Ita nga aldaw, Pebrero 25 ti anibersaryo ti kaaldawan ti panangpadisi iti umili a Pilipino iti diktador ken kurakot a presidente, ni Ferdinand Marcos Sr idi 1986. Ngem gapu iti kinagulib ken kinaawan-babain ti pamilya na ket inkagumaanda nga agsubli tapno ituloy ti panagpapas iti turay.

Mapasamak manen ti eleksyon a midterm inton Mayo 2025 iti sidong ti turay ti rehimen Marcos Jr. Iti likudan dagiti panangpapintas ti imahe na, saan a mabura ti panangpadisi kadakuada ti umili ken pananggammat da iti poder babaen ti panangsaur iti eleksyon idi 2022. Ti rehimen Marcos ket napnuan mulit iti kumarkaro a panangparigat iti umili, pananglabsing iti karbengan-tao ken panangrabngis iti soberanya iti pagilyan babaen ti panagpakaaso-aso iti imperyalista a US.

Isigsigurado ti rehimen US-Marcos a babaen ti Eleksyon 2025 ket maitultuloy dagiti programa a sumur-surot iti patakaran ti imperyalista a US iti globalisasyon, liberalisasyon ken pribatisasyon iti ekonomya. Dagitoy a patakaran ti mangituntunda ti tuloy-tuloy a panagsuwek ti pagbiagan ti mayorya ti umili a Pilipino. Iti mandar ti imperyalista a US, isigsigurado met ti rehimen Marcos a mapalagda ti EDCA, VFA ken dadduma pay a patakaran a mangpapairut iti militar a kontrol ti imperyalista a US ken panangaramat iti Pilipinas kas base militar na. Nayon pay, ita nga eleksyon ket uminget ti kampanya iti represyon tapno rebbeken ti rebolusyonaryo ken demokratiko a dangadang ti umili, kabilang ti pananglipit kadagiti progresibo a partido, partylist ken a kandidato a mangaw-awit ti napudno a plataporma para iti umili.

Dandani sangagasut a porsiento iti Kongreso ken Senado ket agtaud kadagiti pulitikal a dinastiya dagiti apo’t daga ken burges kumprador. Uray ti partylist system, a naputar tapno maaddaan ti representasyon iti Kongreso dagiti nakukurapay a sektor ket ag-agawen pay laeng dagiti babaknang a pulitiko.

Dagitoy a pulitikal a dinastiya ket warlord a mangipangpangruna iti nadara ken narugit nga eleksyon. Iti Ilocos, ti dinastiya a Marcos ti agtaltalinaed a makinkontrol iti pulitika iti Ilocos Norte agingga iti nailyan a saklaw. Iti La Union ket deka-dekadan a rimrimbawan ti dinastiya ti Ortega kasta met ti dinastiya ti Singson iti Ilocos Sur. Dagitoy a dinastiya ket appo’t daga ken dadakkel a negosyante nga agkamkamkam ti dagdaga ken kakutsaba dagiti gangannaet a kumpanya ti tabako, renewable energy ken dadduma pay a kapitalista a kumpanya.

Iti bangir na, 75 % wenno nangatngato pay ti populasyon ti Pilipino ket agbibiag iti kinakurapay. Iti kinabayag dan nga agturay, saan a masungbatan dagiti plataporma dagiti reaksyonaryo a pulitiko ti kinakurapay gapu ta uman-annurot dagitoy iti patakaran nga agserserbi iti interes dagiti monopolyo kapitalista, dadakkel a burgesya-kumprador ken apo’t daga. Kayat na a sawen nga anyaman ti resulta daytoy nga eleksyon ket saan tayo a namnamaen a mapasamak ti pundamental a panagbalbaliw iti kagimongan.

Rebolusyon, saan a reaksyunaryo nga eleksyon

Ti laeng mangallangon iti nalabes a kinakurapay ken pannakaidadanes ket ti panangguped iti malakolonyal ken malapyudal a sistema ti gimong. Daytoy ket babaen ti panangipatungpal ti pudno a reporma ti agraryo, nailyan nga industriyalisasyon ken soberanya ti pagilyan, a mapasamak laeng babaen ti demokratiko a rebolusyon ti umili.

Iti kaanoman ket saan a pulos nga isuko dagiti babaknang a dasig ti kinabaknang ken turay nu di ket usaren da ti ranggas ken panangallilaw kas ti burgis nga eleksyon tapno agtalinaed kadakuada daytoy ken ad-adda pay nga agpabaknang. Ti armado a dangadang ti mangrebbek iti sadiri dagiti apo’t daga, dadakkel a burges-kumprador ken imperyalista ken mang-agaw ti pampulitika a bileg.

Agraryo a rebolusyon, saan nga reaksyunaryo nga eleksyon ti mangrisut iti ramut ti parikut ti kaadwan nga umili a Pilipino. Imbes a mangnamnama kadagiti ubbaw a karkari iti burgis nga eleksyon, napatpateg nga iyabante ti dangadang ti mannalon para iti pudno a reporma nga agraryo. Manipud iti monopolyo dagiti apo’t daga, burgesya-kumprador ken gangannaet a monopolyo kapitalista, dagiti daga, rekurso ken industriya ti pagilyan ket manasyunalisa. Babaen ti pudno a reporma nga agraryo ken nailyan nga industriyalisasyon, tumaud ti amin-a-benneg a panagdur-as ken kinatalged ti ekonomiya.

Rakraken ti reaksyunaryo a gubyerno ken ibangon ti Demokratiko a Gubyerno ti Umili. Iti eleksyon a pagar-arian dagiti babaknang nga apo’t daga ken burgesya kumprador, awan ti manamnama dagiti masa nga anak ling-et ken magungundawayan iti gimong a panagbalbaliw iti panagbiag da nu di ket ad-adda laeng a mapalpalagda ti sistema a malakolonyal ken malapyudal a mangparparigat kadakuada.

Iti laeng demokratiko a gubyerno ti umili a sigurado a maitandudo ti interes dagiti mannalon, mangmangged, mangngalap, nailyan a minorya, dagiti kabataan, kababaihan, makintengnga a puersa ken amin a maidaddadanes iti gimong. Kasupadi ti reaksyunaryo a gubyerno, ti panangibangon ti demokratiko a gubyerno ti umili ket dumalan iti nawaya ken nadalus a panagpipili aginga a maitakder ti Demokratiko a Republika ti Pilipinas.
Dagiti rebolusyonaryo a timpuyog ti umili ti bin-i ti demokratiko a gubyerno ti umili. Rumbeng nga ibangon, palawaen ken papigsaen dagiti rebolusyonaryo a timpuyog tapno matipon ti bileg ti umili a manglaban kadagiti nadumaduma a langa ti pananggundaway dagiti agar-ari a dasig aginga a maibangon da ti demokratiko a gubyerno ti umili.
Ti New People’s Army (NPA) ti armado a puersa ti umili a mangrebbek ken mangsukat iti agdama a bulok nga AFP ken PNP ken agserbi a sarikedked da iti panangiyabante iti demokratiko a rebolusyon ken salaknib kadagiti magun-od da a balligi.

Ti Communist Party of the Philippines ti kaykaysuna a partido a pudpudno a mangibagbagi iti dasig a mangmangged ken amin a maidadanes iti gimong gapu ta awit daytoy ti ideolohiya a mangpunas ti burges nga ideolohiya ti panagimbubukod, kinaagum ken panaggundaway ken mangitantandudo iti panagpapada. Daytoy ti mangiwanwanwan iti demokratiko a rebolusyon ti umili ken ti panangibangon ti demokratiko a gubyerno ti umili.

Dagitoy dagiti organo ti demokratiko a bileg pampulitika nga ibangbangon tayo a mangsukat iti bulok a pampulitika a bileg dagiti mananggundaway a dasig. Kasapulan nga itakder ken papigsaen dagitoy iti tukad-tukad manipud kaaw-awayan aginga a mapadisi dagiti buklis nga agtuturay iti sentro ti reaksyunaryo a poder.

Bayat nga ipatpatungpal dagiti kangrunaan a rebbengen iti demokratiko a rebolusyon ti umili, kasapulan nga iti uneg ti reaksyunaryo nga eleksyon ket ilaban dagiti plataporma ti marigrigat ken maidaddadanes. Iti uneg ti reaksyunaryo a gubyerno ket ibasura dagiti linteg ken patakaran dagiti imperyalista, burges kumprador ken appo’t daga ken irupir ti pudno a reporma iti daga, nailyan nga industriyalisasyon, naan-anay a serbisyo iti gimong, nailyan a soberanya ken wayawaya manipud imperyalista a kontrol, hustisya iti gimong ken panangitandudo ti karbengan-tao. Dagiti patriyotiko ken progresibo a partido, partylist ken kandidato a mangaw-awit kadagitoy a plataporma ket rumbeng a maipangabak, bayat a guyguyugoyen wenno kariten dagiti dadduma pay nga itandudo dagitoy para iti pudno a panagbalbaliw.

Kamaudianna, saan tayo a mangnamnama iti reaksyunaryo nga eleksyon. Daytoy ket wagas ti agar-ari a dasig tapno allilawen ti umili ken ilisi isuda iti pudno a dana ti panagbalbaliw iti kasta ket mapatibker ken aglayon ti turay da. Iti panawen ti burgis nga eleksyon, labanan dagiti napeklan ken despotiko nga agtuturay nga ipangpangruna ti rehimen Marcos. Ipinget ti panagor-anisa ken panaagpalawa kadagiti rebolusyonaryo a timpuyog ti masa, irupir dagiti adyenda ti umili ken papigsaen ti armado a dangadang.