Konkondenaren ti Agustin Begnalen Command NPA-Abra ti pananglipit (harassment) dagiti ahente nga intel ti 24th IB iti sibilyan a ni Jerome Agaid, kadwa na ti inaudi nga anak na nga agtawen ti lima. Ni Agaid ket taga-Malibcong Abra, maysa a lupong tagapamayapa ken kameng ti tribu a Mabaca.

Sakbay na daytoy, manon a daras a sipsiputan ken pwersaran a paspasurenderen ti militar ni Agaid. Panggep ti AFP a gundawayan ti narigat a kasasaad ni Agaid nga adda iti ospital ti asawa na. Ibagbaga da nga isuda ti agbayad iti gastos iti panagpaagas ti asawa na kasukat ti panagtraydor iti tribu na.

Daytoy a pasamak ti kabaroan a krimen ti 24th IB, 71st IB ken 102nd IB. Idi Nobyembre 27, 2022, pinaltogan dagiti soldados ti 5 a sibilyan a mapan aganup iti Brgy. Buneg,Lacub. Dua kadagitoy a sibilyan ti naospital gapu iti nasagrap da a sugat. Nayon pay ditoy ti makapainsulto a panagasideg ti Army iti pamilya dagiti sugatan tapno ited ti pinansya a tulong. Kalpasan na a naiyawat ti kuarta ket pinagpirma da ti pamilya dagiti biktima ti pammaneknek a saan dan nga agdarum kontra iti AFP.

Umat-atiddog ti listaan ti krimen ti 24th ken 102nd IB ti Philippine Army kontra kadagiti Abrenio. Okupado ti militar dagiti ili ti Lacub, Malibcong, Tineg, Baay-Licuan, Daguioman, Bucloc, Boliney, Sallapadan, Luba, Tubo at Pilar. Mariribukan ti umili nu mapan da kadagiti talon da ken iti kabakiran. Agtultuloy ti panangpasurender, panangsipsipot ken pammutbuteng ti Army.

Dagiti pasista a tropa ti AFP ket nakapakat iti Abra tapno patayen ti amin a panaglaban ti umili kontra iti panagserrek ti dadakkel a panagminas ken proyekto a dam. Napudno nga agserserbi ti AFP kadagiti kapitalista nga amo da. Arig da ti alimatek nga agsussusop iti kinabaknang ti pagilyan kabayatan nga ti umili ket ad-adda a mailumlumlom iti panagbisin ken kinarigat.

Gibusan ti panagar-ari a militar! Papanawen ti 24th, 71st ken 102nd IB iti probinsya ti Abra.Pagbayaden isuda kadagiti krimen da. Gun-oden ti hustisya para iti Abrenio.