Nangabutyag ang baho sa sistemang padrino, korapsyon ug kriminalidad sulod sa Armed Forces the Philippines (AFP) ug Philippine National Police (PNP).

Dayag ang panagbangi sa mga heneral ug ilang mga pundok nga nag-unhanay sa pwesto ug bilyun-bilyong pondo nga nakagahin alang sa modernisasyon ug kampanyang kontra-insurhensiya sa AFP. Kagahapon, Enero 6, migawas sa balita nga kalit gipulihan si Lt. Gen. Bartolome Vicente Bacarro isip hepe sa AFP ug gibalik sa pwesto si Gen. Andres Centino nga nagsilbing hepe gikan Nobyembre 12, 2021 hangtud Agosto 8, 2022.

Subay sa usa ka balaod nga giaprubahan niadtong 2021, dapat magsilbi si Bacarro og 3-ka-tuig nga termino. Gitakda kini aron malikayan ang palisiyang “revolving door” o paspas nga pagpulihay sa mga hepe sa AFP nga nahimong pamaagi sa milabayng mga rehimen aron tanyagan ang pinakaitoy sa mga heneral.

Mas dakung bangi ang gakahitabo sa PNP tali sa mga anaa sa poder aron kontrolon ang dagkung sindikato sa droga ug uban pang kriminalidad nga ginaprotektahan kung dili man direktang ginapadagan sa tag-as nga mga upisyal niini. Niadtong Enero 4, gimando sa Department of Interior and Local Government (DILG) ang “courtesy resignation” sa tanang heneral ug koronel sa PNP, lakip ang hepe niining si Gen. Rodolfo Azurin. Ang pagluwat pwedeng dawaton o ibasura depende sa “pag-repaso” sa usa ka komite. Laraw kuno niining purgahon ang PNP sa mga upisyal nga lambigit sa droga. Giangkon mismo ni Benjamin Abalos, kalihim sa DILG, nga lalum ang problema sa kriminalidad sa han-ay sa mga pulis.

Walay nagtoo nga seryoso ang estado sa pagpurga sa mga sindikato sa iligal nga droga ug uban pang krimen sulod sa PNP. Gani, giangkon ni Abalos nga usa kini ka “shortcut” ug paglikay sa “dugay” nga prosesong hudisyal sa pagtaral sa mga korap nga pulis sa mga korte. Wala usab dayon gidawat ang mga temporaryong pagluwat ug bisan anaa sa proseso sa imbestigasyon ang DILG, padayon nga magsilbi sa ilang mga pwesto ang mga heneral ug koronel.

Gitawag sa mga grupo sa tawhanong katungod ang lakang isip pasundayag aron palusuton ang mga pulis nga direktang nalambigit sa mga kriminal nga sindikato. Ginatabunan niini ang kaylap nga pagkalambigit sa mga pulis ug pugos nga nagalikay sa mga kritisismo ilabina sa mini nga gyera kontra-droga nga gipatuman sa panahon sa rehimeng Duterte ug ginapadayon karon sa rehimeng Marcos.