Protesta sa mga kabus sa Quezon City. Gatusan ka mga kabus nga lumulupyo sa Barangay Tatalon, Sityo San Roque, Payatas ug Commonwealth sa Quezon City ang nagprotesta niadtong Setyembre 5 atubangan sa city hall aron iduso ang ayuda, suhulan, trabaho, ug baratong pabalay para sa tanan. Gipasiugdahan ang protesta sa Kalipunan ng Damayang Mahihirap o Kadamay.

Tungod sa protesta, napugos ang lokal nga gubyerno nga moatubang sa usa ka dayalogo kauban ang mga lider sa matag komunidad aron makahinabi ang Housing Community Development and Resettlement Department (HCDRD) sa syudad. Niadtong Agosto pa nagpadala og sulat ang Kadamay-San Roque sa lokal nga gubyerno sa Quezon City kalabot sa ilang mga reklamo.

Martsa sa Navotas kontra reklamasyon. Liboan ka mananagat, magtatahong ug residente sa Navotas City ang nagmartsa padulong sa Navotas City Hall niadtong Setyembre 5 aron babagan ang hulgang 576-ektaryang Navotas Coastal Bay Reclamation nga proyekto sa lokal nga gubyerno ug San Miguel Corporations nga magpalayas sa 1,000 ka mananagat, magtatahong ug mamumuo sa palaisdaan. Makadaut usab sa kinaiyahan ang planong reklamasyon. Gipangulohan ang protesta sa bag-o lang natukod nga Samahan ng Mangingisda at Magtatahong sa Navotas.

Protesta sa unang adlaw sa klase. Gilunsad sa mga grupo sa kabatan-onan ang mga protesta sa unang adlaw sa inatbangay nga klase sa mga unibersidad niadtong Setyembre 5. Naglunsad og protesta ang mga estudyante sa University of the Philippines (UP)-Manila, Pamantasan ng Lungsod ng Maynila, UP-Diliman at De La Salle University. Supak sila sa pagkibhang sa badyet sa edukasyon, mandatory ROTC, red-tagging sa mga progresibong organisasyon ug pagpamig-ot sa akademikong kagawasan.

Paghunong sa operasyon sa 500 ka drayber sa Grab sa Pampanga. Naglunsad og hunong-operasyon ang 500 ka rider sa kumpanyang Grab niadtong Agosto 25 isip protesta sa bag-ong palisiya sa kumpanya nga nagpaubos sa delivery fee (bayad sa pagdeliber sa costumer ngadto sa mga rider) gikan ₱49 kada 3 kilometro ngadto sa ₱26 kada 3 kilometro. Nagtapok ang mga rider atubangan sa upisina sa kumpanya sa Balibago, Angeles.

Ika-7 nga anibersaryo sa Lianga Massacre, gidumdum. Naglunsad og protesta ug nag-ugbok og kandila ang mga grupo sa tawhanong katungod ug mga nasudnong minorya sa Commission on Human Rights niadtong Setyembre 1 isip pagdumdum sa ika-7 nga anibersaryo sa pagmasaker sa mga paramilitar nilang Dionel Campos, Aurelio Sinzo, ug direktor sa eskwelahan sa mga Lumad nga si Emerito Samarca sa Han-ayan Village, Diatagon, Lianga, Surigao del Sur nga gitawag og Lianga Massacre.

Paulion si Mary Jane Veloso. Sa pagpasiugda sa Migrante International, naglunsad ang mga progresibong grupo og usa ka prayer rally niadtong Setyembre 5 atubangan sa Department of Foreign Affairs (DFA) sa Pasay City para kang Mary Jane Veloso, usa ka migranteng Pilipino nga biktima sa human trafficking ug 12 ka tuig nang napriso sa Indonesia. Ginaduso sa mga grupo nga kinahanglang iduso sa gubyerno sa Pilipinas nga buhian ug paulion na si Veloso sa Pilipinas. Kadungan kini sa pagbisita ni Ferdinand Marcos Jr sa Indonesia.

Hepe sa BJMP sa Panay, napalagpot. Napalayas sa protesta ug noise barrage sa kapin gatusan ka piniriso sa Pototan, Iloilo ang korap ug mangtas nga warden sa ilang prisohan niadtong Agosto 24. Misaka sa atop ang mga preso ug nagpakita og mga plakard nga “Layas Warden!” ug “Gutom kami!” Tungod dinhi, gitangtang sa pwesto si Chief Inspector Norberto Miciano Jr.

Reklamo nila, gawas sa walay makaon, ginabawalan sa warden nga makasulod ang pagkaon nga dala sa ilang bisita. Lakip sa mga nabalhog sa maong prisohan mao ang mga detenidong pulitikal nga aktibista ug organisador sa isla sa Panay.