Isa ka abugado nga nagapangapin sa tawhanon nga kinamatarung kag isa ka Pulang hangaway nga wala na sang ikasarang magbato ang ginpatay sang mga armadong ahente sang estado sang nagligad nga semana.

Ginluthang kag napatay sang duha ka armadong lalaki si Atty. Juan Macabadbad, pangaduha nga tagapangulo sang Union of Peoples’ Lawyers in Mindanao kag katapu sang National Union of Peoples’ Lawyers, sa atubang sang iya balay sa Surallah, South Cotabato sang Septyembre 15.

Abugado si Atty. Macabadbad sang mga lumad, titser, bilanggong pulitikal kag iban pang sektor sa rehiyon. Myembro man siya sang partido Bayan Muna.

Sa Camarines Sur, gintortyur kag ginpatay sang Septyembre 12 sang mga pulis kag suldado si Dioscorro L. Roma (Ka JR), isa ka hangaway sang Bagong Hukbong Bayan (BHB) nga wala na sang ikasarang nga magbato. Nadakop si Roma sa gwa sang kampo sang BHB sa Tible, Lupi samtang nagakuha sang suplay.

Suno sa pamilya, halos indi na makilala ang bangkay ni Roma bangud sa grabe nga tortyur nga gin-agyan niya. Basag ang iya guya, mga kamot kag kinatawo kag nagapangitom sa lagob ang bug-os nga lawas.

Samtang, gin-aresto sang Philippine National Police-Labo ang duha ka upisyal sang Barangay Dumagmang, Labo, Camarines Norte sang Agosto 30. Ginpasibangdan sanday Barangay Kagawad Angelita F. Talla kag Julieta Clores Dela Cruz, 65, sang pagkadalahig sa armadong aksyon sang nagligad nga Marso. Ginpasakaan sila sang kaso nga direct assault kag frustrated murder.

Gin-aresto kag gin-akusahan nga katapu sang BHB ang mangunguma nga si Toto Moreno, residente sang Sityo Uyangan, Barangay Budlasan, Canlaon City, Negros Oriental, sang mga suldado sang 62nd IB sang Septyembre 14.