Lubos nga ginkundenar sang Mount Cansermon Command- New People’s Army (MCC-NPA) ang pagdakop sa mga katapo sang 94th IB sa isa ka mangunguma sa Sityo Karanawan-Buli, Barangay Buenavista, Himamaylan City, Negros Occidental sang kaagahon sang Disyembre 7. Gindakop kag gindala si Pokoy Rebradilla sa nasambit nga militar sa Tambo Headquarters sa banwa sang Ayungon upod sa iya bata.

Antes sini, duha ka beses nga nagpinalupok ang mga soldado sang 94th IB. Pasado alas dose sang kaagahon sang una nga nagpalupok ang nasambit nga militar samtang ginsaka ang balay, gindala, gin-imbestigar kag gintortyur si Rebradilla. Pasado alas-3 sang aga, liwat naman nga nagpinalupok ang mga soldado. Ginpagwa nga kuno may engkwentro sa tunga sa mga pwersa sang 94th IB kag NPA nga natabo sa amo nga lugar kag may mga narekober nga armas luthang kag mga kagamitan.

Si Rebradilla, katapo sang Kauswagan sang Mangunguma sang Barangay Buenavista (KMB). Sadtong Nobyembre 8 man sang kaagahon, gindakop ang pakaisa ni Rebradilla nga si Joel Casusa kag upod sa isa pa kag gipasibangdan man nga katapo sang NPA. Kaangay man nga ginplanteran sang malagba nga armas luthang kag iban pa nga gamit militar ang mga biktima. Isa ka modus nga indi na bag-o sa publiko nga masami ginahimo sang militar kaangay sa natabo sang Disyembre 7 sa Sityo Karanawan, Barangay Amontay, Binalbagan nga ginpagwa nga katapo sang NPA ang ila ginpatay nga isa ka mangunguma. Ang mga nasambit nangin biktima sang intimidasyon kag red-tagging, nga sa indi man nagdugay gipangpatay sa estado kaangay sang pagmasaker sa pamilya Fausto sadtong Hunyo.

Sa ila padayon nga pagpaniplang kag kapintas, nagpresentar sa nagligad bulan ang 94th IB kag 303rd Brigade sa pagpanguna ni Lt.Col. Van Donald Almonte kag M.Gen. Orlando Edralin sang kuno pinakadamo nga surrenderee nga naglab-ot sang 25 ka indibidwal nga kuno mga katapo sang NPA kag likom nga organisasyong masa. Ang matuod, mga sibilyan kag mangunguma sila nga napilitan nga mag-surender bangud sa presyur kag pagpamahug sang 94th IB. Resulta ini sang Retooled Community Support Program (RCSP) kag loud speaker operations sa nasambit nga militar sa mga komunidad sang mangunguma. Ginapaandaman sa mga tropa sang 94th IB ang publiko paagi sa paglawag sa mga ngalan sang mga indibidwal ukon grupo nga ginadudahan nila nga nagasuporta ukon katapo sang NPA.

Sa ulihi nga kwarto sang 2023, indi talalupangdon nga halin Oktubre tubtob Disyembre 3 ka beses ukon isa sa kada bulan ang ginapagwa nila nga peke nga engskwentro sa tunga sang AFP kg NPA sa sakop sa South Central Negros. Ini bangud sila na mismo ang nagpahayag nga sa katapusan sang 2023 ideklara na nila ang Negros nga Insurgency-Free kag abli na sa pagsulod sang mga imbestor kag langyawng dumuluong para ibaligya ang baratong kusog-pangabudlay kag natural nga rekurso sa isla.

Kadungan sini, sila naman mismo ang nagapresyur kag nagahatag sang sala nga handum nga lubos na nila mawasak ang NPA subong nga tuig. Wala nila nahangpan nga samtang nagapadayon nga nagalungtad ang politikal kag ekonomikong krisis idalom sang dunot nga sistemang mala-kolonyal kag mala-pyudal, ara gihapon ang dako nga basehan sang padayon nga pagbaskog nga pagsulong sang paghimakas sang pumuluyo kag sa ila armado nga pagbato.

Dapat manindugan ang pumuluyong mangunguma labina ang mga biktima sang militarisasyon sa kabukiran nga ipakigbato ang ila kinamatarung kag pangapinan ang ila ancestral domain kag pangabuhian.

Dapat pasabton ang AFP partikular ang 94th IB sang ila mga bayolasyon sa tawhanon nga kinamatarung kag iban pa nga kalapasan sa pumuluyo.

Ginahangkat man naton ang mga local government unit sa kada syudad kag kabanwahanan nga buligan kag protektahan ang ila ginsakupan.

Ginapanawagan sang MCC-NPA nga magbulig ang mga taong-simbahan, human rights advocates kag iban pa nga sektor para mapasabat ang may mga kalapasan sa hanay sang AFP kag makaangon sang hustisya ang mga biktima nga mga mangunguma.

Samtang, ang mga Pulang Hangaway padayon man nga magaduso sa hilikuton sa armadong paghimakas, rebolusyon agraryo, kag pagtukod sa baseng masa sa pihak sang kabudlayan sa wala untat nga militarisasyon. Bilang matuod nga suldado sang pumuluyo, magalunsar ini sang mga taktikal nga opensiba agud amat-amat nga buhinan ang kusog sa gahuyango nga kaaway sang sahi.###