Sunud-sunod ang mga kaso sa paglapas sa tawhanong katungod sa rehimeng Marcos sa milabayng mga semana. Lakip dinhi ang pagpatay sa usa ka mag-uuma, pagpamomba ug pag-istraping sa komunidad, ug arbitraryong pag-aresto sa mga sibilyan.

Gipatay sa tropa sa 62nd IB ang mag-uumang si Victor Baldonado sa iyang balay sa Sityo Columbia, Barangay Trinidad, Guihulngan City, Negros Oriental niadtong Nobyembre 21, ala-6 sa buntag. Gipusil siya sa mga sundalo atubangan sa iyang asawa ug mga anak.

Gipagawas sa 62nd IB nga manggugubat sa Bagong Hukbong Bayan (BHB) si Baldonado ug nga napatay siya sa usa ka armadong engkwentro. Gisaninaan sa mga sundalo ang iyang patayng lawas ug gitaparan og mga armas ug mga dokumento aron hatag rason ang krimen.

Pag-aresto. Sa Negros Occidental, arbitraryong giaresto sa 62nd IB silang Wilben Callura ug Juliet Callura, mga lumulupyo sa Sityo Binataan, Barangay Quinten Remo, Moises Padilla. Kadungan niini, giistraping sa tropa sa militar ang balay ni Virgie Perolino, Roberto Gario ug Jorenda Callura sa parehong sityo. Gikawat usab ang ilang mga manok ug giihaw ang gialimahang baboy. Bunga niini, lumikas ang 800 ka mag-uuma gikan sa Sityo Oway-uway, Binataan ug uban pang kasikbit nga komunidad.

Niadtong Nobyembre 25, giransak sa mga sundalo sa 62nd IB ug 33rd DRC ang kabalayan sa Sityo Ngalan sa parehong barangay. Pugsanong gisulod ug giutingkay ang balay nilang Zaldy Jimenez, Richard Jimenez, Robert Jimenez, Cardo Juanites ug Sernel Juanites. Nagpundo sa maong mga bahay ang mga sundalo gikan Nobyembre 25 hangtud 28.

Giaresto ang unyonistang si Roel Duyag niadtong Nobyembre 25 sa Butuan City samtang miduaw sa haya sa iyang inahan. Koordineytor siya sa Kilusang Mayo Uno sa Caraga. Gidala siya sa Butuan PNP Station 1 ug gipasakahan og gama-gamang mga kasong pakyas nga pagpatay.

Pagpamomba ug istraping. Gitay-og sa mga rocket ug bala ang Purok 8, St. Peter, Malaybalay City, Bukidnon niadtong Nobyembre 16 human gibomba ug giistraping sa 8th IB ang komunidad. Balos kini sa militar human maigo sa BHB sa duha ka armadong insidente. Naghulog og 16 ka rocket ug walo ka beses nga nang-istraping ang MD520 nga helikopter. Milungtad og 40 minutos ang unang ronda.

Mihagurus sa pagdagan ang mga lumulupyo tungod sa kaduul gihulog nga mga bomba. Nanghapa ang mga magtutudlo ug mga estudyante sa ilang mga klasrum samtang nagtuyok-tuyok ang mga helikopter ibabaw sa ilang baryo.

Pagpamusil. Lima ka sibilyang mangangayam ang gipamusil sa tropa sa 24h IB sa lasangong bahin sa Sityo Sap-al, Barangay Buneg, Lacub, Abra niadtong Nobyembre 27.

Duha ka mag-uuma ang nasamdan sa insidente samtang nakadagan ang tulo pa sa kasikbit nga komunidad aron magpatabang.

Nasugat sa mga sundalo ang lima samtang nagpahulay. Gipataas dayon nila ang ilang armas nga gamit sa pagpangayam ug misinggit og “sibilyan mi!” aron dili sila pabuthan sa mga sundalo. Luyo niini, nagpabuto pa gihapon ang mga sundalo.

Dispersal. Bangis nga gibungkag niadtong Nobyembre 25 sa mga pulis ug gwardya ang piket sa mga mamumuo sa Manila Harbour Center sa Road 10, Manila City. Giguba nila ang bag-o lang gitukod nga tulda sa mga mamumuo ug ilang tigsuporta nga kabatan-onan. Gipanghingusog sa mga mamumuo ang hinanali nga pagpabalik sa trabaho ug pagregularisa sa 370 ka trabahante nga iligal nga gipalagpot niadtong 2020.