Kangatuan a pammadayaw ti idandanon ti Pambansang Katipunan ng Magbubukid (PKM)-Ilocos Region iti National Democratic Front of the Philippines (NDFP) iti panagrambak na iti maika 51 a tawen ti pannakaibuangay na. Kangatuan met a panagsaludo ti idatdaton mi iti amin a martir ti NDFP a nangipaay ti pigsa, laing ken biag para iti panag-abante ti demokratiko a rebolusyon ti umili.

Ti panagsuwek ken pannakabulok ti sistema nga imperyalismo ket kagiddan ti istorikal a panangparigat, panaggundaway ken panangranggas iti umili ti sangalubongan. Isu a ti agdama a krisis iti pulitika ken ekonomiya ti Pilipinas ket mangrukruk-at iti dalan iti nakasaysayaat a kundisyon iti panagabante ti demokratiko ken proletaryo a rebolusyon.

Iti rehiyon Ilocos, gasut a tawenen a magungundawayan dagiti mannalon iti kapitalista a duron ti panagmula ti tabako. Manipud idi agingga ita, ti tabako ket mailuluwas para iti sangalubongan a merkado ken awan ti maipapaay daytoy a panagdur-as iti biag ken pagbiagan ti masa a mannalon, nu di ket pagganganansyaan laeng dagiti monopolyo kapitalista, dadakkel a burges kumprador ken apo’t daga.

Malaksid iti tabako, ti panagmula ti pagay, mais ken nateng iti rehiyon ket naipasidong iti malapyudal a panaggundaway. Ti akikid a kadagaan a nasinasina ket monopolyo a sanikua dagiti dadakkel a pamilya ti apo’t daga a nakatugaw met laeng iti reaksyunaryo a gubyerno. Nasaknap ti usura a pagtaytayyekan laeng ti biag iti produksyon dagiti pesante. Iti kaanoman ket saan a malmalpas wenno maib-ibus ti utang ti masa nga anakling-et gapu iti kinangato ti interes, kinangina dagiti magatgatang ken nababa a presyo ti produkto da.

Dagiti tulong ken suporta manipud iti reaksyunaryo a gubyerno ket palalo nga agkurkurang ken iti adu a gundaway, ti pondo ket mapmapan laeng iti bulsa da. Ti pondo manipud iti excise tax ti tabako a napataud manipud iti linteg nga RA 7171 ket saan a sagsagrapen ti mannalon ti tabako. Daytoy ket ibulbulsa dagiti lokal a pulitiko ken maar-aramat a pagpabanglo da iti eleksyon kas ti panagpatakder kadagiti imprastraktura nga saan a direkta nga agserserbi iti produksyon ti tabako. Nalatak nga anomalya iti RA 7171 ket ti panaggatang ti dati a gobernadora ti Ilocos Norte a ni Imee Marcos ti 110 a minicab a saan a nagnumaran ti mannalon ti tabako.

Kabayatan na, dagiti mangngalap iti Ilocos ket makapadpadas ti nakaro a panagrigat. Agingga iti agdama ket nakaat-atrasado dagiti ramit da iti produksyon. Kagiddan pay daytoy ti panagadu dagiti commercial fishing vessel iti Lingayen Gulf a mangkalkalap iti tone-tonelada nga ikan iti inaldaw. Iti tuloy-tuloy a panagngato ti presyo ti krudo, dandani awan ti masapulan ti mangngalap.

Kaaduan kadagiti mangngalap iti Ilocos ket awanan bukod a bangka gapu iti kinangina ti panagpaaramid ditoy. Isu a makikalkalap da laeng wenno sumsumrek iti nadumaduma a tipo ti bingayan. Saan da met a tuloy-tuloy a makapagkalap gapu ta agdepende iti kasasaad ti baybay. Iti panawen ti bagyo ken habagat ket manmano da a makatapog. Isu nga saan a sigurado ti pagbiagan da.

Dagiti patakaran ti gobyerno ket ad-adda a mangmangted ti restriksyon kadagiti mangngalap, kas koma ti zoning. Limitado laeng ti erya ti kabaybayan ti mapalubosan a pagkalapan dagiti babassit a mangngalap bayat a mabaybay-an dagiti commercial fishing vessel a nawaya nga agkalap iti taaw. Kasapulan met a mairehistro dagiti bangka da nga aggatad ti ₱1,000 agingga ₱ 1,500 para iti tallo a tawen. Nayon a gastos daytoy ti mangngalap a nababbaba pay iti ₱300 ti masapulan na iti inaldaw.

Pangta met iti pagbiagan dagiti mangngalap dagiti eksplorasyon ti minas iti kabaybayan ti rehiyon. Kangrunaan a black sand wenno magnetite ti kayat a minasen dagiti kumpanya, a nangitundan ti coastal erosion iti adu a komunidad ti Ilocos. Iti panagtultuloy ti turismo, naapektaran met dagiti komunidad ti pagkalapan gapu ta mapadpadisi da para kadagiti resort, hotel ken restaurant, kasukat ti napatpateg a produksyon ti taraon para iti gimong.

Iti agdama, dakkel a pangta iti biag ken pagbiagan ti umili nga Ilokano ti kumarkaro a tension iti West Philippine Sea. Pagiinnagawan dagiti imperyalista a pagilian a China ken US ti kadanuman iti daytoy a paset ti Southeast Asia. Daytoy a paset ket nabaknang iti rekurso ti baybay ken maysa a kangruaan a ruta iti linnakuan. Kasapulan daytoy ti China tapno mapapigsa ti bileg na iti ekonomiya. Iti bangir na, kasapulan a lapdan ti US ti China iti panagpalawa daytoy babaen ti panangparnuay ti gyera. Iti panangisayangkat ti gyera ket agtulid ti ekonomiya ti US gapu ta daytoy ti kangrunaan nga industriya na.

Ti probinsya ti Ilocos Norte ti agbalin a frontline iti daytoy a gubat nu bumtak. Awan ti nalawag a plano ken awan bibiang ni Marcos Jr. ken ti pamilya na a nakatugaw iti agbalin nga epekto iti biag ken pagbiagan dagiti kailian da. Agtultuloy nga agtamtamed da iti diktar ti US ken nalawag a kumankanunong da iti panagparnuay daytoy ti gubat. Ti panangpalubos da iti balbaliw a panangisayangkat ti Balikatan ken ti panagpaadu ti EDCA site, nga adda metten iti Ilocos Norte, ti nalawag a ladawan ti panagpakaaso-aso ti pamilya a Marcos.

Adun a balligi a nagun-od ti umili ti Ilocos karaman ti PKM-Ilocos ken dadduma pay a timpuyog iti sidong ti NDFP. Adda met dagiti pagkapuyan ken panagsanud, ngem ti obhetibo a kasasaad ti rehiyon ti mangiyap-aplag ti nadam-eg a daga para iti rebolusyon. Iti tengnga ti nakalayat nga inter-imperyalista a gubat ken agsusuwek a krisis ti kagimongan, ti laeng demokratiko a rebolusyon ti umili ti addaan nalawag a programa ken direksyon para iti masa a mannalon ken mangngalap.

Tatta ti panawen tapno agurnong, agadal ken agpatignay iti ginasgasut. Pagkaykaysaen ti kaaduan a bilang ti maidadanes nga umili iti sidong ti demokratiko a rebolusyon ti umili.

Agbiag ti National Democratic Front of the Philippines!