Nitong Enero 27, dinumog ng militar at inokupa ang mga barangay ng Baang, Sawmill, Barag at Mapuyo sa kagustuhang mapasurender ang isang sibilyan na kinilalang si Sony Diamos.

Matagal nang pilit pinasusuko ng militar si Sony subalit mariin itong naninindigan na walang dahilan para siya ay sumuko. Hindi naman siya kriminal upang tugisin ng mga militar. Sa halip, ang mga militar ang dapat parusahan dahil sa dami ng krimen nito sa mamamayan.

Si Sony ay nagpakanlong sa Bagong Hukbong Bayan (BHB) noong kasagsagan sa Retooled Community Support Program (RCSP) na sapilitang nagpapasurender sa mga sibilyan. Dahil dito, labis na ikinagalit ng militar ang ginawa ni Sony. Tinugis siya ng mga pasista hanggang sa napaghinalaan ang kanyang kapatid na si Danny Diamos na siya, na pinaslang ng militar noong 2021 sa Sityo Imbudo, Barangay Jamorawon, Milagros.

Marami ang tulad ni Sony na nagpakanlong sa Hukbo sa panahon ng pananalasa ng RCSP. Batid nila na hindi ang pagsurender sa militar ang magbibigay katiyakan sa kanilang kaligtasan. Marami sa mga surenderi ang naging biktima ng mga pakanang engkwentro ng mga pasistang sundalo. Pinalalabas ng mga ito na kasapi ng NPA ang biktima. Ginagamit na ebidensya ng militar ang pagsuko ng biktima sa kabila na ito ay lehitimong sibilyan at walang anumang kaugnayan sa NPA o rebolusyonaryong kilusan.

Higit pang lumubha ang pananalasa ng operasyon ng militar sa mga barangay sa bayan ng Mobo, Uson at Milagros dahil nakatakdang magmina rito ang Filminera-Masbate Gold Project sa mga kabundukan sa naturang mga bayan. Bunsod nito, linggo-linggong nagwawasiwas ng kanilang karahasan at pasismo ang mga militar na naatasan upang itaboy sa kanilang kabuhayan at pahupain ang paglaban ng masa.

Nagmamadali na ang militar na matapos ang kanilang misyon sapagkat magtatapos na ngayong taon ang 25-taong kontrata ng Filminera sa pagmina sa bayan ng Aroroy. Tulad ng pagwasak sa Aroroy, nakaambang wasakin ng mapanirang dayuhang kumpanya sa mina ang nalalabing kagubatan at bundok sa mga bayan ng Mobo, Uson at Milagros na pangunahing pinagmumulan sa kabuhayan ng mga residente sa lugar.

Sa panghahalihaw ng militar, inoobliga nitong palayasin sa kanilang mga lupang sakahan ang mga magsasaka. Binabantaan ang mga hindi sumusunod sa kanilang kagustuhan. Masahol, ang mga lumalaban upang pangalagaan ang kanilang buhay at kabuhayan ay pinapatay ng mga militar.

Ang panggigipit na ito ng militar upang agawan ng kabuhayan at wakasan ang kanilang buhay ang nagtulak sa masang Masbatenyo laluna sa mga magsasaka na piliin ang landas ng armadong paglaban. Napagtanto ng masang Masbatenyo na hindi sa pagsuko sa militar at reaksyunaryong gubyerno makakamit ang tunay na kaligtasan at kapayapaan. Kundi tanging sa paghawak ng armas at sa pagsusulong ng demokratikong rebolusyon at pagtatagumpay lamang nito.