Ginpalukpan sang command detonated explosive sang mga Pulang hangaway idalum sang Mount Cansermon Command (MCC-NPA) ang separado nga kolum sang 94th Infantry Battalion (IB) sadtong Oktubre 1, pasado alas 9 sang aga sa Sitio Kubay-Anahaw, Barangay Carabalan sakop sang Himamaylan City, Negros Occidental. Naglawig sang halos 10 ka minuto ang baylohanay sang lupok nga nagresulta sa apat ka kaswalidad sa hanay sang militar. Samtang wala naman sang natala nga kaswalidad sa hanay sang NPA kag luwas nga nakamaniobra sa paborable nga tereyn.

Sa pihak nga bahin, fake news ang ginpaggwa sang 94th IB sa medya nga may engkwentro sa tunga sang ila tropa kag ginbana-bana 15 ka katapo sang NPA sa Sitio Lanap, Barangay Buenavista sakop sa gihapon sang amo nga syudad.

Halos tatlo ka semana na nga nagapanglighot sa nabukid nga bahin sang Himamaylan City ang 94th IB. Partikular sa Barangay Carabalan, ini ang naga-protektar kag nagapaseguro sang mga proyekto nga kalsada nga may kaangtanan sa plano nga pag-opereyt sang makahalalit nga minahan sa boundary sang Himamaylan City, Negros Occidental kag Tayasan, Negros Oriental nga lubos nga ginapamatukan sang mga pumuluyo ilabi na sang tribu sang Maghat-Bukidnon.

Hugot naman nga ginakondena sang MCC-NPA ang pagpangkastigo sang militar sa mga mangunguma nga sila Pedro Montecino kag iya bata nga si Christopher sang Sitio Kubay-Anahaw, Barangay Carabalan nga asta subong ara pa sa kamot sang 94th IB kag pogus nga ginagamit sa pagpangsulod sang mga kalasangan sa amo nga baryo.###