Ambus sa Albay, operasyong haras sa Negros ug tsekpoynt sa Surigao del Sur ang gilunsad sa mga yunit sa Bagong Hukbong Bayan (BHB) niadtong Agosto. Dugang dinhi ang kalampusan sa BHB-Nueva Ecija sa usa ka engkwentro batok sa Special Action Force sa mga pulis.

Giambus sa usa ka yunit sa BHB ang dili moubos sa 20 ka sundalo sa giusang tropa sa 31st IB ug 49th IB sa Barangay Mamlad, Pio Duran, Albay niadtong Agosto 31. Duha ang napatay sa mga sundalo. Ang maong aksyon kabahin sa paningkamot sa BHB nga silutan ang mga abusado ug pasistang tropa sa AFP.

Ang maong yunit sa AFP tulo ka semana nang nangutingkay ug nagsabwag og kahadlok sa katawhan sa utlanan sa Pio Duran, Albay ug Donsol, Sorsogon.

Sa Negros Oriental, duha ang napatay samtang usa ang nasamdan sa gilunsad nga aksyong harasment sa BHB batok sa mga sundalo sa Alpha Coy Detachment sa 62nd IB niadtong Agosto 30 sa Sityo Casingan, Barangay Trinidad sa Guihulngan City.

Bag-ohay lang, nagsabwag og kabangis ang militar sa maong lugar. Lakip sa ilang mga krimen ang pagpanion og pusil kang Johnny Dela Peña sa iyang balay sa Sityo Ngalan, Barangay Macagahay, Moises Padilla, Negros Occidental niadtong Agosto 23 samtang giutingkay ang iyang balay. Giransak usab ang gipuy-an nilang Eboy Pitulan, Jonard Pitulan, Tornie Pitulan ug ni Linda Villacoher, pulos mga mag-uuma ug residente sa maong lugar.

Nagmuntar og usa ka tsekpoynt ug giharang sa BHB ang mga elemento sa Simultaneous Anti-Criminality Law Enforcement Operations (SACLEO), usa ka modus operandi sa pagpanghasi sa mga komunidad, sakay sa usa ka sakyanan sa Barangay Libas Gua, San Miguel, Surigao del Sur niadtong Agosto 30. Tumong sa tsekpoynt nga babagan ang planong pangpangsukmag sa mga pulis sa mga sibilyan. Imbes nga mohunong, nagpabuto ug nagpaturatoy na hinuon kini.

Samtang, duha ka pasistang Special Action Force (SAF) ang napatay ug dili pa kumpirmado kung pila ang nasamdan sa engkwentro tali sa BHB ug sa giusang pwersa sa 91st IB, 84th IB, 2nd Special Action Battalion, ug SAF niadtong Setyembre 1 sa utlanan sa Gabaldon ug Gen. Tinio Nueva Ecija. Walay kaswalti sa mga Pulang manggugubat sa BHB-Nueva Ecija.