Ginpatay sang mga elemento sang 94th kag 47th IB sanday Ericson Acosta kag Joseph Jimenez sang Nobyembre 30 sa Sityo Makilo, Barangay Camansi, Kabankalan City, Negros Occidental. Si Acosta konsultant sang National Democratic Front (NDF) sa sugilanon pangkalinungan samtang si Jimenez lokal nga organisador sang Kilusang Magbubukid ng Pilipinas kag upisyal sang lokal nga asosasyon sang mangunguma sa Barangay Camansi. Gindakup ang duha mga alas-dos sa kaagahon, pero ginpagwa nga napatay sa isa ka engkwentro pagkaaga.

Si Acosta isa ka kilala nga mamalaybay, manunulat kag komposer sang kanta. Ginkilala siya sang Partido nga isa sa importante nga kadre kag hangaway sa Negros. Nangin kabahin siya sang panel sang NDFP nga naghanda sa Comprehensive Agreement on Social and Economic Reforms (CASER) sa pormal nga sugilanon pangkalinungan sang 2016.

Suno sa pauna nga mga report sang September 21 Movement, para paggwaon nga may engkwentro sa lugar, ginpaulanan sang bala sang mga suldado ang balay ni Ronald Francisco, kon sa diin nagapahuway sanday Acosta. Pagkatapos sini, ginkuha si Francisco, iya asawa kag tatlo nila ka anak kag gindala sa kampo sang militar.

Sang Nobyembre 30, sa adlaw mismo nga ginbalita ang ila pagkapatay, nagtipon ang mga demokratikong organisasyon sa atubang sang Commission on Human Rights para kundenahon ang pagpatay sa duha.

Duha pa nga biktima

Ginpatay man sang tropa sang 62nd IB, imbes nga hatagan sang pauna nga panabang, ang duha ka pilason nga Pulang hangaway sa Sityo Binataan, Quinten Remo, Moises Padilla sang Nobyembre 28. Napilasan sanday Mario Baldusa (Ka Jekoy) kag Janhel Sarsa (Ka Jorge) sa isa ka engkwentro aga sang adlaw nga ina.

Imbes bulngon, hibal-on ang identidad, kag ideklarar nga bihag sang gera, dalayon nga ginpatay sang 62nd IB ang duha.

Dugang ang apat sa masobra 100 rebolusyonaryo kag sibilyan nga wala sa kahimtangan nga magbato nga hungod nga ginpatay sang militar halin 2017 tubtob sa subong. Baliskad ang pagpatay sa ila sa mga pagsulundan sang makatawo nga pagpakig-away kag sa mga proteksyon nga angkon sang mga indibidwal sa idalom sang CARHRIHL kag mga Geneva Conventions.