Yari ang pila ka yabe nga obserbasyon namon tuhoy sa bag-o lang natapos nga ginhiwat nga reaksyonaryong eleksyon:

1. Indi gid mapatihan ang resulta sang eleksyon midterm sa atubang sang nagalumapaw nga ebidensya sang lapnagon kag sistematiko nga pagpaniplang nga ginpatigayon mayor paagi sa automated ukon dekompyuter nga pagpangdaya, subongman baklanay sang boto, kalakasan, disimpormasyon, Red-tagging kag iban pa nga mga pamaagi. Halin ini mayor sa kapaslawan sang Commission on Elections (Comelec) nga segurohon ang transparency ukon ang pagkabukas sa pagbusisi sang automated nga sistema sang inisipay nga ginhanda sang Miru Systems Co, isa ka kumpaniya nga South Korean nga ang rekord sa iban nga pungsod may dagta sang mga kapalpakan kag suholay.

Gintumod sang mga ekspertong teknikal nga ang sistema nga ginbutang sa mga makina nga mag-isip wala maayo marebyu, kag wala nag-agi sa sertipikasyon sandig sa mga pagsulundan. Mas malala pa, kwestyunable nga ginpalagas sang Comelec ang “upgrade” ukon pagbag-o sa sistemang software nga ginbutang sa mga makina nga mag-isip (lain sa bersyon nga ginkilatis), rason nga lubos nga nadula ang pagsalig sang publiko, tungod seryoso sini nga ginkompromiso ang integridad sang sistema sang inisipay. Nagpabutyag sang kahangawa ang mga eksperto nga mahimo nagamit ini para magpasulod sang malisyoso nga code kag algorithm para manipulahon ang resulta sang inisipay sang boto.

Tuman ka damo ang na-report sa midya nga reklamo sang mga botante nga ang mga resibo nga ginpaguwa sang mga makina sa pag-isip sang Miru wala nagasanto sa ila boto, sobra man ukon kulang. Ginsiling sang election watchdog ukon tigbantay sa eleksyon nga Parish Pastoral Council for Responsible Voting (PPCRV) nga nakabaton ini sang wala tupong ka damo nga mga reklamo sa una nga mga inoras sang piniliay, sobra pa sa nasaksihan nila sa pagbantay sa automated nga eleksyon sumugod sang gin-umpisahan ini sadtong 2010 sa Pilipinas. Bilang dugang, nag-report ang mga naga-obserbar sang baklanay sang boto (ilabina sa dagway sang pagpaguwa sang pondo pang-ayuda sang gobyerno) kag pre-shading sang mga balota.

Madamo man sang report sang mga anomaliya sa quick count sang mga dalagko nga midya kag mga nagabantay sa eleksyon. Sa isa ka bahin, nag-report ang PPCRV sang “indi kinaandan nga pagka-atrasar.” Sa pihak nga bahin, may yara mga “nadoble” sa paglista sang mga resulta sang eleksyon, kon diin ginsiling 15,000 ka election return nga katumbas sang lima ka milyon nga boto ang nareport sang midya nga “duha ka beses nga gin-isip” sa una nga mga oras sang “quick count,” kag pagkatapos “gintadlong” nga wala sang pagpaathag kag husto nga auditing kag proseso. Suno sa Comelec, makasaysayan ang 81.37% nga voter turnout ukon bilog nga nakaboto. Apang, siling sang National Movement for Free Elections may yara 18 milyon ka boto ang overcounted ukon nasobrahan sa pag-isip, sandig mismo ini sa datos halin sa counting machines.

Ang tanan nga mga anomaliya nga ini ginpahigad lang sang Comelec bilang “glitch” ukon ginagmay nga aberya, nga ginabatikos sang mga naga-obserbar bilang pagpagamay sang kalubhaon sang mga anomaliya nga ini. Ginlaragway sang International Observer Mission nga malubha ang nangin disenfranchisement ukon pagdula sang kapuslanan sang boto sang mga tawo.

Ang lapnagon nga mga anomaliya sa kondukta sang sini lang nga eleksyon nagtandog sa lain-lain nga grupo pangpulitika kag mga tagbantay sa eleksyon nga manawagan sang manwal nga liwat pag-isip sang boto. Ginpabaskog man sini ang madugay na nga panawagan para tapuson na ang automated nga inisipay kag magbalik sa manwal nga isipay (kakumbina ang elektroniko nga transmisyon), sa duso nga segurohon nga husto nga maisip ang mga boto sa eleksyon.

2. Sa estratehikong katuyuan nga segurohon ang iya pangmalawigon nga interes sa ekonomiya kag heyopulitika, nagtungod sang yabe nga papel ang imperyalistang US sa bag-o lang natapos nga eleksyon sa Pilipinas. Gingamit sini ang direkta kag indi direkta nga impluwensya sa lain-lain nga reaksyonaryo nga hubon, ang lubos nga kontrol sini sa militar kag establisimento sa depensa kag ang iya bug-os nga arsenal sa pagpasilabot (pangpulitika, diplomatiko kag teknikal). Ang mga kasugtanan kag akomodasyon ginhimo sa pinakataas nga lebel paagi sa imperyalistang US gamit ang pila ka mga ahente, nga hayagan nga nagpakita sang aregluhanay sa reaksyonaryong pulitika nga madugay na nga tatak sang sistema pangpulitika sa Pilipinas.

Tungod nakita ang maathag nga balor sang Pilipinas sa “Indo-Pacific Strategy” sini batuk sa China, katuyuan sa pagpasilabot sang imperyalismong US nga segurohon ang kalig-on kag pahugton ang kontrol sini sa kliyente nga rehimen. Grabe ang ila kahangawa (a) sa nagasingki nga mapintas nga banggaan sa tunga sang hubon Marcos kag Duterte nga nagatulod sa pumuluyo nga pakig-awayan ang garuk nga nagahari nga sistema; (b) sa nagadalom nga biak sa sulod sang nagahari nga hubon, kag nagalala nga pagkaligwin sang papet nga rehimen Marcos sa atubang sang sosyo-ekonomiko nga pag-usmod; kag (c) sa signipikante nga kusog kag panghangkat sang kampong Duterte, nga ginagamit sang China agud pasanyugon ang pangpulitika nga impluwensiya sini.

Sa partikular, nagakabalaka ang imperyalistang US kon mapunggan bala sang nagahari nga hubon Marcos ang paglagas ni Sara Duterte nga mangin presidente, ilabina kon indi siya ma-impeach sang Senado. Gani, samtang padayon nga nagahatag sang suportang pang-militar kag pangpulitika sa nagahari nga hubon Marcos, gingamit sang imperyalismong US ang iya mga operatiba, power broker ukon mga tigpatunga (intermediaries) agud magsugtanay sang tungaay sa poder, tigpondo kag mga tigpatunga sa mga pangpulitika nga mga hubon sang mga nagahari nga sahi sa Pilipinas, agud impluwensiyahan kag manipulahon ang piniliay para mapatuhaw ang “ikatatlo nga pwersa” halin sa mga grupo nga naga-apin sa US nga subong nakahanay sa koalisyon sang Liberal-Akbayan-Pink (LAP), isa ka organisasyon sang lain-lain nga pwersa pangpulitika.

Luyag sang US nga magserbe ang grupo nga ini bilang “reserba nga kabayo” sa hubon Marcos, nga magahatag man sang kritikal nga suporta sa pagdako sang presensyang militar sang US sa Pilipinas, tayuyon sini nga mga war games, kag pagpasilabot sang US sa mga operasyon kontra-insurhensya sang AFP. Sa pangmalawigon, handum sang US nga kakasan sang impluwensya ang China sa mga hubon sang nagahari nga sahi, kag mabalik ang daan nga kaayusan nga tanan nga hubon pangpulitika abyan ukon may utang nga kabubut-on sa US, samtang gina-ipit ang mga pwersang kontra-imperyalista sang pungsodnon-demokratiko nga kahublagan.

Sobra ang “pagkakibot” sang mga kandidato nga ginsuportahan sang LAP nga sanday Bam Aquino kag Francis Pangilinan sa ila kalit nga pagsaka sa ikaduha kag ikalima nga pwesto ( halin sa guwa sang listahan sang mga ngalan nga ginasigahum nga magdaug sa lain-lain nga sarbey pila ka adlaw antes ang piniliay). Ang “mabaskog nga pagdaug” nga ini ginpaguwa subong nga bunga sang pagsuporta sang anay bise presidente nga si Leni Robredo, nga kabahin sa mga ginaandam para liwat nga magpadalagan batuk sa mga Duterte sa 2028. Dismayado ang madamo nga nakig-aregluhanay sa pulitika si Robredo sang gin-endorso niya ang bat-ulan nga maka-Duterte kag kandidato sang Iglesia ni Cristo (INC) nga si Rodante Marcoleta (pang -atake ni Duterte batuk sa ABS-CBN sadtong 2020) kabaylo sang suporta sang INC kay Aquino. Si Marcoleta “nakibot” man nga nagsaka siya sa ika-anum nga pwesto. Ginsuportahan man ni Robredo ang mga kandidato ni Marcos nga sila Manny Pacquiao kag Benhur Abalos, apang gin-report nga nagpamalibad siya nga hayagan nga suportahan ang iban nga mga kandidato sang Pink.

Ang pagsulod nanday Aquino kag Pangilinan nakabulig kay Marcos nga mabug-os ang anti-Duterte sa Senado. Apang, yara sa peligro nga indi niya makuha ang 2/3 nga kinahanglan agud maseguro nga ma-impeach si Vice President Sara Duterte. Luyag ni Marcos nga punggan ang pagdalagan ni Duterte sa 2028, nagakahangawa man siya nga maglupok ang pag-hearing sa impeachment sa isa ka lapnagon nga krisis sa pulitika, gani nagadistansya siya subong sa mismo proseso sini.

Kabahin man sa koalisyon sang LAP ang kilala nga abogado nga tagpangapin sang tawhanon nga kinamatarung nga si Chel Diokno kag ang anay senador nga si Leila de Lima, nga nakapwesto sa House of Representatives paagi sa sistemang party-list. Pareho sila nga malig-on magtindog batuk sa gyera kontra droga ni Duterte kag madugay na nga mga kaalyado sang mga organisasyon sang pumuluyo nga nagapangapin sang tawhanon nga kinamatarung.

Naghipos ang grupong LAP sa pihak sang kawad-on sang transparency sa bag-o lang natapos nga piniliay, kag daw ginbalewala na lang ang mga report sang anomaliya. Ang mga yabe nga tawo sa grupo sang LAP, kadam-an naghipos man pagkatapos sang lapnagon nga dayaay nga naghatag sa mga Marcos kag Duterte sang 32 ka milyon nga boto sadtong 2022, naghipos man subong sa atubang sang lapnagon nga anomaliya nga imbolbado ang Miru Systems. Ginpaathag nila ang “makakilibot”nga resulta ni Aquino kag Pangilinan nga siling nila tungod sa “boto sang Gen-Z” kag iban pa nga pag-teorya sa pulitika.

Ang krisis sang nagahari nga sistema pangpulitika padayon nga nagalala kadungan sang nagasingki nga awayan sa kubay sang mga reaksyonaryong hubon. Segurado nga magalala pa ini samtang nagahilapit ang piniliay para sa pagka-presidente sa 2028. Labi nga nagakaligwin ang rehimen Marcos sa pumuluyo tungod sa mga patakaran kag programang kontra-pumuluyo. Ang pangpulitika nga iskema sang US nga pabaskugon ang grupong LAP daw magapahuyang sa hubon Marcos, kabaliskaran sa plano sang pamilya Marcos nga palawigon ang ila paghari. Madumduman pa gihapon sang mga Marcos kon paano sila “ginluwas” sang gobyerno sang US kag ginlupad ang ila pamilya padulong sa Hawaii sadtong 1986. Tan-awon naton kon magpasugot bala ang mga Marcos sa mga plano subong sang US.

Nakatalana nga pabaskugon sang grupong LAP ang ila pagpakigbahin sa piniliay 2028. Mahimo nga makapili ang koalisyon sang isa ka kandidato apang kinahanglan pa gihapon nila nga mapangibabawan ang mga banggi-anay sa tunga sang ila nanari-sari nga pwersa.

Sa pihak sang impeachment kay Sara Duterte kag pagkabilanggo kay Rodrigo Duterte sa The Hague, padayon pa gihapon sila nga nagapabaskog sang impluwensiya sa pulitika, paagi sa ila kuneksyon sa militar, suporta sang mga lokal nga grupo sang nagahari nga sahi, kag indi direkta nga suporta sang China. Mahimo nila nga tiplangon ang publiko gamit ang mga bayaran nga social media influencer kag mga troll army. Apang, kinahanglan nila nga atubangon ang mga internal nga banggaan sa atubang sang pagdako sang impluwensya kag pagbaskog sang pila ka grupo sa ila kubay, kag sa mismo pamilya Duterte (ilabina sa yara sa una nga pwesto sa Senado nga si Bong Go, nga madugay na nga sidekick ni Duterte).

3. Sandig sa mga pasiuna nga resulta sang nagligad nga eleksyon midterm, labi nga nakuhaan sang boses ang mga party-list nga nagatiglawas sa sandigan nga sektor sang katilingban Pilipino, ilabina ang yara sa kubay sang pungsodnon-demokratikong kahublagan. Gindominahan subong ang sistemang party-list sang mga grupong ginpondohan kag kontrolado sang mga pulitiko kag dinastiya sang nagahari nga sahi.

Ang pagduso nga kakasan sang boses ang grupo sang mga progresibong party-list, nga ginlunsar kadungan sang masingki nga kontra-kampanya batuk sa Koalisyon Makabayan, sandig sa estratehikong handum sang US kag sang mga pasistang ahente sa seguridad kag depensa sa NTF-Elcac kag National Security Council nga sipaon ang mga patriyotiko kag demokratikong tiglawas sa parlyamento, nga nangin tunok sa tutunlan sang mga nagligad nga mga reaksyonaryong rehimen. Ini tungod padayon nila nga ginatib-ong ang mga isyu sang pumuluyo, ginabuyagyag ang korapsyon, kag ginabatikos ang mga paglapas sa tawhanon nga kinamatarung. Militante nila nga ginapakig-awayan ang pagyaob sang rehimen Marcos sa mga iskema sang US nga gamiton ang Pilipinas bilang lunsaran para sa ginhanda sini nga gyera kag pagpanggarit-garit sa karibal nga imperyalistang China, iskema nga ginapasugtan kag aktibo nga ginasuportahan sang Akbayan kag sang tagabandera sini nga si Risa Hontiveros.

Paagi sa lain-lain nga gaway kag programa pangpondo, ginatib-ong sang US ang mga “mabaton nga ‘Makawala'” (ginatawag kon kaisa nga “otorisado” ukon “ginpahanugutan nga makawala”) nga ginabug-os sang mga grupong repormistang burgis nga sayup nga ginalaragway nga mga “progresibo” ukon “sosyalista.” “Mabaton” ang mga grupo nga ini tungod wala nila ginahangkat ang makasahi nga paghari sang maka-US nga mga dalagko nga burgesya kumprador, mga burukrata kapitalista kag mga dalagko nga agalon mayduta, bisan ang aktibo nga pakigbato sa paghari sang US sa militar, pulitika, ekonomiya kag kultura. Katuyuan sang US nga kontrahon ang kusog kag impluwensya sang mga pungsodnon-demokratiko nga pwersa sa Pilipinas, nga wala-untat nga nagapanawagan para sa pungsodnon nga kahilwayan halin sa imperyalistang kontrol sang US, kag para sa pagbag-o sang mapiguson kag mahimuslanon nga makasahi nga istruktura sa pungsod.

Sa pila ka nag-agi nga eleksyon, ang mga progresibo nga grupong party-list nga ini, nga masami nagapanguna sa eleksyon sa party-list sadtong nagligad nga dekada 2000 kag 2010, nangin target sang maid-id nga kampanya sang pangpulitika nga pagpangsumpo sa porma sang ekstrahudisyal nga pagpatay, pag-abdak, pag-aresto, Red-tagging kag atake militar agud pwersahon nga maghalin ang mga myembro sang ila mga lokal nga tsapter. Ang suportado sang US nga kampanya nga ini sang estado batuk sa mga grupo sang progresibong party-list nag-igting sugod 2019 kag nagapadayon sa idalum sang rehimen US-Marcos nga may katuyuan nga lupugon ang mga grupo agud indi epektibo nga makalunsar sang pungsodnon nga kampanya pang-eleksyon. Nangin target sila sang pagpangdaya sa porma sang automated nga pagkaltas sang boto para amat-amat nga buhinan ang ila makuha nga pwesto sa parlyamento sa nagligad nga mga eleksyon. Sa tanan nga mga taktika nga gingamit sang AFP-NTF-Elcac batuk sa ila, ini ang pinaka-direkta nga bira sa katuyuan nga sipaon sila sa kongreso.

Ang mga atake batuk sa Makabayan maathag nga ginplano sang US, sang rehimen Marcos kag sang NTF-Elcac sini santo sa bag-o lang ginpaguwa nga Memorandum Order No. 83 ukon ginatawag nga National Action Plan for Unity, Peace and Development. Nabatyagan bisan sang Comelec ang pagpang-ipit sang NTF-Elcac sang wala ini sang may ginhimo bisan nga gindeklarar sini nga isa ka “paglapas sa eleksyon” ang Red-tagging. Ang pagtinguha nga kakasan sang boses ang mga organisasyon masa ginalunsar sa tabon sang pagdugmok sa “insurhensya nga nagapanago sa eleksyon,” nga sa pagkamatuod may kabaliskaran nga epekto nga matulod ang mas madamo pa nga tawo nga magpakigbahin sa armadong rebolusyon.

Dalayawon ang mga grupong party-list nga ini, kaupod ang mga progresibo kag patriyotiko nga kandidato sa pagka-senador sa idalum sang Koalisyon Makabayan, nga nahimo pa nila nga makalunsar sang mabaskog nga kampanya sa eleksyon, sa pihak sang hayagan nga duso ni Marcos kag sang NTF-Elcac nga sumpuon ang ila pagtinguha. Ginpaslaw sang mga kandidato kag tigkampanya ang mga pamahog sang mga pasistang ahente ni Marcos kag ila iskema sang pagpanumpo, samtang nagalunsar sila sang pungsodnon nga kampanyang masa para angutan kag pabaskugon ang ila kubay sa malapad nga masa.

Ang mga grupo nga ini, lakip ang mga unyon, organisasyon sang mga estudyante, mga asosasyon sang mga mangunguma kag imol nga taga-syudad, kag iban pa, naga-atubang sang dalagko nga pangpulitika nga hangkat nga pila ka sulit nga magpalapad kag magpabaskog sang ila organisadong kubay agud mapasaka ang ila ikasarang nga pakig-awayan ang pagpasilabot sang US sa pulitika kag militar kag ipakigbato ang mga hinanali nga mga demanda sang pumuluyo. Dapat nila nga bugkuson, konsolidasyon kag palaparon ang ila solido nga organisadong kusog. Ang solidong organisadong kusog nga ini ang sandigan nga rekisito para epektibo nila nga masulong ang kontra-pasista, kontra-pyudal kag kontra-imperyalista nga mga paghimakas batuk sa rehimen US-Marcos.

Dapat nila nga pamatukan kag iligwin ang rehimen US-Marcos paagi sa pagpabaskog sang paghimakas masa para sa mas mataas nga sweldo, trabaho kag mas manubo nga presyo sang mga balaklon, kag ila pakig-away sa pangpulitika nga pagpanumpo kag pagpang-agaw sa ila palangabuhian. Kinahanglanon nila nga magtukod sang isa ka malapad nga nagahiliugyon nga prente kag magpauswag sang mabaskog nga kahublagan batuk sa nagasingki nga interbensyon militar sang US sa Pilipinas nga nagabutang sa pungsod sa peligro paagi sa pag-ganoy sini sang US sa ginasulsolan nga armadong kagamo sa China.

Sa maabot nga binulan, dapat pahulagon sang demokratikong kahublagan masa ang malapad nga pumuluyo kag hugpongon ang tanan nga mga positibong pwersa, lakip ang mga bag-o napili sa kongreso, agud isulong ang panawagan sang pumuluyo nga mapamatbatan si Vice President Sara Duterte sa Senado para sa korapsyon kag iban pa nga kasal-anan, kag si Rodrigo Duterte sa International Criminal Court para sa krimen batuk sa katawhan. Dapat padayon nga patingkaron liwat ang mga pasistang krimen,korapsyon, kag pagpamigos sang rehimen Duterte para pakigbatuan ang mga kabutigan kag pagpaniplang nga ginahungit nila sa pumuluyong Pilipino.

4. Labi nga ginbuyagyag sang nagligad nga eleksyon ang pagka-garuk sa kaidadalman sang reaksyonaryong sistema sa pulitika, nga subong ginaharian sang pasista kag korap nga dinastiyang pulitikal sang mga Marcos kag Duterte kag ila mga tigsunod, nga gina-undan sang automated nga dayaay, pangpulitika nga aregluhanay kag sistematiko nga pagpang-atake para kakasan sang boses ang malapad nga masa sang pumuluyo. Sa resulta sang eleksyon 2025, nga ginadominahan sang daan kag bag-o nga tiglawas sang nagahari nga sahi, segurado nga padayon nga mag-antus sang mas grabe nga pagpamigos ang pumuluyong Pilipino sa idalum sang mga patakaran kag programa sang rehimen Marcos.

Ginpamatud-an sang resulta sang eleksyon 2025 ang kakinahanglanon nga maghimakas para sa matuod nga pungsodnon nga kahilwayan kag demokrasya sang pungsod, kon diin prayoridad ang interes sang malapad nga masa sang mamumugon, mangunguma, sang anakbalhas kag iban pa nga demokratiko kag patriyotikong sektor kag sahi. Liwat sini nga ginpalig-on ang kakinahanglanon sa paglunsar sang rebolusyonaryong armadong paghimakas paagi sa pangmalawigon nga inaway banwa.

Kada eleksyon, nagabuhi ang mga reaksyonaryong partido kag pulitiko sang wala-unod nga mga pangako sang “pagbag-o,” sa mapang-insulto nga pagpangaluyag sa malapad nga masa sang mga Pilipino nga madugay na nga nagahandum sang pagbag-o. Mas nga nagabaskog ang panawagan sang mga pumuluyo para sa matuod nga pagbag-o samtang sila naga-antus tungod sa naga-grabe nga kahimtangan sosyo-ekonomiko. Samtang mas nagakabuyagyag ang garuk kag korap nga sistema, mas nangin maathag sa mga Pilipino nga ang pagbag-o wala nagahalin sa mga reaksyonaryong pulitiko kag mga burukrata kapitalista nga nagapangako sini. Samtang ginahangkat nila ang dominasyon sa eleksyon sang mga nagapamigos sa pumuluyo, dapat nila ituon ang ila panulok sa banas sang paghimakas lapaw sa eleksyon.

Ang pagbag-o maagum lang sang pumuluyo nga kolektibo nga nagahimakas kag nagalunsar sang pakig-away sa mga nagapamatuk sa pagbag-o. Sa mga rebolusyonaryong erya, nagatuhaw ang pagbag-o samtang ginahiusa sang pigos nga pumuluyo ang ila kubay kag gina-armasan ang ila kaugalingon agud bag-uhon ang balanse sang gahum kag ang mahimuslanon nga relasyon sang mga sahi.

Paagi sa paglunsar sang inaway banwa, ginatanum ang mga binhi sang demokratikong gobyerno sang pumuluyo sa kaumhan. Nagapanikasog ang mga rebolusyonaryong pwersa sa pagtukod sang mga organo sang gahum pangpulitika, ukon mga sandigan nga yunit sang demokratikong gobyerno sang pumuluyo, nga nagatindog bilang pundasyon sang kusog sang organisadong pumuluyo kag armadong pwersa. Taliw-as ini sa reaksyonaryong gobyerno nga ang bug-at ginapalukdo sa pumuluyo. Ang Partido kag ang Bagong Hukbong Bayan, subongman ang mga rebolusyonaryong organisasyon masa sang National Democratic Front sa mga syudad kag sonang gerilya padayon nga nagapabaskog kag nagapalapad.

Sa sining espirito, nagapanawagan kami sa pumuluyong Pilipino nga magpatapo kag suportahan ang Bagong Hukbong Bayan sa bisan diin man nga yunit sini sa bug-os nga pungsod. Nagapanawagan kami sa tanan nga may mapagros sang lawas kag panghuna-huna, ilabina sa mga pamatan-on, nga magserbe bilang Pulang hangaway sang BHB. Paagi lang sa pag-abaga sang mga kabudlayan kag kinahanglanon nga mga sakripisyo sa paglunsar sang inaway banwa mabag-o sang pumuluyo ang dalagan sang kasaysayan sang Pilipinas agud lab-uton ang ila handum para sa pungsodnon kag sosyal nga kahilwayan.