Napnuan ti awan-patingga na a rebolusyonaryo a regget, optimismo ken ragsak, idandanon ti Komite Sentral ti Partido Komunista ti Pilipinas ti kabaraan a militante a panangkablaaw iti sibubukel a kameng ti Partido iti okasyon ti maika-55 anibersaryo. Rambakan tayo ita nga aldaw dagiti nagun-od ti Partido ken ti amin a rebolusyonaryo a pwersa iti napalabas a tawen iti panangriing, panangorganisa ken panangpatignay iti umili kadagiti anti-imperyalista, antipyudal ken antipasista a pannakidangadang ken panangiyabante iti demokratiko a rebolusyon ti umili. Kagiddan na, kritikal-iti-bukod tayo a tuduen dagiti kakapuyan, kakurangan ken kamali tapno mailinteg ken maringbawan dagitoy, ken makaaddang iti dakdakkel iti sumaruno a tawen.

Padayawan tayo da Ka Jose Maria Sison, daulo iti panangibangon iti Komite Sentral ti PKP, nu sadinno ket linagip tayo ti umuna nga anibersaryo iti ipupusay na idi Disyembre 16. Padayawan tayo met laeng da Benito Tiamzon, Wilma Austria, Julius Giron, Marino Adlao, Jorge Madlos, Menandro Villanueva, Antonio Cabanatan, Dionisio Micabalo, Eugenia Magpantay, Alfredo Merilos, Dennis Rodina, Agaton Topacio, Randall Echanis, Rosalino Canubas, Sandra Reyes, Ezequil Daguman, Emmanuel Fernandez, Rolando Leyson Jr, Helenita Pardalis, Rogelio Posadas, Jude Fernandez, Josephine Mendoza ken amin a bannuar ken martir ti umili a Pilipino ken ti rebolusyon a Pilipino. Bayat iti kaadda da, adu a dadakkel a sakripisyo ti inaramid da ken napapateg ti imbingay da iti dangadang ti umili a Pilipino para iti nailian ken pangkagimongan a wayawaya.

Agnanayon a maipateg dagiti naaramidan ni Ka Joma. Iti nasurok lima dekada, ni Ka Joma ket awan-babannogan na a mangmangged iti rebolusyon a Pilipino ken nagbalin a silaw a saan pulos maiddep. Pinadur-as na ti teorya ti Marxismo-Leninismo-Maoismo babaen iti panangiyaplikar na iti kongkreto a kasasaad ti gimong a Pilipino ken babaen iti panangidatag iti estratehiya, taktika ken rebbengen ti rebolusyon a Pilipino. Dagiti naisurat na ket agserbi kas napateg a tarabay para kadagiti rebolusyonaryo ken demokratiko a pwersa iti panangiyabante ti nailian demokratiko a rebolusyon inggana naan-anay a balligi.

Bigbigbigen ti Komite Sentral ti Partido Komunista ti Pilipinas ti sakripisyo ti amin a proletaryo a kadre ken kameng ti Partido nga agtultuloy ken nga awan-panagimbubukod nga agserserbi iti panggep ti umili a Pilipino para iti nailian a demokrasya ken sosyalista a perspektiba. Napnuan iti komunista a pakinakem iti panangipaay amin a kabaelan iti tarigagay ti dasig a mangmangged ken amin nga umili nga anakling-et, bakbaklayen da ti amin a nadadagsen a takem tapno iyabante ti rebolusyon iti tay-ak iti pagrebbengan da.

Idandanon mi ti rebolusyonaryo a kablaaw kadagiti rinib-ribu a nauubbing a kadre a timmipon iti intar ti Partido iti napalabas a sumagmamano a tawen, ken manginaynayon iti dakkel nga enerhiya para iti naunday a dangadang. Adu kadakayo ti itatta ket agipatpatungpal kadagiti napapateg a rebbengen ti panangidaulo kas kameng ti sentral nga organo ti Partido, kas kumander ken opisyal iti pulitika ti New People’s Army, ken mangidadaulo iti rebolusyonaryo a tignayan masa agpada iti syudad ken kaaw-awayan. Nauneg a nakaramut iti nalawa a masa ti mangmangged ken mannalon, ti nauubbing nga henerasyon ti komunista a Pilipino ket mangipakpakita ti awan-patingga a determinasyon nga itandudo ken iyabante ti rebolusyon a Pilipino iti masangoanan.
Iti daytoy nga okasyon iti pananglagip ti anibersaryo iti pannakaibangon tayo, idandanon ti Komite Sentral ti pannakikaykaysa na kadagiti amin nga anti-imperyalista, progresibo ken demokratiko a pwersa iti intero a lubong a mangiwaywayat ti militante a panagbaringkuas laban iti nailian a panangidadanes ken gerra nga agresyon. Idandanon mi ti nainkabsatan a kablaaw kadagiti amin a proletaryo a kakabsat iti dasig iti sangalubongan a mangitantandudo ken mangiyap-aplikar iti Marxismo-Leninismo-Maoismo iti kongkreto a kasasaad kadagiti pagilian da ken mangidadaulo kadagiti mangmangged ken umili nga anakling-et iti dangadang da para iti wayawaya ken sosyalismo.

Iti tengnga iti agtultuloy a krisis iti sangalubongan a kapitalista a sistema, ti monopolyo kapitalismo wenno imperyalismo ket agtultuloy a mangisangsangbay ti kumarkaro a langa ti panangidadanes ken pananggundaway iti minilyon a mangmangged ken umili nga anakling-et, ken manggamgamrud iti aglawlaw tapno paaduen ti ganansya. Agparparnuay daytoy iti kumarkaro a sosyo-ekonomiko a kasasaad iti mayorya ti mangmangged ken masa nga anakling-et agpada iti sentro ti industriyal a kapitalismo ken kadagiti atrasado, malakolonyal ken malapyudal a pagilian. Mangdurdurog iti gerra ken armado a riribuk dagiti monopolyo kapitalista. Agtultuloy da a mangiwaywayat iti pasismo tapno sakbayan wenno lappedan ti panagtaud ti proletaryo a rebolusyonaryo a panagbaringkuas. Dagiti naglabas a tawen ket nakakitaan ti nasaknap a pangkagimongan a riribuk ken ngumatngato a tukad ti panagbaringkuas dagiti mangmangged ken dadduma pay nga anak ling-et.

Bayat nga agtultuloy a mailumlumlom iti krisis ti sangalubongan a kapitalista a sistema, ti agruprupsa a a malakolonyal nga estado ken malapyudal a sistema iti Pilipinas ket kumarkaro. Ti lokal a pang-ekonomya ken pampulitika a krisis ket mangipapaay ti awan-kapada a panagsagaba ti umili a Pilipino, nangruna dagiti mangmangged, mannalon ken dadduma pay nga umili nga anakling-et nga napartak nga agsuwek ti saad iti biag, babaen iti umir-irteng nga imperyalista a panangidadanes ken pananggamrud. Gapu iti agdadata a suporta ti imperyalista nga US, umir-irteng ti terorismo ti estado ken pampulitika a panangirurumen. Ti naames a kasasaad ti mangidurduron iti umad-adu nga umili a militante ken kolektibo a lumaban para iti pampulitika ken pang-ekonomya a karbengan da, ken mangiwayat ti rebolusyonaryo a panagbaringkuas tapno magun-od dagiti nailian demokratiko a tarigagay da.

Determinado ti Partido Komunista ti Pilipinas nga idauloan dagiti mangmangged ken nalawa a masa ti umili a Pilipino. Bayat nga agipumpundar ti Partido iti amin a rebolusyonaryo a naaramidan na iti napalabas a 55 tawen, bigbigbigen na met laeng a ti suhetibismo, a kangrunaan iti langa iti empirisismo, ket nagresulta kadagiti kritikal a panagbiddut ken tendensya, kakapuyan ken kakurangan iti tay-ak iti ideolohiya, pulitika ken organisasyon a nanglapped iti panagdur-as ken panagabante ti demokratiko a rebolusyon ti umili iti napalabas a tawtawen. Tapno maringbawan ken mailaksid dagitoy a kamali, aw-awagan ti Komite Sentral ti sibubukel a Partido a mangisayangkat ti tignayan a panagilinteg basar iti Marxismo-Leninismo-Maoismo ken dagiti basaran a prinsipyo ti Partido nga indatag ni Ka Joma.

Ti panggep ti tignayan a panagilinteg ket tapno lalo a patibkeren ti Partido babaen iti panangingato ti teoretikal a kaammoan ken rebolusyonaryo a praktika dagiti kadre ti Partido; patibkeren ti pannakaawat da iti Marxismo-Leninismo-Maoismo tapno kritikal a malagom dagiti napalabas a kapadasan ken makaadaw ti adal ken lalo a pabaknangen ti teorya ti gubat ti umili iti Pilipinas; ilaksid ti suhetibismo ken mali a patakaran ken praktika; agdillaw iti bagi tapno ingato ti determinasyon dagiti kadre ti Partido ken rebolusyonaryo tapno lumaban ken agsakripisyo para iti rebolusyonaryo a panggep.

Agtultuloy ti Partido a palawaen ken paunegen ti pannakairamut na iti masa. Determinado daytoy a palawaen ti intar na iti mamin-ano nga ulit kadagiti sumaruno a tawen tapno baklayen ti natan-ok nga akem nga idauloan ti minilyon nga umili a Pilipino iti dalan iti panangiyabante ti gubat ti umili ken nailian demokratiko a rebolusyon inggana naan-anay a balligi.

I. Ti krisis ti imperyalismo ket agturturong iti panagkaro ti kasasaad ken kadagiti gerra

Adda iti riribuk ti sangalubongan a kapitalista a sistema. Pakpakaruen na ti uppat a kangrunaan a kontradiksyon iti lubong—ti nagbaetan ti monopolyo a kapital ken proletaryado kadagiti kapitalista a pagilian; iti nagbaetan ti agriribal nga imperyalista a bileg; iti nagbaetan dagiti imperyalista a bileg ken maidaddadanes nga umili ken pagilian; ken iti nagbaetan ti imperyalista a bileg ken pagilian a mangiruprupir iti nailian a soberanya ken sosyalista a tarigagay. Agtultuloy daytoy a marmargaay kalpasan iti sangalubongan a lockdown idi 2020.

Iti laksid ti saggabassit a panagdur-as idi naminsan a tawen, nagsubli manen daytoy iti dalan ti naunday nga istagnasyon ken panagsuwek bayat a mailumlumlom ti intero a lubong iti utang ken pang-ekonomya a riribuk. Ti krisis a pang-ekonomya ket mangpatpataud ti pampulitika a risiris ken gerra. Babaen iti panangiyuna ti US, agtultuloy dagiti imperyalista a bileg a mangiwayat ti gerra iti Eastern Europe ken Middle East, bayat nga agpangpangta a mangrugi pay ti ad-adu a gerra iti dadduma a suli ti lubong. Kadagiti dadduma a pagilian, adda ti nasaknap a pangkagimongan a riribuk kadagiti maidaddadanes ken magunggundawayan a dasig a nagresulta iti panagbettak ti armado ken saan nga armado a pannakisaranget ti umili laban iti kumarkaro a kasasaad ti imperyalista a pananggundaway ken panangirurumen.

Adda iti agnanayon a panagrikus-rikus a panagsuwek iti krisis ti sangalubongan a monopolyo kapitalista a sistema. Iti nasurok maysa ket kaguddua dekada itatta, ti ekonomya ti lubong ket adda iti tukad ti pangkabuklan ken pangmabayagan nga istagnasyon.

Ti pampinansya ken pang-ekonomya a krisis idi 2008-2009, a nakagaladan ti pannakareggaay dagiti dadakkel a banko ken ti sibubukel nga ekonomya, ket pangilasinan nga awan nagbanagan dagiti panangikagumaan dagiti monopolyo a kapitalista iti sinaruno na a tawen (manipud naglukat ti sigud a Soviet Union a sinaruno ti pannakarebba na idi 1991, ken naan-anay a reintegrasyon ti China iti sangalubongan a kapitalista a sistema idi 2001) nga agtultuloy a padakkelen ti ganansya babaen iti pananggundaway iti pigsa’t tegged ken pananggamrud iti natural a kinabaknang, awan-anawa nga ispekulasyon iti pinansya (dotcom, real estate, pabalay) ken napalalo a panagutang. Ti aglaplapusanan a gatad ti kwarta (a maaw-awagan a quantitative easing a pondo nga aggatad iti mano a trilyon a dolyar) nga inindyek dagiti umun-una a kapitalista a gobyerno ket am-amang a napaay nga mangituloy iti panagpalawa ti monopolyo kapitalista a ganansya. Dagiti ekonomya ti US ken umun-una nga industriyal a kapitalista a pagilian ket napaay nga isubli ti napalabas a tukad ti panagdur-as.

Ginaladan ti pang-ekonomya a lockdown iti pandemya idi 2020 iti nasaknap a pannakaputed iti taray ti suplay, produksyon, ken komersyal dagiti transnasyunal a korporasyon, a nagresulta iti pannakatinnag ti ginasut-milyon a mangmangged ken masa nga anakling-et iti sosyo-ekonomiko a krisis. Ginundawayan ti sitwasyon tapno ikalintegan ti panagusar ti nagdakkelan a gatad ti pondo ti estado tapno paregtaen ti panagkonsumo, suportaran ti ganansya dagiti korporsayon ken patarayen ti pampinansya a pagtagilakuan. Pinatapaw daytoy dagiti ekonomya idi 2020, ken nagresulta iti panagsubli ti pang-ekonomya a panagdur-as idi 2021-2022, nagresulta met laeng iti gahigante a panagbettak ti utang ken nangato nga implasyon a nangpadagsen ti sangalubongan nga ekonomya iti napan a tawen. Dimmanon iti $397 trilyon ti sangalubongan nga utang iti umuna a kwarto ti 2023, dakdakkel iti 349% ngem iti gatad ti sangalubongan a gross domestic product (GDP).

Agtuali-tuali ti ekonomya ti US iti naunday ken nabuntog a panagdur-as iti las-ud ti 15 tawen. Manipud 1991-2008, nagsuwek inggana 2.99% ti tinawen a pang-ekonomya a panagdur-as ti US manipud iti abereyds a 3.62% idi 1961-1990, ken sipud idi ket bimmaba pay iti 1.69%. Kalpasan iti panagsanud iti 2.3% idi 2020, naisubli ti ekonomya ti US iti 5.8% ngem nagsuwek manen iti 2.3% idi naudi a tawen. Ti pederal nga utang ti US ket nasurok $33 trilyon ken mapadpadaanan a ngumato pay kalpasan a sinuspende ni Biden ti linteg a mangikedkeddeng iti pagpatinggaan ti mabalin nga utangen inggana 2025.

Adda iti resesyon ti ekonomya ti Germany (ti kadakkelan idiay Europe) idi maudi a kwarto ti 2022 inggana iti umuna a kwarto ti 2023 (0.3% a panagbassit). Nagresesyon manen daytoy idi Mayo, ken manamnama nga agsuwek manen inton sumaruno a tawen. Agngangabit met laeng nga agresesyon ti ekonomya ti UK ken France ken manamnama a dumur-as laeng iti 0.6% ita a tawen. Ti met Japan ket adda latta iti naunday nga istagnasyon. Manipud 2008, 0.27% ti gagangay a panagdur-as ti Japan, manipud 7.29% idi 1961-1979, 2.9% idi 1980-2000, ken 1.45% idi 2001-2007. Dimmur-as laeng daytoy iti 2.14% ken 1.03% idi 2021 ken 2022, kalpasan a nagsuwek iti 4.28% idi 2020. Manamnama a dumur-as daytoy iti 0.4% ita a tawen.

Dimmur-as laeng iti 2.99% ti ekonomya ti China idi napalabas a tawen, adayo iti 9% idi 2000-2019. Iti agdama ket pabpabuntugen daytoy dagiti pangta ti panagputok ti real estate bubble. Ti Evergrande Group, maysa kadagiti kadakkelan a property developer idiay China ket nagdeklara iti pannakaikulbo idi saan a nakabayad iti $300 bilyon nga utang, a sinaruno ti kapada a pannakaikulbo ti dadduma pay a kangrunaan a kompanya kas iti Kasia, Fantasia ken Shimao Group. Sangsanguen met laeng ti China dagiti pangta a saan isuna a mabayadan dagiti pagilian nga adda binilyon nga utang kenkuana.

Sadiay US ken dadduma a kapitalista a pagilian, sagsagrapen dagiti mangmangged ken masa nga anakling-et ti nasaknap a kinaawan trabaho ken nababa a sweldo, kasta met ti dadduma a pangkagimongan a sagaba kas iti kinaawan balay, bisin, nangato a gastos iti salun-at, pannakailumlom iti utang dagiti estudyante ken dadduma pay. Minilyon nga umili a saan a puraw ken dagiti migrante a mangmangged ti makapadpadas ti rasismo, kasta met iti panatisismo iti relihiyon ken pasismo. Inaldaw a pangta iti biag ti tattao dagiti sapasap a panangpaltog.

Dagiti atrasado ken malakolonyal ken malapyudal a pagilian ti mangbukbukel ti mayorya kadagiti pagilian iti lubong, nangruna iti Asia-Pacific, Latin-America, Middle East ken Africa. Agtultuloy a ngumatngato ti pampubliko nga utang dagitoy iti gandat ti gobyerno ditoy nga ilasat dagiti depisit iti linnakoan gapu iti dumakdakkel a gastos iti panagimport. Iti maaw-awagan a dumurdur-as a pagilian, ti 20% pastrek dagiti gobyerno ket mapan iti panagbayad ti utang. Adda 60% kadagitoy a pagilian ti agngangabit a saan a makabayad ti utang, kas iti krisis idiay Sri Lanka idi 2022.

Dagiti mangmangged, mannalon ken dadduma pay nga anakling-et kadagiti atrasado a pagilian ket agpapada a sumangsango kadagiti problema a pangkagimongan kas iti agnanayon ken nasaknap a kinaawan panggedan, mala-adipen a sweldo, kinaawan daga, kinaawan pagnaedan, nangato a gastos iti salun-at ken dadduma pay a serbisyo a pangkagimongan, uray pay pampulitika a panangilupit-lupit.

Kumarkaro ti pangkagimongan a saan a panagpapada-pada bayat a lalo a makonkonsentra ti kinabaknang iti ima iti sumagmamano a multi-bilyonaryo. Addaan ti 2,640 bilyonaryo a makinkontrol iti kabuklan a $12.2 trilyon, a 75% na ket adda laeng iti lima a pagilian (US, China, India, Germany ken Russia). Adda iti 724 bilyonaryo idiay US, a ti 400 kadakkelan ket tengngel iti $4.5 trilyon. Ti umun-una a 20 ket lalo pay a dimmakel ti kinabaknang da iti 20-30% idi napalabas a tawen.

Agtultuloy a maguyguyod ti kapitalista a sistema iti lubong ti saan pulos a marisut a krisis ti nalabes a produksyon ken panagsuwek ti tantos ti ganansya. Adda iti sarplas a produksyon kadagiti kangrunaan a tagilako kas iti langis, elektroniks (semikonduktor), dagiti bin-i ken dadduma pay a tagilako. Ti kapitalista a kompetisyon ken anarkiya iti produksyon ket agtultuloy a dumandanon iti awan-anawa a pananggamrud iti kinabaknang ti lubong, kapitalista a polusyon, panangdadael ti aglawlaw, krisis iti tiempo ken pannakapukaw ti biodiversity, a ginaladan ti masansan a didigra iti klima (dagiti puor ken layus) a nangdidigra iti dakkel a paset iti lubong. Ti monopolyo kapitalismo ket kabatog ti nair-irteng a kompetisyon iti ekonomya ken rinnikiar iti pulitika kadagiti kapitalista a bileg. Bayat nga ipabpabaklay ti liberalisasyon kadagiti dadduma a pagilian, ipatpatungpal met ti US iti bukod na a pagilian dagiti proteksyunista a patakaran iti linnakoan ken industriya pabor kadagiti kompanya nga US, ken ti panagpuonan ti estado iti industriyal a semikonduktor, green energy ken dadduma pay.

Agtultuloy a pumigpigsa dagiti pangta ti gerra iti nagbaetan dagiti kangrunaan nga imperyalista a bileg gapu iti agresibo a panangirupir ti US iti sangalubongan a superyoridad na iti sango dagiti panangkarit iti hegemonya na. Nagdakkelan a gatad ti rekurso ti maim-imbudo iti pangmilitar a gastos. Idi napan a tawen, dimmanon iti barbaro a rekord a $2.24 trilyon (3.37% nangatngato iti napalabas a tawen) ti pangdepensa a panaggastar. Nasurok 56% iti amin a gastos iti militar, ken 61% iti amin nga eksport kadagiti armas ket iggem ti US, China ken Russia.

Nasurok 20 bulanen ti proxy war ti US ken Russia idiay Ukraine a maar-aramat kas gamat ti alyansa militar nga US-NATO. Naggastar ti Russia ti $81.7 bilyon idi 2022, ken aggastar pay ti kabuklan a $120 bilyon kadaytoy 2023 ken $132 bilyon inton 2024 a nangpapigsa ti produksyon kadagiti pangmilitar a pabrika. Dimmanonen iti $75 bilyon ti ayuda nga inted ti US iti Ukraine, karaman ti $44.2 bilyon nga ayuda militar, a lallalo a nangpapaut iti armado a riribuk. Dagiti Amerikano a kompanya nga agar-aramid ti armas kas iti Lockheed Martin, Raytheon, Northrop ken Boeing ti kadakkelan a nagnumar iti gerra idiay Ukraine.

Kagiddan daytoy, plano ti US nga ited iti Isarel ti $14.5 bilyon a pakete nga ayuda militar tapno suportaran ti Zionista a panangbomba ken okupasyon idiay Gaza strip, a pimmatay iti agarup 19,000 agsipod Oktubre 7. Ti pinapigsa a suporta ti US iti Israel ket paset iti panangiduron na a kontrolen dagiti kinabaknang a langis laban iti Iran ken dadduma pay a pagilian iti Middle East a mangiruprupir iti wayawaya da. Ti panagkedked ti US a suportaran ti sangalubongan a panawagan para iti sispayr idiay Gaza kas panangsuporta na iti agtultuloy a panangbomba ti Israel, ket nangisina iti US iti intero a lubong.

Agtultuloy met laeng a pappapigsaen ti US ti panangiduron na nga irupir ti hegemonya iti rehiyon nga Asia-Pacific, basar iti estratehiya na a lappedan ti panagpalawa ti imperyalista a karibal a China. Nagiposisyon ti US ti dua a carrier strike group, maysa (USS Nimitz) idiay South China Sea, ken maysa pay (USS Ronald Reagan) idiay Japan. Durdurogan na ti panangisina ti Taiwan iti China, ti panangiduron iti karbengan ti Pilipinas iti taaw babaen iti United Nations Convention on the Laws of the Seas (UNCLOS), ken dagiti riribuk iti Korean peninsula, tapno iprobrokar ti China a mangaramid kadagiti agresibo nga aksyon a mabalin nga agturong iti direkta a pangmilitar a komprontasyon.

Ti turungen a panangirupir ti US iti hegemonya na ket sinungbatan dagiti karibal na babaen iti panagmaymaysa kadagiti pangmilitar ken pang-ekonomya nga alyansa. Agtultuloy a pappapigsaen ti China ken Russia ti Shanghai Cooperation Organization, ti panseguridad nga alyansa a pakairamanan ti India, Kazakhstan, Kyrgyztan, Pakistan, Tajikistan ken Uzbekistan. Idadauloan met laeng ti China ken Russia dagiti panangikagumaan a mangbukel kadagiti pang-ekonomya, linnakoan, ken pampinansya a silpo a saan a naigalut iti dolyar ti US. Agtultuloy met laeng ti panangpapigsa ti North Korea iti pangmilitar ken pang-ekonomya a silpo na iti Russia ken China.

Ti imperyalista a krisis ken risiris ket agparparnuay ti kasasaad a pabor iti agtultuloy a panagpigsa ken panagabante dagiti pannakidangadang a mangmangged ken anti-imperyalista a tignayan kadagiti kapitalista a pagilian, ken dagiti demokratiko a pannakidangadang a masa ken rebolusyonaryo a pannakilaban para iti nailian ken pangkagimongan a wayawaya manipud iti imperyalista a kontrol ken dominasyon kadagiti malakolonya, ken para iti sosyalista a rebolusyon.

Bimmtak dagiti kangrunaan a welga ti mangmangged idiay United States karaman ti welga ti United Auto Workers ken welga ti Hollywood Writers and Actors. Idiay Europe, nagwelga dagiti mangmangged iti transportasyon sadiay Italy, Spain ken UK. Dagiti kangrunaan a welga met laeng ti inrussuat dagiti mangmangged pangsalun-at idiay UK, dagiti mangmangged iti riles ken dagiti empleyado iti gobyerno idiay Germany, ken dadduma pay. Historikal a pangmasa a demonstrasyon ken martsa ti minilyon nga umili ti inrussuat iti naduma-duma a suli ti lubong laban iti henosidyo ti US-Israel laban iti Palestine.

Agtultuloy nga umab-abante dagiti rebolusyonaryo nga armado a pannakidangadang iti naduma-duma a paset ti lubong. Iti agdama, napinget nga iyab-abante dagiti rebolusyonaryo a pwersa a Palestino ti armado a pannakilaban iti nagtaudan da a daga laban iti naulpit a panangbomba ken henosidyo ti Zionista nga Israel nga adda suporta ti US. Idiay Myanmar, lablabanan dagiti etniko nga hukbo ti pasista nga hunta a Tatmadaw ken nangpairteng kadagiti opensiba a gerilya kadagiti napalabas a bulan. Adda da met laeng dagiti rebolusyonaryo nga armado a pannakisaranget nga idadauloan dagiti partido komunista idiay India, Turkey, Kurdistan, Colombia, Pilipinas ken dadduma pay a pagilian.

II. Agtultuloy a mangipatpataud ti natibker nga umir-irteng a panagbaringkuas ti kroniko a krisis iti malakolonyal ken malapyudal a sistema

Lalo pay a kumarkaro ti krisis iti agturturay a malakolonyal ken malapyudal a sistema iti Pilipinas a nagresulta iti dumagdagsen a bakbakalayen iti umili. Kinalatakan ti krisis iti agtultuloy a panagsuwek ti ekonomya a natural a nakasilpo iti krisis ti sangalubongan a kapitalista a sistema, ken ti napartak a panagtadem ti krisis iti pulitika a ginaladan ti internal a rinnikiar iti uneg ti agturturay a pangkat, pannakaisina ti rehimen US-Marcos kalpasan laeng iti maysa tawen iti poder, ken ti agtultuloy a panagurnong ti pigsa dagiti demokratiko ken patriyotiko a pwersa.

Nasaknap ti pannnakadadael dagiti lokal a pwersa ti produksyon a dimmanon iti panagbuntog ti produksyon (agpada iti manupaktura ken agrikultura). Nagresulta daytoy iti nasaknap a pannakapukaw iti panggedan, nakarkaro a panagsanggir kadagiti imported a tagilako para iti konsumo, ken panagngato ti presyo.

Awan met lang ti agbukbukod a nailian nga industriya ken kapasidad ti pagilian nga agpartuat kadagiti basaran a pangkasapulan dagiti umili. Ti lokal a produksyon ket nakadepende latta iti import, ken nakaturong latta iti eksport kadagiti produkto a semiprocessed a paset iti internasyunal nga assembly line, aw-awagan a “global value chain” dagiti monopolyo kapitalista, dagiti naata a produkto nga agrikultural ken dagiti bato a mineral. Agserserbi dagiti export processing zone kangrunan kas sentro ti semiprocessing (asembliya ken manwal nga inspeksyon) dagiti immun-una nga inimport a pyesa nga i-eksport tu manen iti nagbassitan a nayon a balor.

Daytoy a sistema a nakasanggir iti import ken nakatutok iti eksport nga intandudo dagiti naglabas a rehimen ken ti agdama a rehimen Marcos ket sigurado nga agsagrap iti nakaro nga epekto ti sangalubongan a pang-ekonomiko a panagsuwek. Lalo a pumartak ti panagkaro ken panaguneg ti krisis iti ekonomya iti Pilipinas iti umay a tawen. Agtultuloy a bumasbassit ti kabuklan a balor ti linnakoan iti naglabas a dua tawen a pagsarmingan ti sangalubongan a linnakoan gapu iti nalabes a suplay ken panagbuntog ti manupaktura. Agtultuloy a bumasbassit ti eksport dagiti elektroniko a pyesa, a mangbukbukel iti bulto ti semiprocessing iti Pilipinas, sipud rugi ti tawen.

Saan a makalluban dagiti napangas a deklarasyon ni Marcos ken dagiti economic manager na a multi-bilyon a dolyar a “karkari” ti ganggannaet a panagpuonan ti kinapudno nga agtultuloy ti panagbassit ti direkta a panagpuonan dagiti ganggannaet iti Pilipinas manipud $11.9 bilyon idi 2021 agturong $9.2 bilyon idi 2022, nga agtultuloy a nagsuwek iti 15.3% iti umuna a kwarto ti 2023. Adda dagiti sumagmamano a ganggannaet a kompanya a nangiyakar ti operasyon manipud iti Pilipinas mapan iti dadduma a pagilian a nababbaba ti gastos iti tegged.

Gapu ta awan ti pudno a reporma iti daga, agtaltalinaed a saggibassit ken atrasado ti lokal a produksyon a pang-agrikultural para iti lokal a suplay ti makan. Ngumatngato a ngumatngato ti gastos iti produksyon gapu iti nangato a presyo dagiti abono, pestisidyo ken gasolina. Ti nangato nga abang iti daga ken dadduma pay a langa ti pyudal ken malapyudal a panangidadanes ket mangkiskissay iti pastrek dagiti mannalon nga agresulta iti nasaknap a panagrigrigat ken panagbisin iti kaaw-awayan. Ti awan-anawa a panagimport ken ismagling ti bagas, lasuna, bawang ken dadduma pay nga agrikultural a produkto ket mangnaynayon iti bakbaklayen dagiti masa a mannalon, ken amin nga umili a Pilipino.

Nakarkaro pay, nalalawa a produktibo nga agrikultural a dagdaga ti ipapauneg iti panagsukat-usar dagiti dadakkel a burgesya kumprador usar ti ganggannaet a kapital para iti real estate ken dadduma pay a nga iskema. Iti konserbatibo a panagkalkular ti gobyerno, saan a bumaba iti 620 ribu nga ektarya ti irigado a daga ti nagsukat-usar iti napalabas a dekada (2012-2022). Nagresulta daytoy iti dislokasyon ti minilyon a pamilya a mannalon ken panagkaro ti pannagmiraut iti kaaw-awayan.

Lalo a nakadepende ti pagilian iti utang tapno makalasat iti linnakoan ken gastos ti gobyerno. Idi Oktubre ket adda iti ₱14.48 trilyon a pampubliko nga utang, ken manamnama a lomobo pay iti ₱15.84 trilyon iti umay a tawen. Agtultuloy a dumakdakkel ti pondo iti panagbayad iti pampubliko nga utang. Inton 2024, dumanon daytoy iti ₱1.91 trilyon, a bukbuklen ti ₱1.24 trilyon a bayad iti prinsipal; ken ₱670.5 bilyon nga awtomatiko a nakailatang a pagbayad iti interes a bukbuklen iti 11.6% ti nailian a badyet (nangatngato ngem iti 9.7% idi 2020).

Gapu ta awan ti basaran nga industriya, sagsagrapen ti umili a Pilipino ti agnanayon a nasaknap a disempleyo. Lalo a pinabassit ti gobyerno ti pudno a kasasaad ti nasaknap a kinaawan panggedan babaen iti magic ti istatistik. Ti ibagbaga a 4.2% disempleyo idi Oktubre 2023, a kababaan kan’ pay idi iti las-ud ti 18 tawen, ket rumbeng a kritikal nga ilaksid. Kinapudno na, adda iti 39.46 milyon (wenno 49.89 milyon) ti nu saan man awan pulos trabaho na (2.1 milyon) ket dandani awan trabaho kas tagabo (2 milyon), “self-employed” (13.3 milyon), agtagtagikua ti bukod a daga (1.3 milyon), dagiti agub-ubra iti negosyo ti pamilya (3.1 milyon nga awan sweldo, ken 120,000 ti adda bayad na), ken dagiti mangmangged iti impormal nga empresa (17.6 milyon).

Gapu iti kroniko a problema iti disempleyo, minilyon a Pilipino ti pumilpila a makapagtrabaho iti ballasiw-taaw kas tagabo, caregiver, nars, mangmangged iti konstruksyon, ken dagiti tripulante kadagiti internasyumal a kompanya iti panagbarko. Bulnerable ida a target dagiti kriminal nga ahensya iti rekrutment ken dagiti burukrata iti gobyerno a mangkuskusit iti pastrek ken urnong da. Adu ti makapadpadas ti saan a makatao a kasasaad iti pagubraan ken dagiti padagsen a babayadan iti gobyerno, laksid pay iti nasaem a sakripisyo iti pannakaiyadayo kadagiti pamilya da.

Ti dakkel nga hukbo dagiti mangmangged nga awan trabaho na ket mangguyguyod iti sweldo pababa. Agsagsagaba dagiti mangmangged a Pilipino iti mala-adipen a sweldo. Ti inaldaw a sweldo iti pagilian a manipud ₱341 agturong ₱641 ket kurang la unay tapno supusupan ti inaldaw a pagkasapulan ti lima-katao a pamilya a makarkarkulo a ₱1,188 (idi Nobyembre) a resulta ti panagngato ti presyo ti langis, makan ken dadduma pay a basaran a pagkasapulan ken serbisyo.

Saan pay naan-anay a nakarekober dagiti mangmangged a Pilipino ken masa nga anakling-et iti pannakaisaltek ti pagbiagan sa manipud lockdown idi pandemya a Covid-19. Lalo pay a kumarkaro ti sosyo-ekonomiko a kasasaad da iti tengnga ti nababa a sweldo, disempleyo, kinaawan ti pastrek wenno urnong, ken ngumatngato a presyo. Mayorya kadagiti Pilipino ket agbibiag a nababbaba ngem iti naikeddeng a pagpatinggaan ti kinarigat. Minilyon ti ag-aguman iti daga ken kabiagan dagiti ganggannaet a kapitalista a kayat a kontrolen dagiti nabatbati a suli ti ekonomya ti Pilipinas.

Iti sango ti panagrigrigat ken bisin, lalo a kumarkaro ti pananggura ti umili a Pilipino iti agturturay a pangkat/bunggoy a Marcos-Duterte. Maisinsina ni Marcos Jr iti nalawa a masa ti umili a mabusor iti tinawid na a nasurok $10 bilyon a kinabaknang a ginamrud ti ama na a diktador a ni Marcos Sr idi panawen ti linteg militar 1972-1986. Ad-adda a pagpungtuten na ti umili gapu iti kannigid kannawan a panagwalay na iti abrod ken aglaplapusanan a panagbiag, ken awan-babain na a korapsyon. Babaen iti Maharlika Fund, inggana ₱550 bilyon iti pampubliko a pondo ti tenglen ni Marcos ken iyakar iti pribado a panagpuonan, a mangisangsangbay ti kroyinismo iti barbaro a tukad ti kinadakes. Lalo a guraen ti nalawa a masa ti umili a Pilipino iti Marcos gapu iti masansan a panagpa-cater ti pasken idiay Malacañang ken ti plano a gastaren ti ₱1.1 bilyon kadagiti biyahe iti 2024.

Lalo a maisinsina iti umili a Pilipino ti rehimen a Marcos gapu iti panagbalin a paspasurot na iti imperyalismo nga US ken panagparintumeng na iti China. Ipapausar ni Marcos ti gobyerno kas gamat iti agresibo a panangiduron ti US a konsolidaen ti hegemonya na daytoy iti Pilipinas ken rehiyon nga Asia-Pacific, tapno kontraen ti pangmilitar ken pang-ekonomya a pigsa ti imperyalista a karibal na a China.

Iti panangidaulo ni Marcos, lalo a maiguyguyod ti Pilipinas iti alipugpog ti pumigpigsa a rinnikiar iti militar iti nagbaetan ti US ken China. Iti nasurok maysa tawen a nakatugaw iti poder, pinalubusanen ni Marcos ti US nga agitakder ti uppat pay a pasdek militar (nayon iti sigud a lima) kadagiti “nagnumoan a lokasyon” iti uneg dagiti kampo ti Armed Forces of the Philippines (AFP) kas ti nakasurat iti Enhanced Defense Cooperation Agreement (EDCA). Dagitoy a pasdek ket mausar tapno mangibangon ti pangrussuatan ti misayl ti US ken tapno mangidulin ken mangipwesto kadagiti armas, basar iti estratehiya ti US a palawlawan ti China dagiti pwersa a militar manipud iti maaw-awagan a “first island chain.”

Lalo a kimmaro ti pannakibiang militar ti US iti Pilipinas iti napalabas a tawen iti sango ti agsasaruno a pangmilitar nga aktibidad ken war exercises ti US. Iti umay a tawen, nasurok 500 wargames ken ehersisyo a militar ti irussuat ti US iti pagilian. Iti duron ti US, plano nga agbukel ti “visiting forces agreement” iti Japan ken France, tapno palubusan dagitoy nga alyado ti US a papigsaen ti presensya militar iti pagilian ken iti rehiyon.

Gapu iti panangiduron dagiti military advisers ti US, nagirussuat ti AFP ken Philippine Coast Guard ti masansan a “supply mission” kadagiti outpost ti Pilipinas idiay Kalayaan Group of Islands, nga adda suporta dagiti pangsurbeylans nga eroplano ken drone ti US. Ad-adda a nangipakita ti kinaagresibo ti China iti panangusar ti water cannons ken panangdungpar kadagiti babassit a bara-ngay dagiti Pilipino iti uneg ti exclusive economic zone ti Pilipinas, nga agdadata panaglabsing iti soberanya ken karbengan iti taaw ti Pilipinas.

Iti mandar ti US, kinansela ti gobyerno a Marcos dagiti utang ken kontrata ti gobyerno a ponpondoan ti China para kadagiti proyekto a Philippine National Railways South Long Haul, Subic-Clark railway ken Mindanao Railway, pabor kadagiti pautang manipud iti World Bank ken ti Asian Development Bank. Idurduron met laeng nga ikansela ti dadduma pay a proyekto a pinondoan ti China kas ti Samal Island-Davao City Connector Project, Chico River Pump Irrigation Project, New Centennial Water Source (Kaliwa Dam Project), ken dagiti proyekto a CCTV (closed circuit television) idiay Marikina, Parañaque, Pasig, San Juan ken Valenzuela, a kaaduan ket kinontrata idi sigud a rehimen Duterte.

Ti turungen ti US nga in-inut a pakapsuten ken tagibassiten ti China ket panagsanud manipud iti nabayagen a panagkinnumplot iti nagbaetan ti dua nga imperyalista a bileg iti panangiwayat ti neoliberal a patakaran iti Pilipinas agsipud pay dekada 1990, a nausar ti oligarkiya iti pinansya ti China tapno palawaen ti komersyal ken pampinansya nga operasyon na iti Pilipinas, kadua dagiti US ken Japanese a banko, ken nagpundar iti bukod na a base iti intar dagiti burgesya kumprador ken burukrata kapitalista. Iti pananglapped iti akses iti kapital iti China, pabpabassiten ti imperyalismo nga US ti pagbingbingayan a pinansya dagiti agturturay a dasig, nga agresulta iti umir-irteng a panaggiinnagaw ti agriribal a bunggoy.

Nasurok maysa tawen laeng manipud inlastog dagiti Marcos ken Durte ti “unity team” a nakaaramid ti “landslide victory” babaen iti “automated” a panagkusit iti eleksyon 2022, dagus a nagparangen ken kumarkaro ti ribalan dagiti agturturay a paksyon. Konkonsolidaen dagiti Marcos ti pang-ekonomya ken pampulitika a bileg, bayat a napartak a maib-ibusan ti pang-ekonomya ken pampulitika a bileg dagiti Duterte (uray pay dagiti bunggoy nga Arroyo). Ti kanselasyon ti dadakkel a kontrata iti imprastraktura nga inserrek ni Duterte iti China ket nangipaidam ti mano a bilyon piso a kikbak. Dagiti negosyo ni Dennis Uy, kadakkelan a kroni dagiti Duterte, ket napartak a mapapaidaman ken ilaklako itatta, pabor kadagiti kroni ni Marcos. Numanpay adda latta met dakkel nga impluwensya ni Duterte iti AFP ken PNP, umad-adun kadagiti heneral nga impatugay ni Duterte ket nagretiron. Iti naglabas a bulbulan, pinakaro ti bunggoy Marcos-Romualdez dagiti panagatake a nakatarget kadagiti Duterte, babaen iti panangala iti ₱550 milyon a “confidential and intelligence funds” ni Vice President Sara Duterte, ken panangiduron nga ikkatan ti prangkisa ti maka-Duterte nga istasyon nga SMNI, ken pananglukat ti ruangan tapno palubusan ti International Criminal Court nga ituloy ti imbestigasyon laban kenni Rodrigo Duterte kadagiti kaso na laban iti sangkataoan idi panawen ti ubbaw a gerra na kontra-droga.

Ti makapapatay a risiris iti nagbaetan dagiti bunggoy a Marcos ken Duterte ket umas-asidegen iti naranggas a komprontasyon. Direkta a dildillawen dagiti Duterte ni Marcos iti plano a sumrek manen iti tungtungan a pangkappia iti National Democratic Front of the Philippines. Ti sumagmamano a barbaro a retirado nga heneral ti militar a mapagtalkan ken napudno kenni Duterte ket agrikrikus kadagiti opisyal militar ken negosyante tapno durugan ida nga agkudeta tapno mapatakyas ni Marcos ken mangitakder ti hunta a sibil-militar. Ammo daytoy ti chief-of-staff ngem awan arimekmek na iti aktibidad dagiti agplanplano ti kudeta.

Tapno konsolidaen ti bileg pampulitika, pinairut ti rehimen Marcos ti panagiggem na iti militar nga adda suporta ti US. Intultuloy ken pinairteng na ti patakaran ni Duterte a terorismo ti estado ken insayangkat ti pasista a panagatake laban iti nailian-demokratiko a pwersa iti syudad ken kaaw-awayan, nangruna dagiti kameng ken organisador dagiti unyon ken timpuyog kadagiti komunidad. Agraraira ti de facto a linteg militar iti intero a pagilian. Mano a komunidad dagiti nakurapay iti syudad ti nakapauneg iti napuskol a presensya ken panagmonitor dagiti soldado. Ipapauneg ti AFP dagiti komunidad iti kaaw-awayan iti kontrol ti militar, liplipiten dagiti pang-ekonomya ken pangkagimongan nga aktibidad da babaen ti karpyu ken restriksyon, ken konkontrolen ti garaw ti populasyon iti nagan ti “kontra-insurhensiya.”

Awan-ressat dagiti ekstra-hudisyal a pammapatay ken dadduma pay a panaglabsing iti karbengan-tao iti kaaw-awayan nga aramid dagiti reaksyunaryo nga armado a pwersa, pulis ken paramilitar. Ipapauneg dagiti tattao iti nairteng a sarbeylans ken panagdukot, tortyur, interogasyon ken panagsampa kadagiti parparbo a kaso babaen iti Anti-Terrorism Law. Masansan ti panagmasaker dagiti agop-operasyon a tropa dagiti batalyon a pangkombat ti AFP. Kadagiti operasyon a pangkombat da, punpuntiryaen dagiti komunidad ti panangbomba manipud iti tangatang ken panangkanyon.

Iti suporta ti US, kimmaro pay dagitoy a panagatake iti napalabas a tawen basar iti deklarasyon ti AFP a “final push” laban iti ibagbagana na a “tedteda” a pwersa ti New People’s Army. Nasurok-kumurang 150 batalyon kadagiti pwersa a pangkombat ti militar, pulis ken paramilitar ti nakapakat laban kadagiti larangan gerilya ti NPA iti intero a pagilian. Kayat ti imperyalismo nga US a gibusanen ti gobyerno a Marcos ti rebolusyonaryo nga armado a tignayan tapno naan-anay na nga aramaten ti AFP iti panangprobokar ti gerra iti China. Ammo la unay ti US nga adda iti posisyon ti rebolusyonaryo a tignayan a gundawayan ti posibilidad ti maysa nga inter-imperyalista a gerra tapno natibker nga itandudo ti gubat ti umili.

Bayat nga iwaywayat ti brutal a gerra iti pananglapped laban iti umili ken kadagiti rebolusyonaryo a pwersa da, us-usaren tatta ti rehimen US-Marcos ti “proklamasyon nga amnestiya” na ken rugrugi iti panangikagumaan a biagen manen ti tungtungan a pangkappia tapno siloan dagiti Nalabaga a mannakigubat ti New People’s Army a sumuko. Bayat a maragragsakan ti Partido ken dagiti rebolusyonaryo a pwersa, babaen iti National Democratic Front of the Philippines, iti oportunidad a makitungtung para iti kappia kas nayon a tay-ak ti pannakidangadang tapno iyabante dagiti nailian-demokratiko a singasing kas basaran ti nainkalintegan ken pangmabayagan a kappia, sititibker da met laeng nga ilaklaksid ti gandat nga aramaten ti tungtungan tapno mapasuko ti rebolusyonaryo a tignayan. Agtultuloy nga agipingpinget ti NDFP Negotiating Panel nga iduron ti panangrugi manen ti tungtungan iti kappia basar kadagiti immun-una a katulagan.

Iti tengnga ti pang-ekonomya ken pampulitika a krisis ti agar-ari a sistema, lalo a kumarkaro ti panagtarigagay ti umili a Pilipino nga isayangkat dagiti pannakidangadang a masa tapno salakniban dagiti sosyo-ekonomiko ken demokratiko a karbengan da laban iti kontrai-umili ken manangidadanes a pang-ekonomya a programa, korapsyon ken pampulitika a pananglipit iti sidong ti rehimen US-Marcos. Lalo laeng a lumawlawag—iti panagserbi iti naindasigan nga interes ti dadakkel a burgesya kumprador ken dadakkel nga apo’t daga, iti panagbalin nga aso-aso iti ganggannaet nga interes pang-ekonomya, iti dadakkel a korapsyon iti langa ti kikbak ken kroniyismo, ken iti aglaplapusanan a panagbiag—ti rehimen Marcos ti maseknan iti nasaknap a panagmiraut ken pannakaidadanes dagiti nalawa a masa ti umili a Pililipino.

Ti agturturay a bunggoy a Marcos-Duterte ket napartak a maisinsina iti umili a Pilipino. Ti nalawa a nagkaykaysa a prente a bukbuklen dagiti basaran a dasig, akintengnga a pwersa ken dagiti taktikal nga alyado ket agtultuloy a pumigpigsa laban iti agturturay a rehimen gapu kadagiti patakaran na nga kontra-umili, ken anti-nasyunal, korapsyon ken krisis iti ekonomya. Sangsanguen itatta ti agturturay a rehimen ti nalawa a panaglaban.

Maur-urnong ti pungtot dagiti mangmangged iti panagkedked ti rehimen Marcos a dinggen ti arungaing da a maaddaan ti signipikante a panagngato iti sweldo. Napalalo ti panangintrimis kadakuada iti kutkutit nga umento nga inbaon ni Marcos kadagiti regional wage board. Adda sumagmamano a welga a bimtak a mabalin a rugi ti nalawlawa a tignayan a masa dagiti mangmangged tapno agunyon ken iyabante kolektibo a pannakilaban iti dumteng a panawen. Dagiti drayber ken opereytor ti dyip ken dadduma pay a pampubliko a transportasyon ket nagrukkuas iti agsasaruno a sardeng-pasada tapno agprotesta laban iti kontra-marigrigat ken kontra-umili a “franchise consolidation” tapno i-“phase out” dagiti dyip basar iti proyekto a “transport modernization” ti World Bank ken Asian Development Bank.

Agprotesta met laeng dagiti titser iti pampubliko nga eskwelaan, dagiti mangmangged a pangsalun-at ken dagiti empleyado ti gobyerno tapno kiddawen ti nayon a sweldo ken labanan ti pampulitika a pananglipit. Lumalaok dagiti estudyante kadagiti aksyon masa tapno labanan ti nakaro a komersyalisasyon iti edukasyon, panangbaybay-a ti estado iti edukasyon ken pananglipit iti kampus. Iti naduma-duma a paset ti pagilian, bumbumtak dagiti protesta a masa kadagiti komunidad iti kaaw-awayan tapno labanan ti panagserrek dagiti manangdadael a ganggannaet nga operasyon iti panagminas, panagagum ti daga ken panagsukat-usar iti daga, ken tapno ilaban dagiti antipyudal nga arungaing ti masa a mannalon.

Adda met laeng dagiti aksyon a protesta laban iti plano nga agitakder ti nayon a base militar ken pasdek ti US, ken laban kadagiti wargames ken umir-irteng a presensya militar ti US iti pagilian. Dagitoy ket maisilpo iti internasyunal a pannakidangadang laban iti imperyalismo ken imperyalista a gerra. Adu ti limmaok kadagiti protesta iti pannakikaykaysa iti umili a Palestino iti panagtubngar iti henosidyo ti Zionista nga Israel iti Gaza.

Iti kaawawayan, agtultuloy a mangiyab-abante ti NPA ti rebolusyonaryo nga armado a pannakidangadang kadagiti larangan gerilya iti 14 a rehiyon iti Luzon, Visayas ken Mindanao. Agtultuloy da nga agipingpinget iti dalan iti rebolusyonaryo nga armado a pannakidangadang, ken determinado a paayen ti estratehiko nga opensiba ti kabusor. Kas sungbat iti panawagan ti Komite Sentral a “paggil-ayaben ken iwaras ti apoy ti gubat ti umili,” agtultuloy a palpalawaen ti NPA ti base a masa babaen iti panagitandudo ken panangkombina ti gawaing masa iti gawaing militar.

Naingato ti adu nga yunit ti NPA ti kabaelan da a pagtalinaeden a bulsek ken tuleng ti kabusor, bayat nga irusrussuat ti pangkagimongan a panagsukimat, panangitakder kadagiti asosasyon ti mannalon, ken dadduma pay a rebolusyonaryo a pangmasa nga organisasyon, panangibangon kadagiti milisyang bayan, panagtulong kadagiti masa a mannalon nga itandudo dagiti antipyudal a pannakilaban tapno irupir ti panagpababa iti abang iti daga, nababbaba nga interes iti pautang, nainkalintegan a presyo dagiti produkto, nababbaba a presyo dagiti input iti produksyon a pang-agrikultura, ken dadduma pay. Agtultuloy nga ipatpatungpal ti NPA dagiti rebbengen na a tulungan ti masa iti produksyon, ken irussuat dagiti kampanya iti literasiya, edukasyon ken kultura. Agirussuat da ti dadakkel ken babassit a taktikal nga opensiba, tapno rabsuten dagiti armas ken dupraken dagiti yunit ti kabusor, tapno papigsaen ti bukod kas kangrunaan nga igam ti Partido iti panaglaban iti kabusor.

III. Dagiti nagun-od ti Partido ken agdama a kritikal-iti-bagi a panagtasa

Ramrambakan ti Partido ti maika-55 anibersaryo daytoy a napnuan pinget ti agkabanwag ken tibker ti beterano a mannakigubat. Napasagepsepan ti nauneg a pannakaawat iti istorikal a misyon ti proletaryado nga iyabante ti naindasigan a dangadang agingga iti komunismo, agtaltalinaed a saan a mabanbannog ken kanayon a nakasagana ti Partido a sanguen ti amin a sakripisyo tapno iyabante ti nailian demokratiko a rebolusyon ti umili a Pilipino agingga iti naan-anay a balligi, kas panagsagana iti sumaruno a tukad ti sosyalista a rebolusyon ken konstruksyon.

Ti panagtadem ti krisis ti malakolonyal ken malapyudal a sistema iti sidong ti rehimen US-Marcos ket mangibungbunga ti ad-adda pay a paborable a kundisyon para iti panagrebolusyon. Para iti minilyon a mangmangged a Pilipino ken masa nga anakling-et a mano a kaputotanen nga agsagsagaba ti inhustisya ti gimong ken naindasigan a tiranya, ti partido ken rebolusyon ket mangibagbagi iti saan nga agsarday a namnama para iti naraniag a masakbayan. Pudno a sadinno man nga itukit, dagiti bin-i ti Partido ket napaspas nga agsarsaringit ken sumaksaknap, pammaneknek ti saan a matmatianan a determinasyon ti nalawa a masa dagiti maikuskuspil ken magunggundawayan nga agrebolusyon.

Agtaltalinaed a natibker ken sibubukel ti Partido. Ti liderato ken intero a kamkameng ti Partido ket nairut nga agkaykaysa iti sidong ti Nalabbaga a bandera ti Marxismo-Leninismo-Maoismo, ti Konstitusyon ti Partido ken Programa para iti Demokratiko a Rebolusyon ti Umili. Nairut ti panagkaykaysa ti Partido iti panangiyabante iti naunday a gubat ti umili segun iti estratehiko a linya ti panangkubkob iti kasyudadan manipud iti kaaw-awayan.

Naindaklan ti naaramid ti Partido iti napalabas a 55 tawen ti nairut a panangitandudo iti Marxismo-Leninismo-Maoismo ken ti napinget a panangipakat daytoy iti kongkreto a kasasaad ti Pilipinas. Nagballigi daytoy iti panagamiris ken panangibunannag iti bulok a malakolonyal ken malapyudal a sistema ken dagiti basaran a parikut ti imperyalismo, pyudalismo ken burukrata kapitalismo a mangparparigat iti umili a Pilipino. Binukel daytoy ti programa para iti demokratiko a rebolusyon ti umili babaen ti naunday a gubat ti umili, a napaneknekan nga usto iti agtultuloy a panangarakup daytoy ti umili.

Inbangon ti Partido ti bukod na kas organisasyon a pangkadre ken pangmasa. Nakatakder daytoy iti pundasyon dagiti Leninista a prinsipyo ti Partido a Bolshevik. Naan-anay a konsolidado iti sidong dagiti prinsipyo ti demokratiko a sentralismo. Bukbuklen daytoy ti mano pulo a ribu a napudno a kadre ken mannakigubat a nalawa ken nauneg a nakaramut iti maidadanes ken magungundawayan a masa a mangmangged, mannalon, malaproletaryado ken petiburgesya.

Tapno paayen ti agar-ari a dasig ken rippuogen ti reaksyunaryo nga estado, nairut a petpet ti Partido ti dua nga armas ti armado a dangadang ken nailian a nagkaykaysa a prente. Itantandudo ti Partido ti armado a langa ti dangadang nga agpangpanggep a tungpalen ti kangrunaan a rebbengen ti panangrabsut ti bileg iti pulitika. Dagiti legal a langa ti dangadang ket sekundaryo ngem saan a mabalin nga ibbatan iti panangiyabante ti nailian-demokratiko a rebolusyon tapno riingen, organisaen ken patignayen ti minilyon nga umili ken agibunga ti nalawa a suporta iti pulitika para iti armado a dangadang. Bukbuklen ti Partido ti limed a bugas ti tignay masa.
Balbaliw a rinugian ti Partido ti rebolusyonaryo nga armado a dangadang babaen ti panangibangon ti New People’s Army idi Marso 29, 1969 manipud iti dandani awan. Intudo daytoy dagiti partikular a kagagalad ti panangiyabante ti gubat ti umili iti Pilipinas, a mangad-adaw kadagiti adal manipud kadagiti naballigi a rebolusyonaryo a gubat iti dadduma a pagilian, kabilangen iti bukod na a praktikal a kapadasan iti panagrebolusyon iti maysa a pagilian a tagiporo ken nabantay. Idadauloan na daytoy ita ti NPA babaen iti lima ket kaguddua a dekada iti nasaknap ken nasageded a gerilya a pannakidangadang nga adda iti umun-uneg ken lumawlawa a base a masa.

Nalabsan ti NPA dagiti rebolusyonaryo a hukbo ti Katipunan idi maudi a paset ti maika-19 a siglo ken ti Hukbalahap (1942-1945). Ngem agtaltalinaed a bassit ken nakapsut ti NPA kumpara iti dakkel ken nabileg nga AFP nga armado ken ponponduan ti imperyalismo a US. Nupay kasta, sibubukel ti pangngeddeng ti NPA nga iyabante ti gubat a gerilya tapno paset-paset a dupraken ti kabusor, agingga a makaurnong daytoy ti naan-anay a pigsa tapno umabante manipud iti agdama a makintengnga a paset ti estratehiko a depensiba agturong iti sumaruno a paset, ken agturong iti sumaruno pay nga estratehiko a tukad agingga iti naan-anay a balligi.

Intakder ti Partido ti NDFP kas kakonsolidaduan a limed a nagkakaysa a prente dagiti organisasyon a bukbuklen dagiti basaran a rebolusyonaryo a pwersa a nagkaykaysa iti sidong ti panangidaulo ti Partido, ken sumupsuporta iti rebolusyonaryo nga armado a dangadang ken nailian-demokratiko a rebolusyon. Ti NDFP ti kaunggan a bugas ti intero a sakop ti nailian a nagkakaysa a prente. Tumutulong daytoy iti panangbukel ti nailian a panagkaykaysa ti umili a Pilipino laban iti imperyalismo. Agingga a maiproklama ti demokratiko a gubyerno ti umili iti bisperas ti nailian a balligi, irepresentar ti NDFP ti kabuklan dagiti organo ti bileg iti pulitika a maitaktakder kadagiti larangan gerilya ken base a gerilya.

Ti Partido ket umad-adaw ti pigsa ken inspirasyon manipud kadagiti napalabas a balligi a nagun-od babaen ti armado a dangadang, rebolusyonaryo a tignay masa, ken nagkaykaysa a prente. Kagiddan na, napakumbaba a makasursuro manipud kadagiti napalabas a kamkamali ken nagkurangan, mangiyar-aramid ti panagdillaw ken panagdillaw iti bagi, ken agilinlinteg kas pamuspusan tapno pagtalinaeden ti kinapudno iti Marxismo-Leninismo-Maoismo. Ti balbaliw a panangitakder mismo ti Partido idi 1968 ket positibo nga inbunga ti tignay panagilinteg laban iti rebisyunismo a Lava ken gangsterismo a Taruc-Sumulong. Idi 1992, intandudo ti Partido ti maikadwa a tignay panagilinteg tapno isubli daytoy iti usto a linya ti Marxismo-Leninismo-Maoismo iti panangilaksid iti moderno a rebisyunismo iti kamali a linya ti insureksyunismo ken adbenturismo a militar a palalo a nangdadael iti umili ken iti rebolusyon da.

Bayat nga intay ramrambakan dagiti naaramidan tayo, kritikal tayo a mulat kadagiti kamkamali, pagkapuyan ken pagkurangan iti tay-ak iti ideolohiya, pulitika ken organisasyon a mano a tawenen nga agraraira. Rumbeng a tuduen tayo dagitoy tapno nairut a mailinteg ken tapno maparut dagiti suhetibista a ramut dagitoy.

Manipud idi inruar tayo ti panawagan idi napan a tawen a konsolidaen ken ad-adda pay a papigsaen ti Partido ken kumprehensibo nga iyabante ti demokratiko a rebolusyon ti umili, dagiti mangidadaulo a komite ti Partido ken dagiti kadre ket nagiyaramid kadagiti rebolusyonaryo a panagadal, panagtasa, panaglagom ken panagdillaw iti bagi, tapno tuduen, ilinteg ken rimbawan ti nadumaduma a langa ti suhetibismo, Kannawan ken “Kannigid” a kamkamali, ken oportunista a tendensya.

Naitudo kadagiti panagadal ken diskusyon ti nababa a tukad ti teoretikal a kaammuan ken pagkapuyan iti ideolohiya iti adu kadagiti mangidadaulo ken nababbaba a komite tayo ti nalukay a pannakaawat iti proletaryo a rebolusyonaryo a teorya, iti kabuklan, ken iti partikular, iti teorya ti rebolusyon a Pilipino, kadagiti linteg ti panagdur-as daytoy, ken iti praktikal nga aplikasyon na iti kongkreto a kasasaad iti saklaw dagiti trabaho da.

Natamaan ti suhetibismo ti dakkel a paset ti Partido a makagapu a simlep ken nagramaram dagiti burges ken petiburges a pannirigan ken mentalidad iti nadumaduma a tukad ti liderato ti Partido, a nagresulta iti nadumaduma a Kannawan ken “Kannigid” a kamkamali ken tendensya iti pulitika, ken burukratismo ken ultrademokrasya iti organisasyon. Ti empirisismo ken dogmatismo ket suhetibista a kamkamali a tumataud manipud iti pannakapaay nga usto nga ikumbina ti teorya ken praktika nga agtentennag kadagiti kamali nga ideya ken praktika. Ti empirisismo ket praktika nga awanan teorya, nga agmurmurdong iti bulsek a panagrebolusyon; bayat a ti dogmatismo ket teorya a nakasina iti praktika, nga agmurmurdong iti panagsermon nga awanan rebolusyon. Ti empirisismo ti kangrunaan a suhetibista a kamali ti Partido nga agresresulta a kangrunaan kadagiti Kannawan a kamkamali ken tendensya.

Adda ti nasaknap a panagkampante iti pnangipakat ti rebolusyonaryo a teorya tapno agserbi a tarabay iti praktika, ken kurang ti pinget iti panangadaw iti teorya manipud iti praktika. Nu saan a nairut a pangig-iggeman ti Marxista-Leninista-Maoista a teorya tapno tarabayan ti praktika tayo ken ti panagadaw ti teorya manipud iti praktika, saan a makaabante ti rebolusyonaryo a praktika agturong iti nangatngato a tukad ken mangrugi nga agsardeng ken agsanud iti nababbaba a tukad. Ad-adda pay a kumaro ti kastoy a sitwasyon iti petiburges a panagpakaanay iti dati a kaamuan, pamuspusan, praktika ken plano, wenno kinasadut nga agadal ken aglagom iti kapadasan. Agmurmurdong daytoy iti pannakapaay nga agpadur-as iti teorya ken agbukel kadagiti baro a pamuspusan ken plano nga uman-annatop iti nagbaliw a kundisyon, ken iti pannakapaay nga itunda ti praktika iti nangatngato a tukad.

Iti trabaho iti ideolohiya, makitkita tayo ti problema iti saan a sustenido a panangikagumaan iti trabaho iti edukasyon, iti laksid ti baro a nagun-od iti panangisayangkat ti Abante a Kurso ti Partido manipud 2017. Adu a kadre kadagiti mangidadaulo a pusisyon ti agkurang ti gagem da nga agbasa ken agadal kadagiti klasiko nga artikulo a Marxista-Leninista-Maoista ken dagiti dokumento ti Partido tapno agserbi a reperensya iti panangrisut kadagiti praktikal a problema. Adda sumagmamano a kadre ti Partido nga agpakpakaanay iti bagbagi ken agpanpannakkel iti siguden a kaamuan, ken agkurangda iti napakumbaba a panangikagumaan nga ingato ti teoretikal a kaamuan da ken iti panagaramat iti teorya tapno lagumen dagiti kapadasan ken rebolusyonaryo a praktika da iti nadumaduma a tukad ti larangan ti trabaho.

Adda met pagkurangan iti sistematiko a gagem nga isayangkat dagiti panagsukisok iti gimong ken panagamiris iti dasig ken patakaran iti tuloy-tuloy a panagbaliw iti obhetibo a kundisyon. Kurang ti plano wenno gagem dagiti responsable a mangidadaulo a komite iti panagsukisok wenno panagsurbey tapno urnongen ti impormasyon ken umadaw ti teorya manipud iti kaamuan a perseptwal manaig kadagiti kundisyon iti saklaw dagiti trabaho da, nga iti sumagmamano a gundaway ket agtentennag iti narabaw a panagamiris kadagiti isyu, wenno nakapuy a panangawat iti kongkreto a kundisyon ti masa ken kadagiti kangrunaan nga isyu ken usapin para iti panangriing, panag-organisa ken panagpatignay kadakuada.

Nu awan ti nairut a panagkapet iti diyalektikal ken istorikal a materyalista a pannirigan ken pamuspusan, dagiti kakadwa a tinamaan ti empirisismo ket addaan tendensya a makita laeng dagiti banag nga adda iti sango da, ken saanda a makitkita ti proseso ti panagdur-as. Iti panawen ti balligi ken panagabante, agbalbalin da a kampante ken napangas, ken mapapaay da a makita ti dalan tapno iyabante pay ti rebolusyonaryo a praktika tapno gun-oden dagiti dakdakkel a balligi, nga agtennag iti istagnasyon ken panagsanud. Iti panawen ti kinarigat ken pannakapaay, allalun-onen dagiti problema ken mangrugi a kumapoy ti pakinakem da, ken maigalis iti pesimismo ken pasibidad. Adu dagiti napaay a rimbawan ti buteng da iti sakripisyo ken masansan ket guyguyoden ti panagtarigagay da para iti nalag-an ken nalaka a biag, ken iti sango ti nalipit a kasasaad, ket agtennag iti panagtaray.

Ti panagbaw-ing manipud iti kinapangas ken panagkampante, agturong iti pesimismo ken pasibidad, agturong iti panagamak ken panagtaray ket tatak ti mentalidad ti burges wenno petiburges wenno makintengnga a mannalon a kabaliktad ti proletaryo a kinagaget, kinapakumbaba, kinaanus, militansya, optimismo ken kinatured.

Linati ti petiburges a mentalidad ti adu a paset ti rebolusyonaryo a makina tayo, gapu na a saan a nasayaat ti taray daytoy. Adda ti manon a perdi a paset na ti natennag, iti sango ti dakkel a rikut iti panaglaban iti estratehiko nga opensiba ti kabusor iti napalabas a lima a tawen. Kas ti aniaman a makina, kasapulan nga ikkaten tayo ti lati ken sukatan dagiti naperdi a paset kadagiti baro a pyesa, tapno agtayyek ti rebolusyon ken umabante a napaspas.

Kadagiti napalabas a tawen, ti suhetibismo ket nagresulta kangrunaan kadagiti Kannawan, ken sekundaryo kadagiti “Kannigid” a kamali, pagkurangan, tendensya ken iti amin a tay-ak dagiti rebolusyonaryo a trabaho.

Makitkita tayo dagiti nasaknap a problema iti tay-ak ti rebolusyonaryo nga armado a dangadang bunga ti suhetibismo iti ideolohiya. Iti pannakapaay nga awaten ti dana ti panagdur-as ti gubat ti umili, partikular manipud iti umuna a paset agturong iti makintengnga a paset, ken manipud iti makintengnga agturong iti sumaruno a paset, saan a sumagmamano laeng a larangan gerilya ti NPA ti nagsardeng iti nabayag a panawen iti daan a tukad. Adda dagiti lider ti Partido a mangnamnama laeng iti siguden a tukad ti kapadasan da ken saan a nalawag a makitkita ti dana tapno tuloy-tuloy nga iyabante a padalluyon ti rebolusyon, wenno manipud iti maysa a tukad agturong iti sumaruno a tukad, ti pagkasapulan a danunen ti intero a saklaw dagiti larangan gerilya, manipud iti kadagaan a nabantay, agturong kadagiti turturod, patag, igid ti karayan, igid ti baybay agingga kadagiti sentro ti ili.

Pinaakikid da ti saklaw ti NPA kadagiti mapangnamnamaan da a base a gerilya ken kadagiti kuta iti bantay, ken inlimitar da ti saklaw ti inisyatiba a militar ken pulitika ti Partido ken NPA. Ti bukod a panagpaakikid ket salungasing iti kasapulan dagiti yunit gerilya a tuluy-tuloy a gumaraw ken umabante, ken kanayon nga agtalinaed nga adda iti opensibo. Dagiti mapangnamnamaan a base a gerilya ket nagbalin a sumagmamano a “paborito” wenno “comfort zone” a barbaryo, komunidad wenno kampo iti bantay nga asideg iti suporta ti masa, linya ti suplay ken pasilidad iti komunikasyon.

Ti panagpaakikid iti bagi ken pannakapukaw ti inisyatiba ket nagtennag iti konserbatismo a militar, kalpasan a nalimitaran wenno saan a nadanon dagiti lugar nu sadinno a mabalin a bumira ti NPA iti kabusor. Timmaud dagiti kagiddan a problema, karaman ti panagurnong ti impormasyon a paniktik, pangalaan ti suplay, komunikasyon ken dadduma pay. Saan a nalaka a makaambus ti NPA iti haywey gapu ta ti kangrunaan a pwersa daytoy ket nakakampo iti interyor. Nagbalin a narigat ken mangan ti adu nga oras ti panagisayangkat kadagiti reyd, ambus wenno dadduma pay a basaran a taktikal nga opensiba. Nagpakaanay laengen kadagiti atritibo a taktikal nga opensiba (harassment, panagdusa, ken dadduma pay) ken napukaw iti plano ti pagkasapulan a sustenido nga agisayangkat kadagiti anihilatibo wenno basaran a taktikal nga opensiba kas kangrunaan a paset ti estratehiya tayo a paset-paset a pakapsuten ti kabusor ken tukad-tukad a papigsaen ti hukbo ti umili.

Iti signipikante a bilang dagiti larangan gerilya nga addaan pigsa’t kumpanya wenno addaan sumagmamano a pwersa a platun, nagpakaanay ken agpakpakampante ti sumagmamano a lider ti Partido. Adda dagiti kaso ti sobra a konsentrasyon dagiti pwersa iti sumagmamano a rehiyon wenno subrehiyon, nu sadinno a dua wenno nasurok pay a pwersa a gerilya ti maur-urnong kadagiti kampo iti kabanbantayan nga agbaybayag iti mano a bulan, tapno isayangkat dagiti panagsanay, innadal, nabayag a pulong wenno tapno aguray ti saan a nasimpa a naplano nga opensiba, a gapuanan ti sumagmamano a pwersa ken mano a panawen laengen a natedda para iti gawaing masa. Dagitoy a nabayag a panagkampo ket nagbalin a nadagsen iti organisado a masa ken dagiti pwersa a milisya a kasapulan a nagdoble-trabaho tapno tuluy-tuloy a pagayusen ti suplay. Nagresulta daytoy iti panaglukay ti disiplina a gerilya ken “sibilyanisasyon” dagiti pwersa a gerilya. Adda sumagmamano a yunit ti NPA a sumangsango iti problema ti panaginom ti sumagmamano a mannakigubat a gerilya.

Iti panawen ti panagabante ti armado a dangadang, dagiti addaan suhetibista a kamali ket addaan tendensya a tagibassiten ti kabaelan ti kabusor ken makitkita da laeng dagiti taktikal a balligi da. Mapukpukaw iti panunot da a ti kabusor nga adda iti estratehiko nga opensiba, ket agtaltalinaed a superyor iti estratehiko a tukad, ken pangpangatuenna ti kabaelan na nga iyaramid ti intelidyens ken agplano kadagiti kampanya iti estratehiko nga opensiba. Paay iti balangkas ti panagpanunot a saan a guduaen ti maysa iti dua—makitkita laeng ti positibo, ken saan a ti negatibo, ramrambakam ti balligi ngem saan nga agsagsagana iti dakdakkel a laban. Mangrugrugi nga aglukay iti kapet kadagiti basaran a prinsipyo iti operasyon gerilya ti konsentrasyon, panagwaras ken panagakar nga agtentennag kadagiti problema iti nabayag a sobra a konsentrasyon dagiti bertikal a yunit gerilya ken nalabes a dispersal dagiti horisontal a yunit iti gawaing masa, ken kinaawan ti panaglimed kadagiti tignay ken maniobra, kas ti panagtignay iti aldaw kadagiti naparang a lugar, nga agit-ited iti kabusor ti nalawag a panangsirip para iti sarbeylans ken monitor. Saan a manmano ti nagbalin a napannakkel ken arogante, ken ti dadduma ket nagbalin a militarista ken dominante, saan laeng nga iti panangsango iti kabusor, nu di ket nakarkaro pay, iti panagsango iti masa.

Iti adu a paset ti pagilian, napaay dagiti komite ti Partido ken kumand ti NPA a pagtalinaeden a nairut ti kapet iti rebbengen nga iyabante ti rebolusyon agraryo kas tulbek iti panagpatignay iti masa, panangbangon ti base a masa ken panangpundar kadagiti organo ti bileg iti pulitika. Kadagitoy a lugar, napaay tayo nga iyaramid ti krusyal a rebbengen ti panagsukisok iti gimong ken panagamiris iti dasig tapno mabukel ti plano para iti panangpagkaykaysa iti masa ken panangiyuna kadagiti dangadang da. Adda ti sumagmamano a yunit a nagbalin a nadagsen ti saka da ken napaay a danunen ti masa kadagiti baryo da tapno agipatungpal ti trabaho iti pulitika. Adda ti sumagmamano a kadre ti Partido a nagpakaanay iti “panagtext” kadagiti a sangay ti Partido imbes a makipagpulong kadakuada.

Naladawen idi naipasagepsep iti sumagmamano a komite a ti base a masa ket saan a mabuangay ken makonsolida iti panagsanggir iti sumagmamano a tradisyunal a lider iti baryo wenno iti simple a panangited ti materyal a serbisyo iti masa a saan nga ingatngato ti naindasigan a kamulatan da, bukbuklen ken pappapigsaen dagiti organisasyon masa da, ken ingatngato ti militansya da babaen kadagiti dangadang iti rebolusyon agraryo. Ginundawayan ti kabusor ti nakapsut a pundasyon ti base a masa babaen ti panagaramat ti naranggas a terorismo laban iti masa ken panangallilaw kadakuada kadagiti kari ti dakkel a gatad ti kwarta iti gandat a pagsinaen ti masa ken iti rebolusyonaryo a mannakigubat da, kadagiti lider ti baryo wenno pamilya ti tunggal maysa. Gapu ta awan ti kolektibo a panaglaban, ag-agawen tatta dagiti pasista dagiti daga da ken iyaw-awat da kadagiti gangannaet a minasan ken plantasyon.

Iti panawen ti panagatras, dagiti addaan suhetibista a kamali ket addaan tendensya a nalabes nga agtantya iti pigsa ken kadakkel ti kabusor. Napukaw ti diyalektikal a takder da tapno agpanunot a naimbag, naanep nga agpaliiw ken ammuen dagiti pwersa, panggep, ken dagiti plano ti kabusor ken takwaten dagiti punto ti pagkapuyan daytoy, ken planuen dagiti pamuspusan tapno gudwaen dagiti pwersa ti kabusor ken aglukat kadagiti oportunidad tapno patamaan dagiti nakasina wenno maisinsina a yunit daytoy. Rinimbawan isuda ti burgis a panagbuteng. Paay met laeng daytoy iti balangkas ti kapanunotan. Nagtennag da iti panaglibas. Ti depensa ket nagbalin a bangbangir a panagtaray ken puro a pasibo a panagdepensa, iti porma ti panag-atras iti inpagarup a sadiri iti bantay nga awanan suporta ti masa ken saan a nakapagplano iti panagakar kadagiti baro nga erya. Nakarkaro pay, inabandona da ti base a masa ken pinanawan da nga awanan kabaelan nga agdepensa ken awanan plano a lumaban. Iti kastoy, insina da ti bagbagi da ken naikabil iti puro a militarista a sitwasyon a pimmabor iti plano ti kabusor.

Iti napalabas a tawtawen, dagitoy a nagkamalian ken nagkurangan ket nagresulta iti pannakapaay ti adu a yunit ti NPA a natibker nga agdaldalluyon a palawaen dagiti larangan gerilya segun iti linya ti nalawa ken nairteng a gubat a gerilya basar iti lumawlawa ken umun-uneg a base a masa. Ti parikut ti panagpaakikid iti bagi ken ti pannakapaay a tuloy-tuloy a palawaen ken ingato ti tukad ti rebolusyonaryo a praktika, ket nagtennag iti kinaawan-kabaelan ti NPA a pwersaen ti kabusor a bennaten ti pwersa na, nu di ket binaybay-an daytoy nga agisayangkat kadagiti kampanya ti gradual constriction ken dagiti focused military operation. Inkabil daytoy dagiti pwersa a gerilya iti sitwasyon a puro-militar ken pasibidad militar, a nakasina iti pulitikal a suporta ti base a masa, bayat a ti base a masa ket naipasidong iti brutal nga armado a represyon. Signipikante ti pannakapaay a sinagaba ti NPA ken ti rebolusyonaryo a masa bunga dagitoy nga internal a kamali.

Bayat nga usto para kadagiti mangidadaulo a komite nga ikkan ti prinsipal nga atensyon ti rebbengen iti armado a dangadang kas kangrunaan a porma ti dangadang, napaliiw tayo ti kamali ti sumagmamano a komite ti rehiyon ti Partido a saan da nga epektibo a naidauluan ti rebolusyonaryo a tignay masa agpada iti kasyudadan ken kaaw-awayan. Iti adu a kaso, maisarming daytoy iti pananglimita iti istruktura, panangpapigsa ken operasyon ti Partido iti istruktura iti komand ken sakop ti NPA, isu nga, malimlimitaran ti inisyatiba ti Partido iti balangkas ti NPA. Daytoy a kamali ket nadillaw idi 2015 ngem agtultuloy iti adu a rehiyon.

Iti tay-ak ti rebolusyonaryo a tignay masa, mapaliiw tayo a kangrunaan dagiti Kannawan nga oportunista a tendensya ti konserbatismo, buntotismo, ligalismo, ekonomismo, repormiso ken NGOismo. Mapaliiw dagiti parikut iti diyalektikal a panagkumbina dagiti ligal ken iligal a porma ti dangadang, ken ti tendensya nga ipisok ti amin nga itlog iti ligal a basket, nu sadinno a kangrunaan wenno ekslusibo a pagay-ayusen ti trabaho iti pulitika iti porma a legal bayat nga maipapaigid ti panangpadur-as iti rebolusyonaryo a trabaho a limed. Mapaliiw ti tendensya a bangbangir a mataltalmegan ti dangadang para iti reporma iti sidong ti agar-ari a reaksyunaryo a gubyerno, bayat a mabaybay-an ti rebbengen nga ibunannag ti naindasigan a galad ti agar-ari nga estado, ti kumprehensibo a panagpadur-as iti tignay a limed kadagiti syudad ken kaaw-awayan, ken ti panagsilpo ken panagsuporta iti rebolusyonaryo nga armado a dangadang kas kangrunaan a porma ti dangadang. Adda tendensya daytoy a pagserbien dagiti tignay masa iti maaw-awagan a burges a “pressure politics,” imbes nga agserbi daytoy kas pamuspusan ti panangirakurak ti kolektibo a pungtot ti masa laban iti kontra-umili a patakaran ti reaksyunaryo nga estado, ken kas armas nga asaen ken pangiggeman ti masa para iti militante a pangpulitika a dangadang da, kagiddan ti rebolusyonaryo nga armado a dangadang. Addaan daytoy ti kontra-epekto a panangpakapsut iti demokratiko a tignay masa.

Mapaliiw tayo ti tendensya nga agamiris wenno sumungbat kadagiti isyu manipud iti naakikid a pannirigan ti petiburgesya ken kamali nga iladawan daytoy kas interes ti dasig a mangmangged. Iti sumagmamano a gundaway, maisaysayangkat dagiti aksyon masa iti balangkas ti limitasyon dagiti makintengnga a dasig nga addaan epekto a maguyod ti tukad ti militansya ti umili.

Nakarkaro pay, adda met tendensya dagiti pwersa a ligal demokratiko a nalabes nga isina ti bagbagi da iti armado a dangadang kas sungbat iti propaganda ti kabusor, imbes nga ipaganetget ti kina-nainkalintegan ti armado a panaglaban iti tiranya. Naaddaan ti epekto daytoy iti panangpakapsut iti pulitikal a suporta para iti rebolusyonaryo nga armado a dangadang.

Adda met Kannawan nga oportunista a tendensya ti konserbatismo iti usapin ti panangpadur-as ti suporta ti nagkaykaysa a prente iti armado a dangadang. Kurang wenno saan a maik-ikkan atensyon ti panangpapigsa kadagiti limed a sektoral nga organisasyon ti masa. Saan a naregta, sistematiko ken sustenido ti panagpatignay kadagiti kadre, aktibista ken suporta a materyal manipud iti intar dagiti petiburgesya nga intelektwal ken propesyunal para iti New People’s Army. Kurang ti panangikagumaan nga agbukel kadagiti alyansa iti nailian a burgesya tapno umani ti suporta para iti rebolusyonaryo nga armado a dangadang.

Iti tay-ak ti organisasyon, agtentennag iti liberalismo, ultra-demokrasya ken burukratismo ti empirisista a suhetibismo. Nagresulta daytoy iti panagkapsut dagiti sistema a komite ken kolektibo a panangidaulo.

Adu a kaso nu sadinno a dagiti kagawad ti kalihiman wenno nakatakder a komite ket nasina-sina ken awanan komunikasyon, ken saan a kolektibo a makapagdesisyon kadagiti kadagusan nga usapin, isu a maibatbati iti kalihim ti panagdesisyon. Adda dagiti kaso a dagiti kadre iti komiteng larangan ket nabayag a suminsina iti platun, ken agiruruar kadagiti atas nga awan ti kolektibo a desisyon.

Kurang iti militansya ken propesyunalismo kadagiti pamuspusan ti panagtrabaho iti intar ti mano a kadre ti Partido. Bumaybayag dagiti pulong gapu iti kinakurang ti panagsagana, wenno gapu ta saan a resolbado dagiti risiris iti uneg dagiti komite. Dagiti nababbaba a komite ket saan a regular nga agisumite kadagiti ulat kadagiti nangatngato a komite, bayat a dagiti mangidadaulo a komite ket saan a makaiparuar ti napapanawen a direktiba ken patakaran, nga agresresulta iti kinaawan ti panagkaykaysa ken koordinasyon iti baet ti nadumaduma nga organo. Adda dagiti komite a saan a nakaisayangkat ti regular wenno espesyal a pulong ken kumperensya iti trabaho tapno umadaw kadagiti adal manipud iti kapadasan ken agbukel kadagiti patakaran. Amin dagitoy ket manipestasyon ti empirisismo iti tay-ak ti organisasyon.

Rumbeng nga ikkan tayo ti espesyal nga atensyon ti parikut iti burukratisasyon iti intar ti mangidadaulo a komite ti Partido iti tignay masa iti kasyudadan. Adu ti naigamer kadagiti upisina da ken nakasina iti nalawa a masa, ken saanda nga ited amin a kabaelanda nga agipatungpal ti gawaing masa kadagiti pabrika ken komunidad, wenno agkurang da iti panagpinget. Adda met ti tendensya nga agsadag iti liberalismo iti intar dagiti kangrunaan a kadre ti Partido ken dagiti pultaym nga organisador nga agbalin a “sibilyanisado” ken “domesticated” wenno nakatali kadagiti usapin iti balay, wenno maaddaan ti kapanunotan nga “empleyado” (9-5 oras iti upisina). Iti sumagmamano a paset ti organisasyon, dagiti patakaran iti disiplina ti Partido ket agdadata a malablabsing. Dagiti saludsod a mangrirriribuk kadagitoy a patakaran ket saan a mapangngeddeng a sinango ken nabaybay-an.

Napaay ti sumagmamano a kangrunaan a kadre ti Partido nga agpadur-as ti sistema ti limed nga operasyon tapno pagtalinaeden a tuleng ken bulsek ti kabusor. Binaybay-an da nga agbalin da a bulnerable iti maulit-ulit nga atake ken panangsilo ti kabusor. Suhetibista ti tarigagay da a panunoten a nawaya da iti sarbeylans ti kabusor iti simple a batayan a makitkita da ti sanguanan da, ngem ti kinapudno na ket saanda nga agputputed ti silpo kadagiti “fixed points” wenno dagiti nakapirmi a silsilpuan da. Napaay da a makita ti panagsisilpo dagiti insidente iti seguridad ken ibilbilang da dagitoy kas nakasina a kaso, napaay da nga maawatan ti panggep ti kabusor ken dagiti pangmabayagan a plano daytoy a sistematiko a dupraken ti limed nga iket ti Partido.

Ilanlanad tayo iti ngato ti sumagmamano a kangrunaan a parikut iti ideolohiya, pulitika ken organisasyon a natudo ti mangidadaulo a komite ti Partido iti saklaw a trabaho. Dagiti kadre ken komite ti Partido ket madama nga maikonkonsolida tapno rimbawan ti nadumaduma a porma ti suhetibismo ken nabayagen nga agraraira a Kannawan a kamali, tendensya, wenno dagiti pagkurangan, tapno papigsaen dagiti rebolusyonaryo a pwersa ken iyabante ti rebolusyon a napigpigsa.

Agtultuloy a pappapigsaen tayo ti kolektibo a panangidaulo ti Komite Sentral, kabinnadang dagiti adda iti maikadwa ken maikatlo a linya ti liderato, tapno idauluan ti tuluy-tuloy a panagdur-as dagiti rebolusyonaryo a pwersa iti pagilian. Ti ipupusay ni Ka Joma ken sumagmamano a kangrunaan a lider tayo ket nagdakkel a pukaw iti sentral a liderato ti Partido. Nupay kasta, naan-anay a mulat ti Partido a nabuangay daytoy nga addaan dakkel a rebbengen nga idauluan ti demokratiko a rebolusyon ti umili a Pilipino ken ti sosyalista a rebolusyon iti masanguanan, banag a na labes iti biag ti siasinoman a tao, ken nasursurok iti kabaelan nga akemen ti sumagmamano a tao laeng.

Iti agdama, agig-iggem ti nalablabes a responsibilidad dagiti nauubbing a kadre ti Partido iti amin a tukad, ken penpenneken da ti nadumaduma a tay-ak ti rebolusyonaryo a trabaho iti pinget ken regta. Pappapigsaen tayo tatta ti panagtitinnulong dagiti beterano ken dagiti baro a kadre ken mannakigubat tapno idauluan ti Partido, ti NPA ken ti umili a Pilipino agturong ti nangatngato a tukad ti armado ken amin a dadduma pay a porma ti panaglaban.

Nakasagana dagiti mangidadaulo a kadre ken komite a militante a sanguen ti karit a lalo pay a papigsaen ti Partido iti ideolohiya, pulitika ken organisasyon. Iti kaanoman, determinado ti Partido nga itandudo ti Marxismo-Leninismo-Maoismo ken dagiti sursuro ni Ka Joma, patibkeren ti panangidaulo ti Komite Sentral, ilinteg ti amin a kamali ken pagkurangan, rimbawan ti amin a lapped ken iyabante ti demokratiko a rebolusyon ti umili agturong iti masanguanan daytoy a balligi.

IV. Dagiti kadagusan ken kritikal a rebbengen iti panangpapigsa ti Partido ken panangiyabante ti demokratiko a rebolusyon ti umili

Iti tengnga ti kumarkaro a krisis ti malakolonyal ken malapyudal a sistema iti sidong ti rehimen US-Marcos ken napaspas a panagkaro ti kasasaad ti umili a Pilipino, kasapulan a kadagusan nga aramiden ti sibubukel a Partido ti ingge’t kabaelan a panangriing, panang-organisa ken panangpatignay iti nalawa a masa ti umili a Pilipino para iti rebolusyonaryo a panagtignay. Daytoy ket pananggammat kadagiti paborable a kundisyon tapno kumprehensibo ken naregta a maiyabante ti baro a tipo ti demokratiko a rebolusyon ti umili.

Umannurot iti kastoy a kabuklan a panggep, rumbeng a papigsaen tayo ti Partido iti amin a benneg kas abante a destakamento ti proletaryado a Pilipino ken dadaulo ti demokratiko a rebolusyon ti umili, papigsaen ti New People’s Army ken iyabante ti rebolusyonaryo nga armado a dangadang, iyabante ti rebolusyonaryo a tignay masa agpada iti syudad ken kaaw-awayan, ad-adda pay a palapaden ken papigsaen ti nagkaykaysa a prente ken idauluan ti masa a Pilipino kadagiti anti-pasista, anti-imperyalista ken anti-pyudal a dangadang laban iti rehimen US-Marcos.

Isayangkat ti tignay panagilinteg tapno papigsaen ti Partido

Kadagitoy amin a rebbengen, ti kangrunaan ken kadagusan ket ti ad-adda pay a panangpapigsa iti Partido. Tapno maaramid daytoy, aw-awagan ti Komite Sentral ti amin a kadre ken komite ti Partido, a mapangngeddeng ken napasnek nga iyabante ti maysa a kumprehensibo a tignay panagilinteg para iti napateg a dangadang tapno laksiden dagiti makadadael nga epekto ken impluwensiya ti nadumaduma a tedda ti burgis ken petiburgis a suhetibismo a nangpakapsut iti Partido ken nangitunda kadagiti nakaro a panagsanud iti rebolusyonaryo a tignay iti napalabas a mano tawen. Iti laeng panangisayangkat ti tignay panagilinteg a marimbawan tayo dagiti panagsanud ken pannakapaay tayo, balbaliw a maibuwelo ti panaglangto ti Partido, ken natibker a maiyabante dagiti trabaho iti amin a tay-ak ti rebolusyonaryo a gagem.

Isayangkat ti liderato ken intero a kamkameng ti Partido daytoy a tignay panagilinteg a nairut nga agkaykaysa iti sidong ti tarabay ti Marxismo-Leninismo-Maoismo, kasta met nga umannurot iti linya ken panagamiris ti Partido iti gimong a Pilipino, ken programa para iti panangiyabante ti demokratiko a rebolusyon ti umili babaen ti naunday a gubat ti umili segun iti estratehiko a linya ti panangkubkob iti kasyudadan manipud iti kaaw-awayan. Iti panangisayangkat iti tignay panagilinteg, panggep tayo a paunegen ken pairuten ti pannakaawat tayo iti Marxismo-Leninismo-Maoismo ken iti linya ken programa ti Partido nga addaan estratehiko a panangtannawag iti panangingato pay iti tukad ti rebolusyonaryo a praktika basar kadagiti nagun-od tayo a balligi ken nalagom a kapadasan.

Ti tignay panagilinteg ket kangrunaan a maysa a tignay tapno pagadalan ken balbaliw a pasingkedan ti takder para iti Marxismo-Leninismo-Maoismo ken para kadagiti basaran a prinsipyo, linya, konstitusyon ken programa ti Partido, tapno lagumen dagiti napalabas a kapadasan ken tapno agdillaw ken agdillaw-iti-bagi. Ti kangrunaan a panggep ket ingato ken pairuten ti pannakaawat iti Marxismo-Leninismo-Maoismo ken kadagiti prinsipyo ken linya ti Partido babaen ti panangisilpo daytoy iti rebolusyonaryo a praktika tayo iti napalabas a mano a tawen ken kritikal-iti-bagi a tasaen ti trabaho ken dagiti kadre tayo, tapno kalitatibo nga ingato ken patademen ti militante nga istilo ti panagtrabaho.

Iti panangisayangkat iti tignay panagilinteg, panggep tayo a sanguen ken risuten dagiti nabayagen nga agraraira a kakapuyan ken kamkamali iti panangbukel ti Partido, iti panangisayangkat ti rebolusyonaryo nga armado a dangadang umannurot iti linya ti nalawa ken nairteng a pannakigubat a gerilya basar iti lumawlawa ken umun-uneg a base a masa ken iti panangiyabante ti rebolusyonaryo a tignay masa iti kasyudadan ken kaaw-awayan.

Ti desisyon nga isayangkat ti tignay panagilinteg ket kasaruno dagiti gagem ti nadumaduma a komite iti rehiyon ti Partido ken dadduma a mangidadaulo a komite iti napalabas a maysa wenno dua a tawen iti panangilinteg kadagiti napalabas a kamali ken kakapuyan a nakatubeng ken nakatiltil iti panagdur-as da. Panggep ti tignay panagilinteg a konsolidaen ken ingato dagitoy a gagem iti tukad ti sibubukel a Partido, manipud iti sentro a liderato agingga iti amin a mangidadaulo a komite ken sangay ti Partido iti Luzon, Visayas ken Mindanao ken iti ballasiw-taaw.

Malagip nga idi katengngaan ti 2016, inpanawagan ti Departamento iti Pulitika iti amin a puwersa ti Partido nga ilinteg dagiti kritikal a parikut iti ideolohiya, pulitika ken organisasyon. Daytoy ket panangsungbat iti napaliiw a panagbaba a turongen iti napalabas a tawtawen iti usapin ti rebolusyonaryo a tignay masa ken iti rebolusyonaryo nga armado a dangadang. Ti panawagan ket ad-adda pay nga naiduron iti panangisayangkat ti Maikadua a Kongreso idiay a tawen.

Naaddaan daytoy ti dagus nga epekto iti panagbaliktad iti negatibo a turongen. Dagus a napaliiw ti signipikante a panag-abante iti armado a dangadang iti pannakabukel ti base a masa manipud 2017 agingga 2019. Nupay kasta, napaay tayo a mapangngeddeng ken napinget nga iyabante ti tignay panagilinteg. Saan a nasustinir dagiti immuna a nagun-od bayat a dagiti basaran a parikut ket timmaud iti sango ti napainget a kontra-rebolusyonaryo a gera ken brutal a supresyon ti kabusor.

Iti napalabas (umuna ken maikadua) a tignay panagilinteg, sinango ti Partido ken linabanan ti sistematiko a gagem ti sumagmamano a rebisyunista a traydor a nangdungpar kadagiti basaran a prinsipyo ti Marxismo-Leninismo-Maoismo, ken inatake da ti panagamiris ti Partido iti malakolonyal ken malapyudal a sistema, ken ti linya daytoy iti demokratiko a rebolusyon ti umili babaen ti naunday a gubat ti umili, estratehiya daytoy ti panangkubkob iti kasyudadan manipud iti kaaw-awayan ken ti rebisyunista a linya daytoy.

Lablabanan tayo iti agdama ti nasaknap nga empirisismo ken ti nadumaduma a tedda ti burgis ken petiburgis a suhetibismo nga agtentennag iti Kannawan ken “Kannigid” nga oportunista a tendensya. Tapno isayangkat daytoy a dangadang, nasken nga isayangkat tayo iti militante a pamuspusan ti tignay iti panagadal tayo. Ti kina-militante ket kinakritikal-iti-bagi iti panagadal, panagtasa ken panaglagom kadagiti napalabas a rebolusyonaryo a praktika tayo, tapno matudo ken mailaksid dagiti kamali ken pagkapuyan, a saan man a naparang, ket makaperdi, makapakapsut ken agturong iti agdadata a rebisyunismo.

Panggep ti tignay panagilinteg nga ikkan ti konsentrado a langa ti kanayon nga agraraira a risiris iti uneg ti Partido iti baet ti proletaryado a rebolusyonaryo a linya ken moda ti panagpanpanunot. Rumbeng nga ingato tayo ti kabaelan dagiti kadre ti Partido iti panagaramat ti diyalektikal ken istoriko a materyalismo tapno napasnek nga ibunannag ken labanan dagiti burgis ken petiburgis nga ideya a simmagepsep iti Partido, laksiden ti suhetibismo, ken ilinteg ken rimbawan ti nabayagen nga agraraira a kamkamali ken pagkapuyan kas ti konserbatismo, buntotismo, kumandismo, liberalismo, ultrademokrasya ken burukratismo. Rumbeng nga iwaksi tayo ti amin a petiburges a bagahe, rimbawan ti pesimismo, paunegen ti panagtalek tayo iti Partido ken iti masa, isagana ti bagbagi tayo para iti amin a kasapulan a sakripisyo ken ikagumaan a gun-oden dagiti dakdakkel pay a balligi kas iti dati.

Buklen ti tignay panagilinteg ti sumagannad a paset:

a) Maysa a kampanya a panagadal tapno napasnek nga adalen ken sublian dagiti basaran a prinsipyo ti Marxismo-Leninismo-Maoismo babaen ti Praymer iti Marxismo-Leninismo-Maoismo ni Ka Joma ken sublian dagiti klasiko a sinurat dagiti naindaklan a lider komunista babaen kadagiti kolektibo a nga innadal ken indibidwal a panagbasa.

b) Maysa a kampanya a panagadal tapno napasnek a sublian nga adalen ti Konstitusyon ti Partido ken ti Programa para iti Demokratiko a Rebolusyon ti Umili.

c) Maysa a kampanya a panagadal tapno sublian nga adalen dagiti dokumento ti Umuna ken Maikadwa a Naindaklan a Tignay Panagilinteg. Dagiti dokumento a Dagiti Nairut a Rebbengen Tayo ken ti Partikular a Galad ti Gubat ti Umili, kasta met dagiti dokumento ti pakasaritaan ti Partido.

d) Maysa a kampanya tapno lagumen dagiti kapadasan ken sublian nga adalen dagiti dati a panaglagom tapno tuduen dagiti Kannawan ken “Kannigid” nga oportunista a tendensya ken kamkamali a nangitunda ti nakaro a dadael iti Partido ken armado a rebolusyonaryo a tignay. Dagitoy a panaglagom ket nasken a nakasurat ken maisumite iti Komite Sentral. Ti sumagmamano a napili nga artikulo ket maiwarnak iti Ang Rebolusyon, ti teoretikal a pagiwarnak ti Partido.

e) Maysa a kampanya a panagsukisok iti gimong ken panagamiris iti dasig iti amin a tukad tapno paunegen ti panangawat tayo iti kongkreto a kasasaad ti masa iti sidong ti uming-inget a krisis ti malakolonyal ken malapyudal a sistema, nga addaan panggep a padur-asen dagiti plano ken pamuspusan tayo ti panangriing, panag-organisa ken panagpatignay iti masa.

f) Rumbeng nga isayangkat ti maysa a kampanya iti panagdillaw ken panagdillaw-iti-bagi iti amin a tukad tapno pagkaykaysaen ti Partido, ken amin a rebolusyonaryo a pwersa ken masa.

g) Maysa a kampanya tapno tasaen ti panagipatungpal ti amin a kadre ti Partido tapno tuduen dagiti pagpigsaan ken pagkapuyan, ken agbukel kadagiti resolusyon tapno ad-adda pay a papigsaen ti proletaryo a disiplina, rebolusyonaryo a pannirigan ken pagtakderan da.

h) Maysa nga agtultuloy a kampanya tapno siguraduen ti naan-anay a panagipatungpal iti Tallo a Tukad a Kurso ti Partido tapno siguraduen a makalpas dagiti saan pay a nakalpas.

Tapno tulungan a maiduron ti tignay innadal para iti panahilinteg, amin a reperensya ket kasapulan nga addaan kopya a nakaimprenta wenno digital, karaman dagiti klasiko a Marxista-Leninista-Maoista nga artikulo, amin a basaran a dokumento ti Partido, dagiti libro ken dagiti kangrunaan nga artikulo ni Ka Joma, ken dadduma pay. Kasapulan a siguraduen ti popularisasyon dagitoy babaen iti panangipatarus ken dadduma pay a pamuspusan.

Ti tignay panagilinteg ket maysa nga apoy ti karit a pang-ideolohiya. Iti sumaruno a maysa wenno dua a tawen, rumbeng a napinget nga iyabante ken kumpletuen iti amin a tukad manipud iti Komite Sentral ti Partido agingga iti amin a sangay ti Partido. Natalek tayo a naragsak nga awaten ti dakkel a mayorya ti kamkameng ti Partido ti tignay panagilinteg ken nakasagana a natured nga umabante, kalpasan ti dadakkel a panagabante ti rebolusyonaryo a tignay kalpasan ti umuna ken maikadwa a tignay panagilinteg.

Bayat nga iyar-aramid tayo ti tignay panagilinteg, nasken a papigsaen ti Partido ti bagbagi na iti nauneg ken nalapad a panagramut iti masa. Rumbeng nga alaen dagiti pangrehiyon a komite ti Partido ti inisyatiba iti panangbukel kadagiti pangteritoryo a komite ti Partido tapno sakupen dagiti prubinsya, distrito, syudad ken dagiti ili nga adda iti ruar ti sakupen wenno erya ti operasyon dagiti larangan gerilya ti NPA.

Mano a daras a palawaen ti kamkameng ti Partido a sumursurot iti prinsipyo ti natured a panagpalawa ti Partido a saan a mangipaspastrek iti uray maysa a saan a rumbeng, kangrunaan babaen ti panagrekrut kadagiti kadur-asan nga elemento a napaneknekanen ti kinapudno da kas aktibista a masa iti rebolusyonaryo a tignay masa ken bilang Nalabbaga a mannakigubat ti New People’s Army.

Papigsaen ti demokratiko a sentralismo ken ti sistema a komite ti Partido. Kasapulan a siguraduen tayo ti balanse ti natataengan, makintengga-nga-edad ken agtutubo a kadre kadagiti mangidadaulo a komite ti Partido babaen ti natured a panangituding kadagiti agtutubo a kadre iti nangatngato a pusisyon manipud iti intar ti mangmangged, mannalon ken petiburgesya iti kasyudadan. Rumbeng a palawaen ken papigsaen tayo ti limed nga iket ti Partido ken rebolusyonaryo a tignay iti kasyudadan ken kaaw-awayan tapno pagtalinaeden a tuleng ken bulsek ti kabusor.

Siguraduen ti panagimprenta ken nasaknap a panangiwaras ti Ang Bayan iti amin a kameng ti Partido ken dagiti pwersa a rebolusyonaryo.

Iyabante ti rebolusyon iti amin a benneg

Bayat a pappapigsaen tayo ti Partido babaen ti tignay panagilinteg, nasken nga iyabante tayo ti demokratiko a rebolusyon ti umili iti amin a benneg, kas panangikongkreto iti tignay panagilinteg ken pagrukodan ti balligi daytoy. Iyaramid tayo ti sumagannad a rebbengen umannurot iti kabuklan a panggep ti amin-a-benneg a panagabante ti rebolusyon:

a) Idauluan dagiti antipasista, anti-imperyalista ken antipyudal a dangadang ti nalawa a masa ti umili a Pilipino laban iti rehimen US-Marcos.

Ti rehimen US-Marcos ti agdama a konsentrasyon ti kakaruan a langa ti reaksyunaryo a pasista a panagari iti pagilian. Rumbeng tayo nga irakurak ti amin a kontra-umili a patakaran na nga agserserbi iti interes dagiti monopolyo kapitalista a bangko ken kumpanya, geopulitikal nga interes ti imperyalismo a US, iti naindasigan nga interes ti dadakkel a burgesya kumprador ken dadakkel nga apo’t daga ken iti panagpabaknang dagiti kurakot a burukrata. Iti agdama, ti pinakakonsentrado a langa ti nailian ken demokratiko a dangadang ti umili a Pilipino ket ti pananglaban iti manangidadanes, pasista ken aso-aso ti US a rehimen Marcos.

Rumbeng tayo nga isilpo ken ingato ti inaldaw a biag-ken-patay a dangadang ti nadumaduma a demokratiko a dasig ken sektor iti dangadang laban iti imperyalismo, pyudalismo ken burukrata kapitalismo. Nasken nga ibunannag, isina ken labanan ti rehimen Marcos ken iturong ditoy ti pungtot ti umili. Bayat nga idadauluan tayo ti umili iti dangadang da para kadagiti kadagusan nga addang (nayon a sweldo, nababa a presyo, nababa nga abang ti daga, subsidyo para iti edukasyon, salun-at ken dadduma pay), rumbeng tayo nga ibunannag ti reaksyunaryo a naindasigan a galad ti agar-ari nga estado, ken isilpo ti dangadang para iti reporma iti kabuklan a rebolusyonaryo a dangadang, kangrunaan iti armado a dangadang, tapno rippuogen ti agar-ari a sistema.
Iti sumaruno a tawen, rumbeng nga agpokus tayo iti panangibunannag ken pananglaban kadagiti patakaran ken programa iti ekonomya nga itantandudo ti imperyalismo a US babaen ti World Bank ken ti International Monetary Fund ken dagiti alyado da nga institusyon iti pinansya kas ti Asian Development Bank ti Japan, nga awan labas a mangibadbaddek iti sosyo-ekonomiko a karbengan, mangituntunda ti nasaknap a panagkamkam, pannakapukaw ti sapul ken pagbiagan ken dislokasyon iti ekonomiya.

Rumbeng nga irakurak ken labanan ti pannakibiang a militar ti US ken ti dumakdakkel a presenya a militar ti US iti Pilipinas, panangitakder kadagiti nayon a pasilidad militar ti US nga ar-aramaten daytoy kas pagrubwatan ti idurduron na a panangpapigsa ti hegemonya ti US iti rehiyon babaen ti pananglapped iti pumigpigsa nga ekonomiya ken militar ti China, ken ti uming-inget a panangsugsog laban kadagiti imperyalista a karibal na, a mangituntunda ti dumakdakkel a peggad a maguyod ti Pilipinas iti maysa nga inter-imperyalista a gera.

b) Papigsaen ti New People’s Army, mangabaruanan iti pigsa manipud kadagiti pannakapaay, ken balbaliw nga itakder ti base a masa.

Rumbeng a papigsaen ti Partido ti panangidaulo na iti NPA iti panangiruswat ti nasaknap ken nainget a pannakigubat a gerilya basar iti lumawlawa ken umun-uneg a base a masa. Kasapulan nga ikumbina na ti rebbengen iti panangiyabante ti armado a dangadang iti panangiyabante ti agraryo a rebolusyon ken panangiruswat kadagiti anti-pyudal a kampanya ti masa ken panangitakder kadagiti organo ti bileg iti pulitika ti umili para iti rebolusyonaryo a dangadang ken panangimaton iti bagbagi.

Rumbeng nga isayangkat ti Partido ti nainget a panagsanay dagiti Nalabbaga a kumander ken mannakigubat tapno ingato ti kabaelan da a lumaban, ti kaamuanda iti syensya a militar ken dagiti taktika, pangpulitika a kamulatan, disiplina, pisikal a pigsa ken kinatibker ti panunot ken determinasyon a lumaban ken baklayen dagiti kasapulan a sakripisyo para iti panagabante ti gubat ti umili. Ituloy a papigsaen ti kabaelan ken landok a displina ti NPA iti panangisayangkat kadagiti laban a napaspas a maleppas, nalaing a panagaramat kadagiti taktika a gerilya ti panagakar, konsentrasyon ken dispersal kasta met dagiti napaspas a maniobra ken panagtignay kakumbina ti nagato a tukad ti panaglimed ken pamuspusan iti panagtrabaho tapno pagtalinaeden a tuleng ken bulsek ti kabusor. Dadaelen ti iket ti paniktik ti kabusor ken pagbalinen nga awan mamaay ti usar dagitoy, wenno usaren laban kenkuana.

Buklen dagiti kadakkel-kumpanya a larangan gerilya ken padallu-dalluyon nga umabante, iti panangibangon kadagiti larangan gerilya ken base nga erya kadagiti kabanbantayan, turturod, kapatagan, igid-karayan, igid-baybay ken agturong kadagiti kangrunaan a linya ti transportasyon ken komunikasyon. Saan a mabannog nga iyabante dagiti trabaho iti ekonomya, kultura, edukasyon, medikal ken produksyon tapno danunen ti kadakkelan a bilang ti umili. Pwersaen ti kabusor a bennaten dagiti tropa na ken ikkatan ti kabaelan nga agisayangkat kadagiti nakapokus nga opensiba a militar.

Agsubbot manipud kadagiti nakapaayan ken balbaliw nga ibangon ti base a masa. Isayangkat ti rebolusyonaryo nga armado a dangadang kakumbina ti panagisayangkat ti nalawa nga antipyudal ken antipasista a tignay ti masa a mannalon. Nu sadino a kasapulan, agisayangkat kadagiti asembleya para iti nawaya a panagiyebkas iti baet ti masa ken ti NPA tapno tuduen ken agdillaw iti bagi kadagiti nagkapuyan ken nagkurangan iti napalabas ken balbaliw a pairuten ti pannakareppet da ken ingato ti determinasyon da nga agkadwa a lumaban.

Agisayangkat kadagiti basaran wenno anihilatibo a taktikal nga opensiba a kabaelan tayo nga ipangabak batay iti agdama a pigsa tayo iti akaba nga erya ti maniobra a pinartuat ti panagpalawa dagiti larangan gerilya. Biraen dagiti naisina ken nakasina a yunit ti kabusor. Agisayangkat kadagiti gubat para iti aktibo a panagdepensa ken kampanya a gerilya. Patignayen dagiti regular a pwersa a gerilya ti NPA ken milisyang bayan. Agisayangkat ti nasaknap nga atritibo a pannakigubat tapno idisbalanse ti kabusor ken tapno ilemmeng ti pudno a panggep ti kangrunaan a pwersa tayo. Agisayangkat kadagiti espesyal nga operasyon a partisano tapno biraen ti kabusor iti likudan daytoy. Dusaen ti kakaruan kadagiti pasista a kriminal ken dagiti napeklan a traydor nga siuutang ti dara ti umili. Alaen dagiti armas para kadagiti Nalabbaga a mannakigubat iti panangsamsam kadagitoy manipud iti kabusor babaen kadagiti taktikal nga opensiba wenno iti dadduma pay a pamuspusan.

Agtultuloy a papigsaen ti platun kas basaran a yunit ti NPA, ken itakder ti istruktura iti kumand iti amin a tukad, manipud kadagiti pangrehiyon a kumand iti operasyon agingga iti larangan. Papigsaen dagiti sangay ken komite ti Partido iti hukbo ti umili ken ti pulitikal nga organo iti uneg ti NPA ken iti amin a tukad tapno tuluy-tuloy a papigsaen ti pulitikal ken naindasigan a kamulatan dagiti Nalabbaga a mannakigubat na.

Lalo pay a papigsaen, sanayen ken paandaren dagiti yunit ti milisyang bayan, kakumbina dagiti yunit iti panagdepensa-iti-bagi dagiti rebolusyonaryo nga organisasyon ti masa, ken pairtengen ti pannakigubat a gerilya ti masa.

c) Papigsaen ken palawaen ti rebolusyonaryo a tignay masa iti kaaw-awayan.

Rumbeng a padur-asen ti Partido ken dagiti rebolusyonaryo a pwersa ti nalawa a tignay antipyudal ken antipasista iti kaaw-awayan. Rumbeng a patignayen ti dakkel a bilang ti masa a mannalon ken buraken ti agar-ari a puraw a terror nga inpataw kadakuada ti pasista nga AFP ken NTF-Elcac.

Padur-asen ken idauluan ti nalawa a tignay masa nga antipyudal umannurot iti minimum a programa ti Partido para iti reporma iti daga. Rumbeng tayo nga idauluan ken iyabante dagiti tignay masa iti intero a pagilian para iti nababbaba nga abang ti daga, pananggibus iti usura, umento iti sweldo dagiti mangmangged-talon, nababbaba a presyo dagiti ramit ken ramen iti produksyon, ken nainkalintegan a presyo dagiti produkto ti talon. Iyabante ti kampanya iti panagsukisok iti gimong ken panagamiris iti dasig tapno tuduen ti kadagusan a parikut ti masa a mannalon ken tapno padur-asen dagiti pamuspusan tayo iti panangriing, panag-organisa ken panagpatignay kadakuada.

Patignayen ti masa tapno labanan dagiti iskema iti panagsukat ti usar ti daga, panangdadael ken panagkamkam iti pagbiagan dagiti mannalon dagiti operasyon iti panagminas, panagpalawa dagiti plantasyon, ekoturismo, enerhiya ken proyekto nga imprastruktura ken dadduma a dadakkel a gangannaet ken lokal a negosyo. Ilaban ti pang-ekonomya nga interes ken karbengan dagiti mannalon ken nailian a minorya, a nakakumbina iti dangadang laban kadagiti gangannaet a burges ken monopolyo a kapitalista ken iti panaggamrud ken panagdadael iti kalikasan.

Iti uneg ken ruar dagiti larangan gerilya ti NPA, kasapulan nga itakder tayo ti kdakkelan a bilang dagiti timpuyog ti mannalon, saan laeng a lallaki, nu di ket karaman dagiti babbai ken kabataan a mannalon, bayat nga itaktakder tayo met dagiti organisasyon dagiti kabataan ken kababaihan, pati pay dagiti pangkultura ken dadduma pay a tipo ti timpuyog. Palawaen ken papigsaen ti nalawa nga organisasyon dagiti nailian a minorya tapno ilaban ti ansestral a daga ken iyabante ti dangadang da para iti awtonomiya ken bukod a pangngeddeng.

Papigsaen dagiti antipasista a dangadang iti kaaw-awayan. Dagiti anti-pasista a dangadang ket nairut a nakasilpo iti antipyudal a tignay. Ibunannag ken labanan dagiti panaglabsing dagiti pasista a pwersa ti estado iti karbengan-tao ken internasyunal a makatao a linteg. Patignayen ti masa tapno labanan ti militarisasyon kadagiti komunidad da ken ti “panagpasurender” laban iti umili iti linged ti inawaganda a Retooled Community Support Program (RCSP) ken Enhanced Community Livelihood and Integration Program (E-CLIP).

Papigsaen ti propaganda tapno labanan ti saywar ti kabusor ken ingato ti militansya ti umili tapno labanan ti pasista a represyon, ken suportaran ti rebolusyonaryo nga armado a dangadang. Ibunannag ken labanan ti pammarang a programa nga amnestiya ti rehimen Marcos nga agpangpanggep a manggudwa ken pakapsuten ti rebolusyonaryo a pangngeddeng ti rebolusyonaryo nga armado a tignay ken masa a labanan ti aso-aso ti estado ti dadakkel a kumprador ken dasig nga apo’t daga. Sistematiko nga isayangkat ti kampanya ti panagrekrut iti intar ti masa a mannalon, nagruna dagiti agtutubo nga agkameng iti New People’s Army.

d) Papigsaen ti rebolusyonaryo a tignay masa iti kaaw-awayan.

Rumbeng a papigsaen tayo ti rebolusyonaryo a tignay iti kaaw-awayan, risuten dagiti nabayagen a parikut ken ikagumaan a patignayen ti dumakdakkel a bilang ti masa. Nasken a patignayen dagiti pwersa tayo iti nasaknap ken naanus a panagpropaganda ken panag-organisa tapno milyon-milyon a danunen ti nalawa a masa. Iti amin a panawen, itandudo ti linya a masa ti panagtalek ken panagsanggir iti masa. Nasken a nairut a makikaykaysa ken patignayen dagiti abante nga elemento ti masa, ken agsanggir kadakuada iti panangipangato ti tukad dagiti makintengnga nga elemento, ken awiden dagiti atrasado nga elemento.

Kasapulan a kangrunaan a padur-asen ti napigsa, militante ken nalapad a tignay unyon ken tignay welga iti intar dagiti mangmangged, tapno makidangadang para iti nainkalintegan a sweldo iti sango ti agkakangato a gastos iti panagbiag, ilaban ti panagpasayaat ti kasasaad da iti trabaho laban iti dumangdangkes a langa ti panaggundaway ken labanan ti pasista a represyon. Kagiddan daytoy, nasken nga itakder ti hukbo ti siririing-iti-dasig a mangmangged babaen ti panangingato ti kamulatan da iti pulitika ken rebolusyon, isilpo ti pang-ekonomiya a dangadang ken panag-unyon da iti nailian ken demokratiko a kadawatan ti umili a Pilipino, ken iti kabuklan a rebolusyonaryo a dangadang.

Rumbeng met a papigsaen ti rebolusyonaryo a tignay masa iti intar ti malaproletaryado ken aduan a patignayen isuda batay kadagiti nalatak nga isyu da.

Rumbeng a papigsaen ti nailian-demokratiko a tignay iti intar dagiti estudyante tapno aduan a patignayen ida a militante nga ilaban ti karbengan ken pagsayaatan da, iyabante ti nailian-demokratiko a propaganda iti intar da, ken isilpo iti dangadang da ti nalawa a masa a mangmangged ken mannalon.

Papigsaen ken lalo pay a paregtaen ti tignay masa ti nadumaduma a demokratiko a sektor.

Kasapulan a papigsaen tayo ti limed a rebolusyonaryo a tignay. Ingato ti kabaelan, disiplina ken determinasyon dagiti kadre ken Partido ken rebolusyonaryo nga organisador a sanguen dagiti sakripisyo tapno siguraduen ti kinatalged da ken ti kolektibo da ken ti organisado a masa laban iti surbeylans ken pasista a ti kabusor, babaen ti panangputed kadagiti fixed points da ken atiddog a linya ti surbeylans. Kasapulan nga ingato ti kamulatan da iti panagipatungpal kadagiti annuruten ken pamuspusan ti tignay a limed. Rumbeng nga ingato ti kamulatan da kadagiti patakaran ken pamuspusan iti siaammo a panagaramat iti moderno a ramit iti komunikasyon, a kanayon a mulat iti bulnerabilidad dagitoy.

Isayangkat ti nalawa a propaganda tapno suportaran ti rebolusyonaryo nga armado a dangadang bilang kangrunaan a langa ti pannakidangadang tapno iyabante ti demokratiko a rebolusyon ti umili. Urnongen ti amin a posible a suporta a material ken pinansya para kadagiti Nalabbaga a mannakigubat ti NPA. Iyaramid dagiti kampanya iti panagrekrut iti NPA nangruna iti intar dagiti mangmangged, agtutubo ken intelektwal.

e) Itakder ti kalapadan nga antipasista, anti-imperyalista ken antipyudal a nagkaykaysa a prente laban iti rehimen US-Marcos.

Rumbeng a patuloy tayo a papigsaen ken palawaen ti National Democratic Front of the Philippines ken amin nga alyado nga organisasyon daytoy iti sidong ti panangidaulo ti Partido. Urnongen ti kalalapadan a pangpulitika ken materyal a suporta ti umili para iti rebolusyonaryo nga armado a dangadang.

Rumbeng nga itakder tayo ti kalawaan a nagkaykaysa a prente tapno isina ken labanan ti rehimen US-Marcos. Nasken a patuloy tayo nga ibunannag ti automated a panagkusit iti eleksyon 2022 ken ti bogus a “landslide victory” ti gunglo a Marcos-Duterte. Rumbeng nga alaen ti suporta ti nalawa a pwersa a kontra-Marcos-Duterte a limmaban kada Marcos idi eleksyon 2022 ken ti minilyon a nagrali idi iti kalsada.

Nasken nga agitakder tayo ti naduma-duma a langa ken tukad ti pangmabayagan wenno pangmabiitan nga alyansa laban iti charter change, Maharlika Investment Fund, dagiti makapilay a neoliberal a patakaran iti ekonomiya, dagiti pasilidad militar ti US, ken dadduma pay a kangrunaan nga isyu a nakasilpo iti nailian ken demokratiko a tarigagay ti umili a Pilipino.

Ituloy a papigsaen ti silpo iti umili a Moro ken kadagiti rebolusyonaryo a pwersa da tapno iyabante ti dangadang da para iti pudno nga awtonomiya ken nailian a bukod-a-panangngeddeng.

Kasapulan a gundawayan ti susik iti intar ti agar-ari a gunglo a Marcos ken Duterte, babaen ti panagiduron a pagsungbaten ken dusaen ni Duterte ken dagiti kakumplot na kadagiti krimen idi adda da pay iti poder. Kasapulan nga isagana tayo a patignayen ti umili laban iti posibilidad nga agbalin a nadara ti risiris ti Marcos-Duterte iti langa ti kudeta wenno linteg militar.

Papigsaen ti panangibagi ti NDFP iti demokratiko a gubyerno ti umili iti saritaan iti kappia umannurot kadagiti prinsipyo ti nainkalintegan ken mataginayon a kappia. Ibunannag ken labanan ti plano ti rehimen US-Marcos nga ipataw ti balangkas ti panagpasuko iti saritaan iti kappia. Iduron ti panangbigbig iti amin nga immuna a katulagan kabilang ti The Hague Joint Declaration, ti Joint Agreement on Safety and Immunity Guarantees (JASIG) ken ti Comprehensive Agreement on Respect for Human Rights and International Humanitarian Law (CARHRIHL).

f) Papigsaen ti internasyunal a rebolusyonaryo a trabaho tayo.

Kasapulan a patuloy nga isilpo ti rebolusyon a Pilipino iti sangalubongan nga anti-imperyalista a tignay ken iti proletaryo a rebolusyon iti intero a lubong.

Rumbeng nga ingato tayo ti tukad ti kampanya tapno awiden ti suporta nga internasyunal para iti rebolusyonaryo a tignay iti Pilipinas, bayat nga agit-ited ti amin a langa ti suporta kadagiti naindasigan a dangadang dagiti mangmangged, ken demokratiko ken anti-imperyalista a dangadang iti nadumaduma a paset ti lubong.

Kasapulan nga iyaramid ti naregta a tignay propaganda ken panag-organisa tapno danunen, riingen, organisaen ken patignayen dagiti mangmangged a Pilipino iti sabali a pagilan ken dagiti kailian iti nadumaduma a pagilian ken rehiyon iti lubong, ken isilpo ti dangadang da para iti karbengan ken pagsayaatan da laban iti kontra-umili a rehimen US-Marcos ken iti patakaran daytoy a “labor export.” Allukoyen dagiti kailian tayo nga aktibo nga iyabante ti tignay propaganda tapno ibunannag ti kontra-umili, aso-aso ken pasista a rehimen Marcos. Ingato ti rebolusyonaryo a kamulatan dagiti migrante a Pilipino ken allukoyen isuda a makipaset iti rebolusyonaryo a dangadang iti Pilipinas.

Nasken a patuloy a papigsaen ti relasyon a nainkabsatan kadagiti partido ken organisasyon a Marxista-Leninista-Maoista, papigsaen ti komunista a dayalogo ken binnadang. Iyaramid ti aktibo a pannakirisiris iti ideolohiya tapno ibunannag ken ilaksid ti moderno a rebisyunismo, Trotskyismo, Gonzaloismo ken dadduma pay a rebisyunista nga ayus a mangkilkillu iti Marxismo, Leninismo ken Maoismo.

Agkaykaysa ken labanan ti parigat ken pasista a rehimen US-Marcos!

Idauluan ti dangadang ti umili a Pilipino laban iti imperyalismo, pyudalismo ken burukrata kapitalismo!

Iyabante ti demokratiko a rebolusyon ti umili agingga ti naan-anay a balligi!

Agbiag ti Marxismo-Leninismo-Maoismo!

Agbiag ti patawid ni Ka Joma!

Agbiag ti proletaryo ken umili a Pilipino!

Agbiag ti New People’s Army!

Agbiag ti National Democratic Front of the Philippines!

Agbiag ti Communist Party of the Philippines!