Gipatay sa mga elemento sa 94th IB ug 47th IB silang Ericson Acosta ug Joseph Jimenez niadtong Nobyembre 30 sa Sityo Makilo, Barangay Camansi, Kanbankalan City, Negros Occidental. Si Acosta usa ka konsultant sa National Democratic Front (NDF) sa panaghisgot kalinaw samtang si Joseph Jimenez usa ka lokal nga organisador sa Kilusang Magbubukid ng Pilipinas ug upisyal sa lokal nga kahugpungan sa mag-uuma sa Barangay Camansi. Gidakop ang duha mga alas-2 sa kaadlawon, apan gipagawas nga napatay sa usa ka engkwentro sa pagkabuntag.

Si Acosta usa ka iladong magbabalak, manunulat ug taggama og kanta. Giila siya sa Partido nga usa sa importanteng kadre ug manggugubat sa Negros. Nahimong kabahin siya sa panel sa NDFP nga naggambalay sa Comprehensive Agreement on Social and Economic Reforms (CASER) sa pormal nga panaghisgot kalinaw niadtong 2016.

Matud sa pasiunang mga taho sa September 21 Movement, aron pagawason nga adunay engkwentro sa lugar, gipaulanan og bala sa mga sundalo ang balay ni Ronald Francisco, kung asa nagpahulay silang Acosta. Human niini, gikuha si Francisco, iyang asawa ug tulo nilang anak ug gidala sa kampo sa militar.

Niadtong Nobyembre 30, sa adlaw mismo nga nabalita ang pagpatay kanila, nagtapok ang mga demokratikong organisasyon atubangan sa Commission on Human Rights aron kundenahon ang pagpatay sa duha.

Duha pa ka biktima

Gipatay usab sa tropa sa 62nd IB, imbes nag dapatan og pasiunang tabang, ang duha ka samarong Pulang manggugubat sa Sityo Binataan, Quinten Remo, Moises Padilla niadtong Nobyembre 28. Nasamdan silang Mario Baldusa (Ka Jekoy) ug Janhel Sarsa (Ka Jorge) sa engkwentro, buntag niadtong adlawa.

Imbes nga tambalan, ilhon, ug ideklarang bihag sa gubat, gidayunan na hinuon pagpatay sa 62nd IB ang duha.

Dugang ang upat sa kapin 100 ka rebolusyonaryo ug sibilyang wala nay ikasukol nga gipatay sa militar gikan 2017 hangtud sa kasamtangan. Lapas ang pagpatay kanila sa mga lagda sa makitawhanong pakiggubat ug sa mga proteksyong gigarantiya sa mga indibidwal ilalum sa Comprehensive Agreement on Respect for Human Rights and International Humanitarian Law ug Geneva Conventions.