Napalayas ning bag-o lang sa Parents-Teachers Association o PTA ang mga sundalo sa 68th IB nga nagkampo sa palibot sa Redhills National High School sa Calintaan, Occidental Mindoro.

Nagsumite og petisyon sa kapitan sa Barangay New Dagupan ang nagreklamong mga magtutudlo ug ginikanan aron tangtangon ang kampo-militar sa 68th IB duul sa eskwelahan gikan pa niadtong Hulyo 2022.

Gitukod ang kampo-militar usa ka bulan ayha nagsugod ang face-to-face classes sa eskwelahan. Natukod na sa mga pasistang sundalo ang 68 ka balay sa planong 100 ka balay sa ilang kampo sa panahong gilunsad ang petisyon.

Paghuboghubog ug kawalay pagtagad sa kaayuhan sa mga sibilyan ang pipila sa daghang rason nga nagtukmod sa kagustuhan sa mga magtutudlo ug ginikanan nga papahawaon ang mga nagkampong sundalo sa lugar.

Dugang pa, ginahiluan sa mga sundalo ang hunahuna sa kabatan-onan aron mahimong kauyunan ang mandatory ROTC. Lambigit niini, nanginlabot ang mga sundalo sa gilunsad nga Career Orientation sa eskwelahan. Gipasul-ob nila og fatigue uniform ang mga estudyanteng walay masuot nga uniporme sa gusto nilang kurso sa kolehiyo.

Samtang, gisilutan sa ikaduhang higayon sa BHB-Negros ang notoryus nga agalong yutaan nga si Teotimo ‘Tim’ Ballesteros. Giparalisa nila ang tulo pa ka trak niadtong Disyembre 26, 2022 sa Sityo Carbon, Barangay San Isidro, Toboso, Negros Occidental. Human kini sa naunang pagpahamtang og sangsyon batok kaniya niadtong Disyembre 14, 2022.