NAGLUNSAD OG OPERASYONG haras ang Bagong Hukbong Bayan (BHB)-Western Samar (Arnulfo Ortiz Command) batok sa pasistang mga sundalo sa 87th IB sa Barangay Nagbac, Jiabong, Samar niadtong Hunyo 23. Usa ka sundalo ang napatay sa pag-atake.

Nagsabwag og kahadlok ug kabangis sa komunidad ang yunit sa 87th IB sa takuban sa Retooled Community Support Program. Sumala sa taho sa mga residente, nagkampo sila duul sa mga balay sukad pa Enero para sa paghatag sa kunohay mga “katilingbanong serbisyo.”

Samtang, nagtigum ang mga residente sa Sityo San Pedro, Barangay 3, San Jose de Buan, Samar sa usa ka asembliya niadtong katapusang semana sa Hunyo aron ipadayag ang ilang pagbabag sa pagkampo sa usa ka yunit sa 87th IB sa ilang sityo. Nagsugod ang pagkural sa mga sundalo sa maong sityo sa unang semana sa Hunyo para sa plano nilang tukuron nga detatsment sa lugar.

Aron sumpuon ang panaghiusa sa mga lumulupyo, gibaharan sa mga sundalo ang kapitan sa barangay, ang sityo lider ug konsehal. Gihulga silang panimaslan ug prisuhon kung atakehon sila pag-usab sa BHB sa lugar.

Bisan wala pa ang detatsment, militarisado na ang San Pedro sukad pa Enero. Narekord dinhi ang sunod-sunod nga mga paglapas sa tawhanong katungod.