Nagahana nga labi nga magsagrab ang todo-gyera sa tunga sang Zionista nga Israel kag grupo nga Hezbollah sang Lebanon pagkatapos sang ginpasingki nga pag-atake sang Israel sa sur sang Lebanon sang nagligad nga bulan. Gindeklarar ni Prime Minister Benjamin Netanyahu sang Israel nga nagapangandam ini sang “mabaskog nga operasyon” batuk sa Hezbollah. Kasunod sini, namahog ang ministro niya sa depensa nga si Yoav Gallant nga masarangan sini nga “ibalik sa sinang-una nga panahon ang Lebanon,” pareho sang wala-tupong nga pagpulbos sini sa Gaza Strip.

Ginsabat ini sang hepe sang Hezbollah nga naghambal nga andam mangapin ang Lebanon kon mahitabo nga mag-atake ang Zionista nga estado. Ang Hezbollah ang isa ka armado nga organisasyon sang mga Lebanese nga madugay na nga nagabato sa imperyalismong US kag Zionismo sang Israel. Nagapanguna nga nakabase ini sa sur sang Lebanon, kon sa diin ini ang nagahari nga partido. Ang Lebanon ang pungsod nga yara sa na-aminhan sang teritoryo nga gina-angkon sang Israel.

Ginatarget sang Israel ang Hezbollah tungod sa paglunsar sini sang mga pag-atake sa na-aminhan sang Israel bilang kabahin sang pagpangapin sa mga Palestino nga gina-atake sa Gaza Strip. Ginsugdan sang Hezbollah ang ila nga pagpang-atake sadtong Oktobre 8, 2023.

Sang nagligad nga bulan, ginpasingki sang Israel ang pag-atake sa Hezbollah. Ginpatay sini ang duha ka upisyal militar kag kumander sang grupo sadtong Hunyo 11 (Taleb Sami Abdullah) kag Hulyo 3 (Muhammad Nimah Nasser) sa mga airstrike sini. Bilang balos, nagbuya sang ginatos ka mga rocket ang Hezbollah batuk sa militar sang Israel. Naggamit man ang grupo sang mga nagalupok nga drone. Nagpasalig man ang grupo nga “pataason sini ang kasingki, kabaskog, kadamuon kag kalidad sang mga pag-atake.”

Kaaway na sang estado sang Israel ang Lebanon sugod sang gin-angkon sang mga Zionista ang duta sang mga Palestino. Sang gindeklarar ang pagtukod sang estado sang Israel sadtong 1948, kabahin ang Lebanon sa pito ka pungsod sa Middle East nga naglunsar sang gyera batuk sa Zionismo kag pagsuporta diri sang US. Ginpamunuan sang Hezbollah ang 18-tuig nga armado nga pagbato (1982-2000) sa pagpanakop sang Israel sa sur sang Lebanon. Liwat nga ginlusob sang Israel ang Hezbollah sadtong Hulyo-Agosto 2006. Maisog nga nakapangapin ang Hezbollah sa 34-adlaw nga gyera nga ini kag napaatras ang Israel.

Sa atubang sang pamahog sang paglupok sang gyera, nagpaandam ang tiglawas sang makitawhanon nga hambalanay sang United Nations nga ini ang posible nga mangin “apocalyptic.” Pagabutungon kuno sang pakig-gyera sang Israel sa Lebanon ang mga pungsod sa Middle East.

Nagapakuno-kuno subong ang imperyalistang US kag mga upisyal sini, bisan ang mga alyado nga pungsod sini sa Europe, nga pakalmahon ang nagalapad nga kinagamo sa Middle East. Pero sa aktwal, wala untat ang US kag mga alyado sini sa pagsuporta kag pagsuplay sang armas sa gyera nga pagpanakop kag henosidyo sang Israel sa Gaza kag armado nga pagpang-atake sini sa iban nga pungsod sa rehiyon.

Para sa mga Palestino

Maathag nga gindeklarar sang Hezbollah kag mga lider sang grupo nga untaton lamang nila ang mga pagpang-atake kon magapatuman sang untat-lupok ang Israel sa Gaza. Kasubong man sini ang katuyuan sang grupo nga Houthi halin sa Yemen nga nagalunsar sang pag-atake batuk sa mga barko nga Israeli ukon pakadto Israel nga naga-agi sa Red Sea. Naglab-ot na sa kabilogan nga 162 ka barko ang gin-atake sini halin sang gin-gyera sang Israel ang Gaza.

Sa atubang sini, wala-untat ang mga airstrike, pagpamomba kag pag-atake sang Israel sa bilog nga Gaza. Wala na sini ginapasin-o bisan pa ang mga gindeklarar sini nga “luwas nga mga sona.”

Sadtong Hulyo 1 lang, pilit nga ginpabakwit sang Israel ang nagalab-ot sa 250,000 ka Palestino halin sa Khan Younis, sa sur sang Gaza. Sadtong Hulyo 3, siyam ka Palestino ang napatay sa airstrike sang Israel sa kabalayan lapit sa European Hospital sa lugar.

Ang mga yara sa Khan Younis ang mga Palestino nga napalayas halin sa pagpamomba sang Israel sa katambi nga Rafah, gintalana nga “luwas nga sona.” Liwat sila nga ginpabakwit padulong sa mga “humanitarian zone” pareho sang al-Masawi nga gin-atake sang Israel sadto lang Hunyo 21 kon sa diin 25 ang napatay kag nagtulod sa linibo nga nagbakwit padulong sa Khan Younis.

Sa ulihi nga report sadtong Hulyo 3, naglab-ot na sa 37,953 ang ginpatay sang Israel sa Gaza samtang 87,266 ang napilasan halin sang Oktobre 7, 2023. Nalista naman sa West Bank ang 561 ka biktima sang pagpatay kag 5,300 ang napilasan. Sa subong ginabilanggo sang Israel ang 9,300 ka Palestino kon sa diin 3,450 ang wala sang mga kaso.