Kangatwan a panagsaludo ti ipapaay ti National Democratic Front (NDF) – Ilocos, dagiti rebolusyonaryo a pwersa ken masa nga Ilokano, iti New People’s Army (NPA) iti maika-56 anibersaryo daytoy tatta nga aldaw. Idatdaton mi ti kangatwan a pammadayaw kadagiti martir ti NPA ti Ilocos ken intero a hukbo ti umili a nangibuwis ti biag da para iti wayawaya.

Raraemen mi dagiti natitibker ken maingel a Nalabbaga a kumander ken mannakigubat nga agtultuloy nga agpingpinget iti armado a dangadang. Inwaksi dagitoy a kakadwa ti personal nga interes da ken simmaranget iti karirigatan a sakripisyo iti panangiggem iti armas ken panagidaton iti biag, imbes a sumuko iti kabusor. Isuda dagiti pudno a banwar nga agserserbi a narimat a bitwen ti masa ken rebolusyonaryo a pwersa tapno agregget iti panangiyabante iti gubat ti umili.

Pagpadayawan ti NDF-Ilocos dagiti pioneer ti NPA-Ilocos a nagipundar kadagiti larangan gerilya ti rehiyon. Babaen ti saan a mabaloran a sakripisyo ken panagpasnek da, iti tengnga ti nasipnget a panawen ti tiranya ti diktadura a US-Marcos ket naaramid da nga itakder dagiti rebolusyonaryo base para iti gubat ti umili iti rehiyon.

Ti NPA iti Ilocos ket nangrugi iti maysa a platun, nga inbunga ti anti-pyudal a dangadang ti mannalon. Iti panagtuloy ti agraryo a rebolusyon ken dangadang ti masa iti unos ti lima a dekada, tuloy-tuloy a limmawa ken pimmigsa ti NPA ken rebolusyonaryo a base iti Ilocos. Nangibingay daytoy ti panagpigsa ken panaglawa ti armado a dangadang iti intero a pagilyan.

Mano a tawenen nga ipaspasaw ti AFP ken NTF-ELCAC a narebbeken ti NPA ken naburan dagiti larangan gerilya ti Ilocos, iti paulit-ulit a panagideklara iti rehiyon kas “conflict-manageable and ready for development.” Daytoy ket kalpasan ti tuloy-tuloy ken nainget a militarisasyon kadagiti komunidad, pananglipit kadagiti timpuyog ti umili ken dagiti lider da, aduan ken pwersaan a panagpasuko kadagiti sibilyan, red-tagging ken nadumaduma a kinaranggas ken panaglabsing iti karbengan-tao iti panggep a papakleben ti tignay masa ken rebolusyonaryo a dangadang da.

Tapno salakniban ti masa, tuloy-tuloy ken natured a nakiranget ti NPA-Ilocos kadagiti nairteng ken awan-sarday nga operasyon kombat ti AFP-PNP. Nagisayangkat da kadagiti naballigi nga ambus, reyd ken harassment kadagiti militar, pulis ken CAFGU. Aktibo a nagipatungpal da kadagiti aksyon-pannusa kadagiti intelligence asset ti kabusor, kadagiti dakes nga elemento ken despotiko nga apo’t daga. Gapu ditoy ket ad-adda pay a naani da ti talek ken suporta ti masa, ken ad-adda pay a nakapagpasampa ken nakapagpapigsa da.

Naggun-od da kadagiti balligi iti pannakirinnupak iti kabusor, kasta met kadagiti nadadagsen a kaswalti iti intar da. Ngem gapu ta adda kadakuada ti kapanunotan ti pudno a soldados ti umili, laglagumen da dagiti taktikal a pannakapaay ken umad-adaw da kadagiti adal manipud ditoy. Dagitoy nga adal ti mangipangpangato iti pangngeddeng dagiti Nalabbaga a mannakigubat ti Ilocos nga iyabante ti armado a rebolusyon.

Loklokuen ti AFP ti bagbagi daytoy iti panangiwarwaragawag a narebbeken dagiti base a masa ti hukbo iti Ilocos ken kagurgura ti masa ti NPA. Kadagiti erya a temporaryo nga pinanawan ti hukbo ti umili ket agtultuloy ken nagagar nga agpadpadaan ti masa iti panagsubli da. Agtultuloy nga agtigtignay da para iti suporta iti Hukbo ken armado a dangadang. Agtultuloy da nga agor-organisa ken agisaysayangkat ti dangadang ti masa uray tuloy-tuloy a liplipiten isuda ti kabusor.

Para iti masa nga ilokano, naturtured da a lumaban nu adda iti sibay da ti soldados da a bumadbadang ken mangsalsalaknib kadakuada. Isu nga uray liplipiten isuda ti kabusor ket agar-aramid da ti pamuspusan tapno makasilpo kadagiti kakadwa nga NPA tapno iyuman dagiti parikut da, makiinnadal ken agidanon ti suporta. Sadinno man ti papanan da, uray kadagiti erya nga ekspansyon ket saan a mabuteng wenno agalangan ti masa a mangpasangbay kadakuada, nu di ket maragsakan da a naisar-ong ti NPA iti lugar da. Kadagiti erya a rekoberi ket maragsakan la unay ti masa iti panagsubli da, ken kadagiti lugar a saan pay a nadandanon ti hukbo ti umili ket sapsapulen isuda ti masa.

Kaanoman ken sadinnoman ket saan a nagsarday ti NPA ti Ilocos iti panangriing, panang-organisa ken panangpatignay iti masa. Saan daytoy nga ib-ibbatan ti rebbengen na iti panangbayabay iti masa iti panangresolba kadagiti nadumaduma a parikut da, manipud kadagiti kangrunaan a parikut a pyudal ken malapyudal a panaggundaway dagiti apo’t daga, komersyante-usurero ken dadakkel a burges-kumprador agingga kadagiti domestiko a parikut. Iti naanep a panangbayabay ti hukbo ti umili, dagiti mannalon ti Ilocos ket naggun-od kadagiti balligi iti dangadang kontra usura, panangibaba iti abang ti daga, panangipangato ti tangdan dagiti mangmangged-talon ken dadduma pay a balligi ti dangadang ti mannalon. Isu nga anyaman a kampanya ti iruswat ti kabusor tapno isina ti masa iti hukbo da ket mapapaay dagitoy, nu di ket ad-adda pay nga umir-irot ti panagarakup ti masa ditoy.

Palalo a kapungpungtot ti umili a Pilipino, karaman ti umili nga Ilokano ti rehimen US-Marcos nga awan nagdumaan na iti tiraniko ken kontra-umili a rehimen Duterte. Winayaan ni Ferdinand Marcos Jr. ti dalan iti pannakaaresto ken panangibalud ti International Criminal Court ken Rodrigo Duterte (tapno sungbatan dagiti kaso daytoy iti krimen laban iti sangkataw-an), idinto nga isuna ket naisaklang met iti International People’s Tribunal iti kapada a krimen. Gapu daytoy iti panangituloy na iti naranggas a pasista a kampanya ni Duterte iti panangrebbek iti demokratiko ken rebolusyonaryo a dangadang ti umili nga agresresulta iti nasaknap ken kumarkaro a militarisasyon ken dumakdakkel a bilang dagiti kaso iti panaglabsing iti karbengan-tao.

Kas ken Duterte, ni Marcos ket naanep a mangipatpatungpal kadagiti neoliberal a patakaran a makaigapu iti ad-adda a pannakadadael ti produksyon iti agrikultura ken panagbagsak ti sapul ti mannalon, panagkamkam kadagiti daga ken ansestral a teritoryo dagiti mannalon ken katutubo ken panang-agaw ti pagbiagan dagiti mangngalap para kadagiti gangannaet a kapitalista a kumpanya ti renewable energy, minas ken dagiti plantasyon, agtaltalinaed a bagsak a sweldo ti mangmangged, saan nga agsarday a panangtayok ti presyo ti langis, dagiti gagatangen ken serbisyo. Kas ken Duterte, ni Marcos Jr. ket napeklan nga aso-aso ti imperyalista a US a mangpapaaramat iti Pilipinas kas base-militar daytoy iti panangparparnuay ti imperyalista a gera ken panagari daytoy iti Asya. Nainget a kunkundenaren ti masa nga Ilokano ti panagpaaramat ni Marcos iti Ilocos kas base-militar ken tuloy-tuloy a pakaisaysayangkatan dagiti napeggad a war exercises ti US.

Makikaykaysa ti umili nga Ilokano iti pukkaw ti umili a Pilipino a Marcos ken Duterte awan nagdumaan na a parigat, pasista ken aso-aso ti imperyalista. Ti pannakabalud tatta ni Duterte ket dakkel a balligi ti umili a Pilipino iti panaglaban iti tiranya ken panangitandudo ti karbengan-tao a kasapulan nga iduron agingga a madusa daytoy. Kagiddan na ket kasapulan met nga iduron ti kapada a pannakaisaklang ni Marcos Jr. agingga a madusa met iti kapada a krimen iti nasaknap a panaglabsing iti karbengan-tao.

Kas pudno a soldados ti umili, ti NPA ket kampeon iti panangsalaknib iti karbengan-tao ti umili a Pilipino. Iti nairut a pannarabay ti Partido, ti NPA ket istrikto nga agtungtungpal ken agit-ited ti nangato a panangipateg iti karbengan-tao ken ti internasyunal a makatao a linteg iti panangiruswat ti gubat ti umili. Iti sango ti umir-irteng a kinarungsot ken panagparigat ti rehimen US-Marcos iti umili a Pilipino ket nairut nga agsangsanggir da iti NPA kas pinaka-mapangnamnamaan a salaknib da. Iti kasta ket kasapulan a pairtengen daytoy ti armado a dangadang ken pagbayaden ti rehimen iti dumakdakkel a krimen na iti umili a Pilipino.

Iti panangbigbig iti NPA kas armas ken kalasag da iti pananglaban iti pasismo, panaggundaway ken panangidadanes, rebbengen ti umili a padakkelen ken papigsaen daytoy. Rumbeng laeng nga iturong ti kangrunaan a rebolusyonaryo a panagregget iti panagpasampa ken panangited ti amin a langa ti suporta iti hukbo ti umili ken armado a dangadang – base, armas, bala, lohistika, paniktik, dagiti serbisyo ken dadduma pay.

Iti maika -56 anibersaryo daytoy, kangrunaan a panawagan ti NDF-Ilocos iti masa nga Ilokano ken rebolusyonaryo a pwersa, nangruna dagiti kabataan – nga agkameng iti NPA! Agpinget iti panag-organisa iti Kabataang Makabayan iti intar ti kabataan a mannalon, mangngalap, mangmangged, dagiti estudyante ken peti-burges para iti panagpasampa. Ibangon, palawaen ken papigsaen dagiti Milisyang Bayan. Papigsaen dagiti rebolusyonaryo a base, kanayon nga agsagana dagiti rebolusyonaryo a pwersa ken masa iti panagsubli ti Hukbo kadagiti erya a temporaryo a napanawan da ken usatan dagiti baro nga erya a pagpalawaan daytoy. Kagiddan daytoy ket iyabante ti dangadang ti masa a laban iti pasismo ken amin a langa ti panagparigat ken pananggun-od kadagiti demokratiko a karbengan ken pagimbagan.

Pairtengen ti panaglaban iti rehimen US-Marcos, ingge’t kabaelan a papigsaen ken paadwen ti NPA! Pairtengen ti gubat ti umili tapno iyabante ti nailyan-demokratiko a rebolusyon agingga’t balligi!

Agbiag ti New People’s Army!
Agbiag ti rebolusyon a Pilipino!