ITI MAKALAWAS LAENG, tallo a sibilyan ti pinapatay ti Armed Forces of the Philippines (AFP) iti Sorsogon ken Masbate iti Bicol. Dua kadagiti biktima ket parparuaren da a kamkameng ti New People’s Army (NPA) a napapatay kadagiti engkwentro.

Idiay Sorsogon, pinaltopaltogan dagiti soldado ti 31st IB ni Niño Henera bayat a nakatugaw iti igid ti kalsada iti Barangay Trese Martires, Casiguran idi Hunyo 26 alas-10 ti rabii. Segun kadagiti residente, nakangngeg da ti agingga 10 a putok ti paltog sakbay a nakita da ti bangkay ti biktima.

Iti ili ti Donsol, pinaltopaltogan ken napapatay ti pareho a yunit militar ti 39-tawen a ni Arnel Espiritu idi Hunyo 20, alas-4 ti parbangon. Magmagna laeng isuna asideg iti pagkamkampoan dagiti soldado iti sentro ti Barangay Gogon idi pinaltogan da isuna.

Tapno libasan ti sungsungbatan da, dagus a napan dagiti soldado iti pamilya ti biktima tapno butbutngen ken pangtaan dagitoy a saandan nga agiyuli ti reklamo. Kalpasan daytoy, nagkampo ti 31st IB iti evacuation center ti Barangay Gogon.

Idiay Masbate, pinapatay dagiti soldado ni Boyet Rodrigo iti Barangay Miabas, Palanas idi Hunyo 23. Segun kadagiti residente, pinaayaban dagiti soldado a nagpammarang a mannakigubat ti NPA ni Rodrigo iti maysa nga abandonado a balay ken idiay a pinaltopaltogan da. Nakumpirma a soldado ti AFP dagiti ken Rodrigo idi pinangtaan da dagiti upisyal ti barangay a mapapatay da nu saan da nga agpirma iti kasuratan a mangpanpaneknek nga adda engkwentro a napasamak iti lugar.

Panagbomba. Balbaliw a nagbomba ken nagistraping dagiti soldado ti AFP iti nabantay a paset ti Barangay Cambitala, Pantabangan, Nueva Ecija idi Hulyo 4. Inkabil daytoy iti peggad ti dua a sibilyan ken nakaro a naapektaran ti pagbiagan ti masa iti lugar. Palalo a troma ken buteng ti inpaay ti panagbomba kadagiti komunidad.