpirma nila nga mga sundalo sa AFP kini dihang gipanghadlok ang mga upisyal sa barangay nga patyon kun dili sila mopirma sa dokumento nga nagpamatuod nga adunay engkwentrong nahitabo sa lugar.

Pagpabomba. Subling namomba ug nang-istraping ang mga sundalo sa AFP sa bukirong bahin sa Barangay Cambitala, Pantabangan, Nueva Ecija niadtong Hulyo 4. Gibutang niini sa peligro ang duha ka sibilyan ug hilabihang naapektuhan ang panginabuhian sa masa sa lugar. Grabeng troma ug kahadlok ang gibunga niini sa mga komunidad.