NAGLUNSAR SANG OPERASYON haras ang Bagong Hukbong Bayan (BHB)-Western Samar (Arnulfo Ortiz Command) batuk sa mga pasistang soldado sang 87th IB sa Barangay Nagbac, Jiabong, Samar sadtong Hunyo 23. Isa ka soldado ang napatay sa pag-atake.

Nagsabwag sang kahadlok kag kakugmat sa komunidad ang yunit sang 87th IB sa tabon sang Retooled Community Support Program. Sa report sang mga residente, nagakampo sila sa tupad sang kabalayan halin pa Enero para sa paghatag sang palagwaon nga mga “serbisyo pangkatilingban.”

Samtang, nag-ululupod ang mga residente sang Sityo San Pedro, Barangay 3, San Jose de Buan, Samar sa isa ka asembliya sadtong ulihi nga semana sang Hunyo para ipahayag ang ila pagpamatok sa pagkampo sang isa ka yunit sang 87th IB sa ila nga sityo. Nagsugod ang pagpangudal sang mga soldado sa nasambit nga sityo sadtong una nga semana sang Hunyo para sa plano nga detatsment nga pagatukuron sa lugar.

Para sumpuon ang pag-isa sang taga-baryo, ginpahog sang mga suldado ang kapitan sang barangay, ang sityo lider kag konsehal. Ginpahog sila nga pasabton kag igabilanggo kon atakehon sila liwat sang BHB sa lugar.

Wala pa man ang detatsment, militarisado na ang San Pedro sugod pa sang Enero. Nalista diri ang nagasinampaw nga mga paglapas sa tawhanon nga kinamatarung.