Gilunsad niadtong Hunyo 27 sa Bantayog ng mga Bayani sa Quezon City ang “Breaking chains, Reclaiming freedom from Marcos Sr to Marcos Jr,” usa ka aktibidad aron ipanawagan ang hinanaling pagpalingkawas sa tanang bilanggong pulitikal. Gipasiugdahan kini sa Samahan ng Ex-Detainees Laban sa Detensyon ug Aresto (SELDA) ug gisalmotan sa 13 ka organisasyon ug pipila ka kanhing detenidong pulitikal sa diktaduryang Marcos Sr. Ilalum sa diktadurya, mayor nga kampanya ang panawagang “Buhian ang tanang bilanggong pulitikal!”

Matud sa SELDA, mikabat na sa 49 ang biktima sa arbitraryong pagpangaresto ug detensyon sa unang tuig ni Ferdinand Marcos Jr. Lakip sila sa 778 ka bilanggong pulitikal nga anaa sa rekord sa Karapatan hangtud Hunyo 30.

Lakip sa mga bilanggo ang kapin 70 ka tigulang, 150 ka babaye ug 90 ka masakiton.

Sa mga rehiyon, Northern Mindanao ang adunay pinakadaghang ihap sa mga giaresto ug gidetine (105), sunod ang National Capital Region (104), Caraga (93), Western Visayas (90) ug Central Visayas (85).

Kadaghanan sa mga bilanggong pulitikal ang napriso tungod sa gama-gamang mga kaso. Giaresto sila nga walay ligal nga basehan ug sagad walay mandamyento de aresto. Gipriso sila tungod sa ilang pangpulitikang baruganan ug aktibidad.

“Daw-bao” ang pag-atubang ug pagtaral sa ilang mga kaso. Adunay mga detenidong nakahuman sa maksimum nga sentensya apan wala pa gihapon gibuhian tungod kay wala hustong nasubaybayan ang ilang kaso. Sagad kini sa mga detenidong kabus ug anaa sa layo ang pamilya, ug walay regular nga abugado.

Adunay mga detenidong nahukmang walay sala sa orihinal nga kaso, apan wala gibuhian tungod sa gipasakang “patong-patong nga kaso” sa militar. Aduna usay namatay sa prisohan nga wala man lang naresolba ang ilang mga kaso.

Gidumdum usab sa aktibidad ang International Day in Support of Victims of Torture. Gawas sa tortyur ug uban pang dili makatawhanong trato, naga-antus ang mga bilanggong pulitikal sa mga seldang piot, kulang nga pagkaon ug dili igo nga serbisyong panglawas.

Tumong sa kampanya nga makakabig og suporta sa sulod ug gawas sa nasud, makatibuok og network ug koalisyon sa lain-laing entidad ug makigdayalogo sa hingtungdnang mga institusyon sama sa United Nations.

Niadtong Hulyo 1, subling gipadangat sa mga tigpanalipud sa tawhanong katungod ang nagkagrabeng paglapas sa tawhanong katungod sa ika-53 nga tigum sa United Nations Human Rights Council sa Switzerland.