Daku ang kalipay sa mga pamilyang Rebita dihang ilang nabawi si Baby Rhea, ang 3-ka-bulang bata nga gihimong hostage sa 402nd IBde aron pasurenderon ang iyang mga ginikanan nga parehong Pulang manggugubat. Gipanganak si Baby Rhea niadtong Oktubre 12, 2022 ug wala pa sukad nakita sa mga paryente niini.

Ang pagbawi sa pamilya sa bata nahitabo sa daplin sa haywey niadtong Disyembre 29, 2022, alas-5 sa hapon. Gihatod siya sa usa ka babayeng wala nagpaila. Duha ka adlaw ayha niini, gipagawas sa social media ang nakabidyong apela sa iyang ginikanan nga ilutaw siya.

Si Baby Rhea ang anak nilang Cherilyn Rebita (Ka Jan) ug Ka Logan, mga Pulang manggugubat ubos sa kumand sa Bagong Hukbong Bayan sa North Central Mindanao. Unod sa ilang pamahayag ang panawagan sa uban pang biktima sa kalapasan sa 402nd IBde nga motamod sa internasyunal nga makitawhanong balaod. Gipunting nila ang panawagan kang Colonel Adonis Ariel Orio, kumander sa 402nd IBde ug mga ahente niining silang Armando Rabanes (Anton/Dagat), Jonathan Bautista, Jeffrey Munez ug usa ka ginganlang Ondoy. Gipadayag sa mga Pulang manggugubat nga wala silay planong mosurender ug maghatag og kadaut sa hukbong bayan ug masa, sama sa gustong ipahimo kanila sa militar.

Gawas kang Baby Rhea, aduna pay laing bata sa ubang bahin sa nasud ang gihikawan sa militar sa ilang mga batakang katungod tungod sa suspetsang anak sila sa NPA. Usa dinhi ang 4-anyos nga si “RJ,” nga giilog sa 203rd IBde ug 41st IB gikan sa mga nag-atiman kaniya sa Occidental Mindoro niadtong 2021. Si RJ ang anak ni Emilia Marquez, usa ka mamumuong panglawas, nga giaresto niadtong 2017.